Ingerlatseqatigiiffiup, Kalaallit Nunaanni takornariaqarnermut nuna tamakkerlugu siunnersuisoqatigiittut inissisimasoq, Kalaallit Nunaata takornariarfissatut pilerinassusaata piujuartitsisumik qaffassarnissaanut suli pimoorussinertik uppernarsarpaa. Siulersuisunut siulittaasoq Anette Lings aamma pisortaq Anne Nivíka Grødem, ataatsimeersuarnermut qaaqqusipput, tamanullu ammasumik saqqummiinermikkut aallarniillutik.
Siulittaasoq Anette Lings oqaluttuarpoq, takornariaqarnermi 2023 rekortiliifffiusimasoq, Kalaallillu Nunaannut tikeraat siornatigumut sanilliullugu amerlanerpaasimasut. Umiarsuatigut takornariani amerleriartoqangaatsiarsimavoq, takornariallu tamakkerlutik amerlassusaat corona sioqqullugu amerlassutsinik qaangiisimallutik. Uppernarsineqarpoq Kalaallit Nunaata takornariarfissatut soqutigineqassusaa siornatigumiit annertuneruleraluttuinnarnera.
Visit Greenlandi 2023-mi soqutigineqarnerulerneq taperserniarlugu oqartussat, takornarialerisut nunallu immikkoortuini takornariaqarnermut siunnersuisoqatigiit suleqatiginissaat ukkatarisimavaa. Ingerlatseqatigiiffiup 2023-mi apriilimi nuna tamakkerlugu takornarialerisut, ataatsimiinnermi “Towards Better Tourism”-imi katersuutsissimavai, nunani tamalaani angalatsitsisunut saqqummersitsinerni 11-ni peqataasimallutik, Kalaallillu Nunaat misigisassarsiortunut takornarnariarfissatut nittarsaallugu. 2023-mi Visit Greenlandip umiarsuatigut takornariaqarnermi sumiiffilersuinermut nalunaarutiliani, suliaqarfimmilu suliniutissanut nutaanut tunngaviliisoq saqqummiuppaa.
“2023-mi suliniutigut Kalaallit Nunaata nunarsuarmi nunallu iluani inissisimavianik nukittorsaasimapput,” pisortaq Anne Nivíka Grødem oqarpoq. “Nuna tamakkerlugu takornariaqarnermi siunnersueqatigiittut suliassatta pingaarnerit ilagaat politikkikkut aalajangiisartunut, innuttaasunut, inuussutissarsiortunut nunanilu tamalaani niuerfinnut attaviliinissaq. Takornariaqarnerup siuarsarnissaa toraagaralugu sulivugut, tikeraartussanut pilerisaariinnarata, pinngortitattali perorsarsimassutsitsinnilu naleqartitatta ataqqineqarnissaat piujuartinnissaallu aamma anguniarlugit. Taamaattumik suliniutit piujuartitsisumik ineriartortitsisut, sumiiffitsinni inuiaqatigiinnut tikeraanullu iluaqutaasussat ukkataraagut, saniatigullu takornariaqarnermi akisussaasusilimmik ineriartorneq qulakkeerlugu.”
Aningaasaqarnikkut Visit Greenlandi 2023-mi 370 t.kr.-inik sinneqartoorsimavoq, siulersuisullu tamanna ingerlatseqatigiiffiup siunertaanut tunngatillugu naammagisimaarutigaat. Aningaasatigut inernerit pilersaarusiallu sammiviisa, Visit Greenlandip inatsisitigut pisussaaffiinik naammassisaqarluarneranik, siunissarlu ungasinnerusoq eqqarsaatigalugu piujuartitsinissamut ukkataqarneranik uppernarsaapput.
“Ukiuni tulliuttuni ineriartornermik, nutaaliornermik akisussaasusilimmillu takornariaqarnermik tapersiinissaq ukkatareqqissavarput,“ siulersuisunut siulittaasoq Anette Lings oqarpoq. “ Takornariaqarnermut immikkuullarissumik pilersaarut 2025-mut atuuttup ineriartortinnissaa pimoorupparput, ingerlavillu ataatsimoorussaq, takornariaqarnermik nukittorsaasoq, piujuartitsinermillu ukkatarinnittoq toraagaralugu.”
Siulittaasup aamma paasissutissiissutigaa Visit Greenlandip aaqqissuussaanerata ukiuni kingullerni allanngortinneqarsimanera. Isumalluutinik Nuummut nuussuinikkut naammassinnissinnaanerup nukittorsarnissaa, sumiiffimmilu piginnaasat sanaartornissaat ukkataasimavoq.
Ataatsimeeruarnermi Anette Lings, Hotel Sisimiuni pisortaq siulersuisunut siulittaasutut qinigaaqqippoq. Siulersuisunut ilaasortat Gerth P. Olsen aamma Kattie Nielsen aamma qinigaaqqipput. Saniatigut Heidi Jensen aamma Erik Palo Jacobsen, siulersuisunut ilaasortaasimasunik Ane Lone Baggerimik aamma Allan Chemnitzimik taarsiipput. Siulersuisunut ilaasortat nutaat tamarmik inuussutissarsiortuni- aamma takornarialerisuni ineriartortitsinermik kiisalu nutaaliorluni aallarnisaanermik tunuliaquteqarput, Kalaallillu Nunaanni takornariaqarnermi iluaqutaasussanik ineriartortitseqataasussanillu ilisimasaqarlutik piginnaasaqarlutillu.
Takornariaqarnermi kisitsisit – nalunaarusiaq 2023: LINK
Continues further down the page...
