24. marts 2025
Visit Greenland Kalaallit Nunaanni takornarialerisunut ataatsimiisitaliatut suleqatigiinnerit, ilisimasanik avitseqatigiittarnerup siuarsarneqarnissaa aamma suliffeqarfiit imminnut ataqatigiinnerisa nukittorsarneqarnissai pillugt aaqqissuussinerni akisussaaffilimmik ineriartortitsinissamut inissisimavoq. Nunatsinni takornarialerisut oqaloqatigisarnerini inuiaqatigiinnilu isummanik tusarniaasarnerni Visit Greenland suliffeqarfiutilinnut inuiaqatigiinnullu takornariaqartitsinermi ineriartorneq pillugu isummanik naleqarluartunik katersisarpoq. Tamakkua ilisimasat umiarsuit takornariartaatilerisut oqaloqatiginerini ammasumik oqaloqatigiinnerni pissarsiaqartarput, tassani ataatsimoorluta, inuussutissarsiuteqartunut inuiaqatigiinnullu iluaqutaasussanik, aaqqiissutissanik nassaarniarluta oqaloqatigiinneq ingerlanneqartarluni.
Suleqatigiinneq ukioq kingulleq Cruise Forum-imi pingaaruteqartoq ersarissarneqarpoq, tassani peqataasut amerlasuut nukittorsarnissaannut oqaluusererusullugu kissaatigimmassuk. Kissaatigineqartorlu malillugu Cruise Forum 2025-mut pilersaarut ilisimasanik avitseqatiginnikkut peqataanerusumik oqaloqatigiilluni suleqatigiinneq ineriartortinniarlugu aaqqissuisoqarluni. Suleqatigiinneq aamma suliffeqarfiup nammineq naleqartitaaniippoq neriorsuut – pitsaanerusumik takornariaqartitsinissamut neriorsuut.
Cruise Forum 2025 suliffeqarfiit katersornissaannut aamma suliffeqarfiit siunissaat pillugu oqaloqatiginerinissaannik aaqqissuussaq siunertaqarpoq. Ataatsimiinnermi pingaarnertut inuussutissarsiuutigalugu suliffeqarfiutilinnut tunngasut sammineqarput, taakkununngalu suliaqartut pisortaqarfinniillu sinniisut kommunini inuussutissaqarnermi ataatsimiisitaliat takornariaqartitsinermilu suliaqartut ataatsimiinnermi peqataatinneqarlutik. Ataatsimiinnermi suliffeqarfiit suliassai akisussaaffiilu, kiisalu unamminartunik suussusersinissaq pillugit ataatsimut paaseqatigiilersinnaanissaq siunertaavoq, taakkuninngalu ataatsimoorluni aaqqiiniaqatigiittarnissaq pitsaanerpaalluni.
“Kalaallit Nunaata tikinneqarsinnaanera ajornannginnerulerattuinnarpoq, tikeraartullu amerliartorlutik, timmisartukkut umiarsuakkullu. Umiarsuit takornariartaatsit tikerarneranni kingullermi oqaluttuarisaanermi taamak amerlatigisut aatsaat tikissimapput, tamannalu inuussutissarsiuuteqartunut inuiaqatigiinnullu nuannaarutaallunilu ernumatitsilersimavoq. Akisussaaffilimmik siuarsaanissaq qulakkeerumallugu pingaaruteqarpoq, ataatsimoorluta akisussaaffigut paasissagigut, suleqatigiilluarlutalu siuarsaanerup malitsigisaanit periarfissat unammillernartullu suliarissallutigit,” Anne Nivíka Grødem, Visit Greenland-imi pisortaq oqarpoq.
Visit Greenland-ip 60-it peqataasussatut nalunaaruteqarnikut tikilluaqqussallugit qilanaarpoq, taakkua oqallinnernut iluaqutaasussanut aamma suliffeqarfiit akimorlugit suleqatigiinnerup nukittorsarnissaannut taperseeqataassapput. Ataatsimoorluta paaseqatigiinnissaq suleqatigiinnerulernissarlu siunertaapput, tassani inuussutissarsiuuteqartunut tapersiisumik aamma Kalaallit Nunaata pinngortitaanut piorsarsimassusaanullu ataqqinnittumik periuseqarluta umiarsuarnik takornariartaatilinnut suliaqarneq siuarsarneqarsinnaalersitsisumik.
Naatsorsueqqissaartarfimmiit umiarsuit takornariartaatsini ilaasut 2023-mi 76.477-inik amerlassuseqarsimasut kisitsisit kingulliit takutippaat, 2024-mi 95.185-inut amerleriarsimapput. Tamanna ilaasunik 18.708 amerleriaateqarluni, procentinngorlugu 24,5 % missaanni amerleriaateqarsimallutik.
ULLOQ SUMIIFFILLU:
Cruise Forum ulloq 25. marsi 2025-mi nal. 8:30-17:00 Ilulissani Hotel Arctic-imi ingerlanneqassaaq.
Tusagassiortut ullup ingerlanerani alakkaanissaminnut tikilluaqqusaapput.
Continues further down the page...
