Umiarsuarnik takornarialerisut ilisimasanik paarlaasseqatigiinnissamut suleqatigiinnermillu nukittorsaanissamut naapeqatigiissapput

Umiarsuatigut takornariarfissap aallartinnginnerani, Kalaallit Nunaanni umiarsuarnik takornarialerisut sap. ak. manna Cruise Forum 2024-mik taallugu, Visit Greenlandip aaqqissuussaani naapeqatigiissapput. Anguniarneqarpoq nunatsinni takornarialerisut suleqatigiinnerannik nukittorsaanissaq.

TUSAGASSIUUTINUT NALUNAARUT

Nuuk ulloq. 19. februaari 2024

Maajimi 2023-mi Visit Greenlandip nalunaarutigaa, takornarialerisut, oqartussat takornariaqarnermilu siunnersuisoqatigiit peqatigalugit Kalaallit Nunaanni umiarsuarnik takornariaqarnermik misissuisoqassasoq. Misissuititsinerup inernerisa ilagaat takornarialerisuniit innersuutit, taassumalu ataani annermik oqallinnernik attaveqaasiornernillu kissaatit. Cruise Forum 2024 tassaavoq takornarialersut kissaataanik piviusunngortitsineq.

“Kalaallit Nunaat tikikkuminarneruleriartorpoq, tikeraallu amerlanerunissaat naatsorsuutaavoq, apeqqutaanani timmisartukkuunersoq umiarsuatigulluunniit. Piffissami kingullermi umiarsuarnik takornariafiunerusartumi tulattut rekoortiliillutik amerlanerusimapput, tamannalu inuussutissarsiortunut nuannaartitsivoq innuttaasunulli ernumasitsilluni. Ineriartorneq piujuartinniarlugu pingaaruteqarluinnarpoq kiap suut akisussaaffiginerai paasissallugit, saniatigullu suleqatigiilluarneq, aammalu unammillernartunik ilippanartunillu suliaqarneq ineriartornermut ilaasinnaasut aqussinnaanissai pingaaruteqarpoq,” Anne Nivíka Grødem, Visit Greenlandimi pisortaq nassuiaavoq.

Cruise Forum 2024 takornarialerisunik ataatsimoortitsinerulerusuppoq, ineriartortitsisumillu oqallinnermik, ilisimasanik avitseqatigiiffiusumik aammalu akimortumik suleqatigiinnermik pilersitsifiusumik. Ataatsimiinneq inuussutissarsiorlutik umiarsuakkut takornarialerisunut pingaarnertut aaqqissuussaavoq, oqartussaniillu, sumiiffinni takornariaqarnermi siunnersuisoqatigiit aammalu inuussutissarsiortuniit allaniit peqataaffigineqassalluni. Anguniagaavoq takornarialerisut akisussaaffiinik-, kiisalu unammillernartunik ataatsimoorluta aaqqitassatsinnik nassuiaasersuinissaq.

Ataatsimiinnermi siunertarisaq peqataatitsisumik, ilisimasanik aammalu misilittakkanik avitseqatigiiffiusinnaasunngorlugu ilusilersugaanikuuvoq.
Visit Greenlandip kissaatigaa peqataanissamut nalunaarsimasut 90-t missaanniittut oqallinnernik kiisalu oqallinnermikkut eqqarsaqatigiinnertigullu pisuunnguallatsitsissasut.

Cruise Forumimiit paasisat inernerillu tamarmik suliassanngortinneqassapput, takornariartitsinermut immikkoortumik pilersaarusiamut nutaamut ilanngunneqarnissaannut eqqarsaatigineqassallutillu. Taamaattumik ataatsimiinneq inuussutissarsiortunut, ineriartornermut sunneeqataanissannut periarfissiilluarpoq.