Oqaaseqaatit nuanninngitsut, Facebookimi torinngitsumik allattartut e-mailikkullu akissutit arritsut qatsuppigit? Taamaappat Travel Trade Forum attaveqaqatigiiffiuvoq ilinnoortoq. Kalaallit Nunaanni takornarialerisut naapittarfiat nutaaq, najugaqartut akornanni takornarialerisut kissaataat malillugu pilersinneqartoq. Naapittarfiuvoq matoqqasoq, ajornaatsumik, sukkasuumik sulinermullu tunngasumik najugaqartut-, kiisalu nunani tamalaani Kalaallit Nunaannut angalatitsisut imminnut oqaloqatigiiffigisinnaasaat.
”Forum tassaavoq takornariaqarnerup iluani attaveqaqatigiinnermut pitsaanerusumut alloriarneq siulleq. Torinngitsunik – inunnut attaveqaatini allani ilaakkajuttunik – imaqanngitsoq, assersuutigalugu inummut tunngatillugu saassussinerit oqaaseqaatillu ilasseraanngitsut. Oqaloqatigiittarfimmi uani suliffiup avataatigut inuunerup sulinermilu inuunerup immikkoortinnissai ajornannginnerulissaaq aaqqissuussaanerulerlunilu. Saniatigut najugaqartut nunanilu tamalaani suliffeqarfiit imminnut katersuuttarfissaraat, ikioqatigiiffissaraat tapersersoqatigiiffissaralugulu. Tamanna pilersitseqataaffigisinnaagatsigu assut tulluusimaarutigaarput,” Visit Greenlandimi pisortaq nutaaq, Hjörtur Smárason oqarpoq.
Attaveqaqatigiiffik qanorlu atorneqarsinnaanersoq pillugit ilisarititsineq naatsoq, uani videomi takuneqarsinnaavoq.
Forum tassaavoq takornariaqarnerup iluani attaveqaqatigiinnermut pitsaanerusumut alloriarneq siulleq.
Continues further down the page...
Visit Greenlandip piffissaq annertooq atorlugu Travel Trade Forumip sannaa atortuilu takornarialerisut akornanni misilittartereersimavaat, taamaalillutik imassat pisariaqartitaat tassaneereerniassammata. Sarah Woodall, Visit South Greenlandimi nunap immikkortuani takornariaqarnermik siuarsaasoq forumip atornissaa misilittarsimavaa inerneranillu naammagisimaarinnilluni:
“Forum assut iluarivarput, takornariaqarnerummi iluani aaqqisuulluakkamik sulinermullu tunngasumik attaveqaqatigiiffissamik pilersitsimmat, takornarialerisut allat peqatigaluit isumassarsiatsinnik avitseqatigiiffissatsinnik. Tassani toqqissisimanarnerusumik takoriaqarnerup iluani pilersaarusiornerit ineriartortitsinerillu oqaloqatigiissutigisinnaavagut. Taamaalilluta inunnut attaveqaatit sulianik naammasseriikkanik, takornarianut toraagalinnik saqqummiussissagaangatta aatsaat atortalissavagut,” Sarah Woodall oqarpoq.
Travel Trade Forum peqataaffigerusukkukku nittartagaq forum.visitgreenland.com iserfigisinnaavat peqataaniarlunilu nalunaarniarnermi ilitsersuut malillugu.
Paasisaqarnerorusukkuit
