Pinngortitaq alutornartorsuaq Russell Gletsjerilu naalannartoq Augustimi, Kangerlussuarmi Extreme E-toqarnissanut tunuliaqutaassapput. Extreme E Formula 1-imut eqqaanarsinnaavoq, piujuartitsinermilli aallutaqarnerulluni. Extreme E tassaavoq nunarsuaq tamakkerlugu biilinik innaallagiatortunik, Formula 1-ertartunit aqunneqartunik naapeqatigiiffik, nunani tamalaani silap pissusaata allanngoriartorneranik kiisalu piujuartitsinermik sianigilersitsinissamik ukkataqartoq. Sap. ak. ataatsip ingerlanerani Kangerlussuaq Kalaallillu Nunaat pisumik annertoqisumik nunanilu tamalaani tusagassiutinit assorsuaq soqutigineqartumik naapiffiussaaq. Ilaatigut naatsorsuutigineqarpoq pisoq videokkut 26 mio-riarluni isiginnaarneqarumaartoq. Tassa ukioq manna ”Golden Globe”-qarneraniit pingasoriaammik amerlanerusunit isiginnaarneqassaaq. Pilerisaarinermut periarfissat pisussap pilersitai Kalaallit Nunaata oqaluttuarfisaanerani siornatigut takuneqarsimanngillat.
Taamaattumik Visit Greenland Destination Arctic Circle suleqatigalugu Kalaallit Nunaannit pisumi ingerlatitseqqiisutut juli 2020-miilli suliniuteqalersimapput.
”Tusagassiuutit nunani tamalaaneersut Kangerlussuarmukassamaarput pisumit ilanngutassiiartorlutik. Tamanna tusagassiuutilerisunik nunani tamalaaneersunik, Kalaallillu Nunaanni periarfissat pillugit, nunanut allanut maannakkut siunissamilu nalunaaruteqarusuttunik, attaveqarnerup nukittorsarnissaanut periarfissanik tunisivoq.” Hjortur Smarason, Visit Greenlandimi pisortaq oqarpoq.
Visit Greenland Destination Arctic Circleilu suleqatigiillutik Kangerlussuaq Kalaallillu Nunaat, nunatut piujuartitsisutut, misigisassarsiorfigalugu takornariarfissatut pitsavittut, ilisimatusarfigalugu takornariarfissatut kiisalu teknologiikkut aqqutissiuisunut ineriartortitsisunullu naapiffittut nunarsuarmi ilisimaneqalernissaannut, suliniut Extreme E aqqutigalugu aallarnisarpaat.
Tamanna suliaq Arctic Circle Businessip Visit Greenlandillu kanaliinut ilanngutassanik tiguartinnartunik suliaqarnikkut, kiisalu nunarsuarmi tusagassiuutit annersaannik siunnersuinikkut pilerisaarutinillu atugassiinikkut ingerlanneqassaaq.
Kangerlussuaq ukiuni amerlasuuni ilisimatusarnermi ornitassatut inissisimasimavoq, assersuutigalugu silap pissusaata allanngoriartorneranut tunngatillugu. Saniatigut aamma sermersuaq biileernianit biilinut misileraaffittut ukiut ingerlanerini atorneqartarsimavoq. Extreme E aqqutigalugu tamakkuninnga oqaluttuarnikkut neriuutigineqarpoq, ilisimatusartunik aningaasaliisartunillu, teknologiinik nutaanik piujuartitsineq ukkataralugu misileraanissaminnut soqutiginnittunik, nunatsinnut kajungilersitsinissaq.
Saniatigut aamma Kangerlussuup pinngortitamigut pilerinassusaa misigisassarsiorfigalugu takornariaqarnermut – nunarsuaq tamakkerlugu 586 milliard dollarsinik kaaviaartitsisumut tulluartuuvoq. Tamanna Visit Greenlandip Destination Arctic Circlelillu annertuumik ukkataraat. Pisup Kalaallit Nunaata takornariaqarnikkut ilisarnaataanik kimittunerusumik pilersitseqataasussaavoq takornarianillu amerlanerusunik kajumilersitsissalluni.
”Pisup pilerisaarinerullu Kalaallit Nunaannut pitsaanerpaamik kinguneqartinnissaa assut pingaartipparput. Taamaattumik takornatialerisut suliffeqarfiillu Kalaallit Nunaanneersut oqaluttuarnitsinni atorpagut. ” Jesper Schrøder, Arctic Circle Businessimi pisortaq oqarpoq.
Pisoq annertooq iluatsilluartorlu Kalaallit Nunaata siunissami assigisaanik pisoqartitsisinnaaneranik takutitsisussaavoq siunissamilu aningaasaliisartunik, tikeraanik Kalaallillu Nunaanni sutigut tamatigut ineriartortitsinermik pilersitseqataassalluni.
Paasisaqarnerorusukkuit uku attavigisinnaavatit:
Jesper Schrøder – for general inquiries
Director – Destination Arctic Circle
Phone: +299 86 35 00
Email: [email protected]
Hjörtur Smarason
Pisortaane – Visit Greenland
Mobil: +45 22 80 14 16 / +299 27 99 98
Email: [email protected]
Continues further down the page...
