Siulersuisut siulittaasuat Anette Lings pisortarlu Anne Nivíka Grødem ataatsimeersuarnermut, inuiaqatigiinnut tamanut paasissutissiiniarluni saqqummiussinermik aallaqqaaserneqartumut, tikilluaqqusisuupput. Saqqummiussinermi tassani Visit Greenlandip suliffeqarfittut aaqqissuussaanera maannalu pingaarnertut suliaqarfigisai ineriartortitsinissamullu pilersaarutigisai pillugit inuiaqatigiinnut paasissutissiinissaq siunertarineqarpoq.
Siulersuisut siulittaasuata nalunaarummini oqaatigaa ukioq 2022-mi nunarput takornarianit aatsaat taama amerlatigisunit tikerarneqarsimatigisoq. Corona sioqqullugu takornarianut tikittartunut naleqqiullugu umiarsuit takornariartaatit malunnartumik tikerarnerulernerat takornariallu amerlanerulernerat nunatta angalaffissatut soqutigineqarneranut uppernarsaataapput.
Aammattaaq siulittaasup oqaatigaa Visit Greenland soqutiginnittoqarnerulernissaa anguniarlugu ukiup ingerlanerani suliaqarsimasoq nunamilu tamarmi takornarialerinerup pitsanngorsarneqarlunilu siuarsarneqarnissaanik suliniutaasunik arlalinnik naammassisaqarsimasoq. Anguneqarsimasut pingaarnerit ilaat tassaavoq Avannaamioqatigiit Killiit angalatitsinermik suliaqartut saqqummersitsinerannik, Vestnordenimik taaguutilimmik, iluatsitsilluarfiusumik septembarimi pisumik aaqqissuisuusimaneq. Inuit angalatitsinermik suliaqartut 400-nit amerlanerusut nunanit tamalaaneersut tassunga peqataapput, nunat tamalaat akornanni angalatitsinermik suliallit nunanilu tikitassani takornarialerinermik suliallit atassuteqaatissaannik pilersitsiartorlutik siuarsaajartorlutillu. Siulersuisullu siulittaasuata ataatsimeersuarnerup matuma piviusunngortinneqarneranut nunatta immikkoortuini takornarialerinermi siunnersuinermik suliallit, takornariartitsinermik suliallit kiisalu aningaasaliisimasut immikkut qutsavigai.
Naggasiutigalugulu siulersuisut siulittaasuat ukiuni kingullerni Visit Greenlandip suliffeqarfittut allanngoriartorsimanera pillugu ilisimatitsivoq. Tamanna siulersuisut nikissimanerannut suliffeqarfiullu aaqqissuussaanerata allannguuteqarfiusimaneranut tunngassuteqarpoq, tamatumani pingaartinneqarsimasoq tassaasimalluni suliniutinik naammassisaqarsinnaassuseq sumiiffinnilu takornarialerinikkut piginnaassuseqarfigisat siuarsarniarlugit allaffimmut Nuummiittumut nukissanik ataatsimuulersitsinissaq.
Ataatsimeersuarnermi Anette Lings Hotel Sisimiuni pisortaasoq siulersuisuni siulittaasutut toqqagaaqqippoq. Taamatuttaaq siulersuisunut ilaasortaaginnartussanngorput Gert P. Olsen, Allan Chemnitz, Ane Lone Bagger aamma Kattie Nielsen.
Visit Greenlandip ukiumoortumik nalunaarutaa aqutsisut nalunaarutaannik siulersuisullu siulittaasuata oqalugiaataanik imalik naqqani atuaruk.
Taakku takorusunnerugukkit takoqqikkusukkukkilluunniit saqqummiussisoqarneranit immiussaq uani isiginnaarsinnaavat.
Anne Nivika Grødem,
mobil: 560282
Mail: nivika@visitgreenland.com
Continues further down the page...
