Illoqarfittut imaluunniit nunaqarfittut takornarissat qanoq tikilluaqqunissaat najoqqutassiussallugu amerlasuunik pitsaasunik patsisissaqarpoq. Tikeraartussat sunik siumut nalunngisaqariissanersut eqqartussallugu najukkamut iluanaarutissanik pilersitsisarpoq, aamma tikeraat qanoq tikilluaqqunissaannut.
Community Guidelines nassuiarpaat tikeraatut inunnut, kulturinut aamma najukkami inuiaqatigiinnut pullavik pitsaanerpaaq qanoq anguneqarsinnaanersoq. Taamaalilluni najukkami misigisassaq ersarinnerulersinneqarsinnaavoq sunniuteqarlunnerillu millisinneqarsinnaallutik.
Najukkami najoqqutassat aamma najukkami inuiaqatigiinnut iluaqutaassapput, tassa suliarineranni najukkami takornariaqarnikkut periarfissat unammillernartullu eqqartornissaat periarfissinneqassammat. Kalaallit Nunaanni Community Guidelinesinik najukkani suliaqarnerup qanoq ingerlanneqartarneranut assersuutissaqarpoq pitsaasunik arlalinnik.
Continues further down the page...
Sermersooq Business Councilimi nunap immikkoortuanut tassunga Community Guidelines suliaralugit aallartinneqarsimapput. Colourful Nuuk’p kommunemi tamarmi takornariaqarnermut attaveqarfiusut katersorsimavai nunap immikkoortuanut najoqqutassat qanoq iluseqarsinnaanersut oqallisigitinniarlugu.
”Nunap immikkoortuani tamaani tikeraartut sapinngisaq tamaaat naapertorlugu pitsaanerpaamik misigisaqartinnissaat annertuumik soqutigineqarpoq. Community Guidelines ilusilersornissaat ataatsimoorluta pigutsigit ataatsimoorluta ilimagisat taakkua sulinitsigut qanillattorsinnaavagut”,
Colourful Nuuk’mi suliniummik siuttuunerusoq Salik Hard oqarpoq.
Visit Greenlandip Nuummi attaveqarfiusut ataatsimiinnerannit inernerit takunissaat qilanaarivaa, neriullunilu illoqarfiit nunaqarfiillu amerlanerit assersuutit uku maligassiuinerannut malinnaajumaartut najoqqutassanillu suliaqarumaartut tikeraanut najukkamilu inuiaqatigiinnut iluaqutaasussanik.
Najoqqutassat ilusilersornissaannut tunngasumik, ”ornitassat” kiisalu najugaq pillugu kalerriutissat qinertareerlugit, ajunngitsumik eqqartuereerlutik oktober 2018-imi Sisimiut Community Guidelines’issani saqqummiuppaa. 2019-imilu aasaanerani sakkup taassumap tigussaasup sunniutai pitsaasut malunnarsereerlutik.
”Community guidelines’iutigut takornarissat illoqarfitsinni siammarnerusalernerannut iluaqutaapput. Pisiniarfiutillit arlaqartut oqaluttuuppaatigut aasaanerani isertartut amerliartorsimasut,”
Jesper Schrøder oqarpoq, Arctic Circle Businessimi Destination Manageritut atorfeqartoq.
”Sakkuuvoq atorneqartoq nuannaarutigalugulu tiguneqartartoq, taamaattumillu taamatut ingerlaneq Kangerlussuarmi Maniitsumilu nanginniarparput taakkunani aallartitsinissamut assut qiimmatsanneqarmat,”
Jesper Schrøder nuannaarluni naggasiivoq.
Taamaammat suliamut tassunga illoqarfiit nunaqarfiillu namminneq siumut qanoq iliornissamut pimoorussinerat attaveqaqatigiinnikkut unammillernarsinnaasunik millisaaqataasinnaapput taamalu najukkamiittunut aammalumi tikeraartunut misigisat ajunngitsut amerlanerulersissinnaallugit.
Taamatuttaaq aamma Arctic Circle Businessip isertuutinngilaa najoqqutassat uku pillugit AECO-mik qanimut suleqateqarneq Destination Arctic Circlemi tamarmi umiarsuarnut takornariartaatinut ilisimasassarsiortitsisunut ornittakkatut siuariartorusunnermik tunngaveqartoq, umiarsuit taamaattut ima angissuseqarmata najukkani kingunerlutsitsinerit annertunerujussuarmik pinaveersaarnerutissinnaallugit.
