Kalaallit Nunaanni innuttaasut takornariat pillugit akuersaanerulersimapput. Tamanna Visit Greenlandip nalunaarusiaani ersersinneqarpoq. Nalunaarusiaq apersuinerit marluk tunngavigalugit sanaajuvoq; siulleq november 2019-imi ingerlanneqartoq aappaalu februar 2021-mi. Apersuinerit illoqarfinni nunaqarfinnilu takornariarfigineqarnerusartuni ingerlanneqarsimapput.
Nalunaarusiami atuarneqarsinnaasut ilagaat novemberimi 2019-mi apersorneqartut 91,5%-ii takornariat illoqarfimminnut / nunaqarfimminnut tikittartut pillugit ‘ajunngitsumik’ imaluunniit ‘annerusumik ajunngitsumik’ isummersimasut. Tassani akissutit “naluara” aamma “isumaqataanangalu isumaqataavunga” ilanngunneqanngillat. Februarimi 2021-mi kisitsi taanna 93,4%-miilersimavoq. Visit Greenlandimi pisortaagallartoq Mads Skifte isumaqarpoq takornarianut pitsaanerusumik isiginnittariaaseq COVID-19-mit tunngaveqartoq.
”Nalinginnaasumik kalaallit takornarianik nuannarisaqartuupput – tamanna COVID-19- eqanngitsorli maluginiarsimavarput. Maanna ukioq ataasersuaq takornariaqanngitsillugu malunnarpoq tikeraartorisartakkagut qanoq annertutigisumik najugaqartunut sunniuteqaqataasarnersut. Taamaattumik takornariat uternissaat innuttaasut akuersaarpaat, tamanna tikeraanut innuttaasunullu naammaginartumik ingerlanneqassappat,” Mads oqarpoq.
Continues further down the page...
Naak Kalaallit Nunaat suli takornarianut avataaneersunut matoqqagaluartoq, COVID-19- eqarnerani killilersuinerit maannakkut atorneqartut, apersorneqartunit tutsuiginartinneqarput. Nalunaarusiami aamma takuneqarsinnaavoq takornariat killilersuinermi malittarisassanik ataqqinninnissaat tatigineqartoq.
Amerlanerussuteqartut, tassa 55,3%-it takornarianik tikilluaqqusipput, takornariat tikinnginnerminni misiliummik tigusiffigineqassappata, ullut tallimat mattusimassappata kingornalu misiliummik tigusiffigineqaqqillutik. 19%-it taamaallaat akisimapput takornarianik tikittoqarnissaa kissaatiginngilluinnarlugu. 62,9%-it akisimapput takornariat killilersuinernik ataqqinninnissaat upperalugu.
Takornariat pissusaat isiginiassagaanni, apersorneqartuni amerlanerussuteqartut annerusumik isumaqarput, takornariat pissuserissaartartut. Apeqqummut nunakkut takornariartartut – ima paasillugu takornariat umiarsuarmik takornariartuunngitsut – ataqqinnittumik innuttaasunut piorsarsimassutsimullu tunngatillugu pissuseqartarnersut, 2021-mi 74%-ii akisimapput ”aap” – tamakkiisumik imaluunniit ”ilaatigut”. Tamanna 2019- mit 3%-mik qaffariarsimavoq.
2021-mi apersorneqartut 71,1%-ii aamma isumaqarput umiarsuarmik takornariartartut inuiaqatigiinnut pitsaasumik sinniuteqartartut, tamanna 11,5%-mik qaffariarsimavoq.
”Kisitsisit takutippaat innuttaasut takornariallu akornanni pissutsit pitsaasuusut – tamanna soorunami assut nuannaarutigaarput. Inuiaqatigiinnut tunngatillugu piujuartitsisumik – nuna tamakkerlugu aamma nunap immikkoortuini takornariarfiusartuni – suliniuteqarnerup iluatsilluarsimaneranik uppernarsaavoq,” Mads Skifte nassuiaavoq.
Paasisaqarnerorusukkuit attavigitigut:
Mads Skifte
Mobil: 55 82 78
Email: mads@visitgreenland.com
Mads Lumholt
Mobil: +45 31 22 11 71
Email: lumholt@visitgreenland.com
