Ataatsimoorluta siunissatsinnut ilusiliisussanut tunngasunik oqaloqatigiinnernik pitsaasunik isumaqarluartunillu qanoq ililluta Kalaallit Nunaani pilersitsisinnaavugut? Aamma qanoq iliorluta najugaqarfigut pitsaasuutinniarlugillu takornariarlugit orniginartunngortissinnaavagut?
Tamakkuupput Visit Greenlandip suliniutaani Nunarput Nuanimi 2025-imi suliarineqarsimasut – suliniummilu tassani 2026-imi ingerlateqqinneqartussat.
2025-imi innuttaasunik najukkamilu suliniartunik oqaloqatigiinnerit ingerlanneqarsimapput. Tassani Nuummi, Qeqertarsuarmi, Ilulissani Kangerlussuarmilu takornariaqarnerup ineriartornera najukkamilu ulluinnarni inuiaqatigiinnut qanoq isumaqarnera pillugu innuttaasut isiginnittaatsiminnik misilittakkaminnillu avitseqatigiissimapput.
2026-imi oqallinneq Tasiilami, Qaqortumi Qaanaamilu ataatsimeeqateqarnikkut ingerlaqqissaaq.
Kalaallit Nunaata piumasaqaatai aallaavigalugit kiisalu pinngortitamut, piorsarsimassusermut najukkamilu ataatsimoornerit ataqqillugit takornariaqarnerup qanoq ineriartortinnissaa iluseqassanersoq oqallinnerni innuttaasut, najukkami suliniartut, ornigassat takornariaqarnikkullu inuussutissarsiuteqartut Nunarput Nuannip ataatsimoortippai.
Oqaloqatigiinnerit tulliuttut Tasiilami ingerlanneqassapput, tassani innuttaasunik assigiinngitsunik ataatsimeeqateqartoqassalluni. Tamatumunngalu ilutigitillugu Tasiilap katersortarfiani sisamanngorneq ulloq 25. maaji 2026 nal. 19.00-mit 21.00-mut ingerlanneqartussamut, Tasiilami innuttaasunut tamanut ammasumik oqaloqatigiisitsilluni ataatsimiisitsinissamut Visit Greenland qaaqqusivoq.
“Suliniummi alapernaatsumik periuseqartoqassaaq, oqaloqatigiinnerillu ineriartortinneqarnissaat siunertarineqassalluni. Inuiaqatigiinni oqallinnerit pisariaqartut atorluarsinnaasullu siunissami pikkoriffiginerulernissaat paasisimasaqarnerulernitsigut anguneqassasut kissaatigaarput. Maannamut misilittakkat tigussaasut amerlasuut katersorneqarsimalerput, ukioq mannalu katersineq ingerlateqqinneqassaaq,” Visit Greenlandip pisortaa Anne Nivika Grødem oqarpoq.
Najukkami oqaloqatigiinnerniit ataatsimoortumik oqaloqatigiinnissamut periusissamut
Inuiaqatigiinni takornariaqarnerup ineriartornerata oqaloqatigiissutiginissaa, kiisalu siunissami oqaloqatigiinnissamut periusissiamik nalinginnaasumik atorneqarsinnaasumik ineriartortitsinissap pilersinneqarnissaa qulakkeerneqarnissaalu Nunarput Nuannip siunertaraa. Tamatumalu saniatigut innuttaasunit takornariaqarnerup ineriartornerani naleqartitassatut tunngavigineqartussatut isumaqarfigineqartut suussusersiniarneqarnissaat aamma siunertarineqarpoq. Pinngortitarput, piorsarsimassuserput, ulluinnagut ataatsimoorfigullu takornariaqarnerup sunnertarpai. Taamaammat najugaqavissut qanimut peqatigeqqissaarlugit ineriartortinneqartussaavoq.
Suliniummi nuna tamakkerlugu kommunit tamaasa tikeraarneqassapput, tamannalu 2026-ip ukiaani piviusunngortinneqassasoq anguniagaavoq. Nuna tamakkerlugu DMO-t (Destination Management Organization) kiisalu takornariaqarnikkut suliffeqarfiit ilai suliniutip aallartinneraniilli peqataasimapput, ataavartumillu paasisanik pingaaruteqarluartunik tunniussuisuullutik.
Visit Greenlandip Kalaallit Nunaanni oqaloqatigiinnermi atorsinnaasoq oqaloqatigiinnissamut periusissiaq, pilersaarutit naapertorlugit ukiup naalernerani suliarissavaa. Najukkami inuiaqatigiit akornanni innuttaasut naleqquttumik isumalimmillu akuutinneqarnissaat oqaloqatigiinnermi periusissiassap qulakkiissavaa.
Oqaloqatigiinnermi peqataareersimasunut tamanut qujanaq. Innuttaasut amerlanerit naapinnissaat qilanaaraarput.
Paasissutissat Nunarput Nuan pillugu
Nunarput Nuan suliniutaavoq EU-mit aningaasaliissutinit Grønlandsbankennillu Inuussutissarsiornermut aningaasaateqarfianit aningaasalersorneqartoq.
Kalaallit Nunaanni takornariaqarnerup ineriartornera pillugu oqaloqatigiinnerit nukittorsarneqarnissaat innuttaasullu misigisaasa, isiginnittaasaasa isumassarsiaasalu siunissami takornariaqarnerup ineriartortinneqarnissaanut ilaatinneqarnissaat suliniummi siunertaavoq.
Oqaloqatigiilluni ataatsimiisitsinerit Visit Greenland suleqatigalugu Pikialamit ingerlanneqartarput.
Continues further down the page...
