Greenland Tourism Awards 2025-mik nersornaaserneqartoq tassaavoq… Raw Arctic!

Raw Artic Aps-mik pilersitsisut nunatsinni takornariaqarnermut piffissap sivikitsup ingerlanerani aqqutissiuusseqataasumik suliffeqarfiliorput. Nunatsinni takornariaqarnerup akisussaassuseqartumik ingerlanneqarnissaanik tunngavileeqataalluarput, piujuartitsinermik aamma piorsarsimassutitsinnik kiisalu uppernassuseqarluartumik misigisassarsiortitsinissaminnik ukkatarinnittumik tunngavileeqataalluarlutik.

Nersornaasiissutigineqartartoq Greenland Toursim Awards nersornaasissutigineqartarpoq, suliffeqarfimmut isumannaatsunik, pitsaassuseqarluartunik, avatangiisinut, nutaaliornissamut kiisalu inuiaqatigiit akornanni  ineriartortitseqataalluartunik neqeroorusiorsinnaassuseqartumut. 

Nersornaat Visit Greenlandip aamma Air Greenlandip suleqatigiinnerisigut ukiumoortumik nersornaasiissutigineqartarpoq. Nersornaasiisarnerup siunertaraa, takornarialerisut takornarialerinerminni akisussaassuseqarluartumik aammalu nunatsinni uppernassuseqarluartumik misigisassarsiortitsinissaminnik suleqataalluarnerinik pilersitseqataanerinillu tapersersorneqarnissaat. Takornarianut iluaqutaalersitsisussanik aamma suliffeqarfiit akimorlugit isumassarsiorfigeqatigiilernissaannik suleqataaneri kiisalu nunatsinnut iluaqutaasussanik tunngaviileqataaneri tapersersorneqarneranik takussutissiinissaq siunertaalluni. 

Innuttaasut, takornarissat aamma suleqataasut allat nunatsinni suliffeqarfinnik takornarialerisunik ukioq manna nersornaaserneqartussanik innersuusseqataapput. Innersuunneqartut taassumalu saniatigut nersornaaserneqarsinnaanissamut piumasaqaatit najoqqutaralugit Raw Arcticip ukioq manna Greenland Tourism Award 2025-mik nersornaaserneqarnissaa naliliisartunit aalajangiunneqarpoq. 

Raw Arctic pillugu
Raw Arctic qaammatit 15-iinnaat matuma siorna pilersinneqarpoq. Taamaakkaluartorli pilersitsisut pingasut tassaasut Rasmus Brandt, Isak Brandt Hansen aamma Casper Frank Møller anguniagartik piviusunngortinniarlugu piffissami sivisuumi suliniuteqarput: pinngortitap aamma piorsarsimasutsitta ataqqineqarluartumik misigisassarfiulernissaa – piujuartitsineq qitiusumik naleqartitaralugu.

Tamanna iluatsilluarpoq, soorlu niviugaasalerluni qissassinissamik, arfernik takornariartitsinissamik, piniartitsinissamik, arsarnerinik misigisassarsiortitsinissamut, inuilaarsuarmiisitsinissamut kiisalu atuisunut tulluarsakkanik pilersaarusiorluni angallassisinnaanissamik neqerooruteqartitsinikkut – qanilaarnermik aamma pitsaassusermik ukkatarinnittumik. “Catch-and-release”-mik taallugu aalisarnerit, seqerngup nukinganik ingerlataqartumik unnuisitsinerit, aamma silaannaap pissusaata allanngoriartornera malillugu atorfinititsinerit, sulisunik pikkorissaasarnerit ingerlanneqartarnerinik takornarissanut paasissutissiissutigisarpaat. Tamanna takornarissat takornarialerisullu iluminni piviusorsiorpalaartumik naapeqatigiissinnaalernerannik kinguneqartarpoq, pinngortitaq piorsarsimassuserlu qitiutillugu. 

Taakku saniatigut suliffeqarfiup unnuisarfiit assigiinngitsut takornarialerisullu allat suleqatigisarpai, ataatsimoornikkut nunatsinni takornariaqarneq kivinneqarnissaa anguniarlugu suleqateqartarlutik. Digitali atorlugu oqaluttuallaqqissusiminnik neqeroorutertik kisiisa pillugit nittarsaassisanngillat, nunattami tikinneqarnissaanut soqutiginninnerusoqalernissaa anguniarlugu aamma nittarsaassisarput. Taamaaliornikkut takornariaqarnerup silarsuaani suliaqartunut allanut nutaaliornissamut aamma akisussaassuseqarnissamut isumassarsititsisarput.  

Innersuunneqartut allat
Suliffeqarfinni innersuunneqartuni aqqaneq-marluusuni pingasut aalajangiisussanut inissinneqarput, taakku naliliisartunit Visit Greenlandimit, Air Greenland Groupimit aamma NALIK Venturesimit innersuunneqartuullutik. Raw Arctic saniatigut innersuunneqartut allat tassaapput:  

• Authentic Greenland – isumannaatsumik aamma tamakkiisumik ilisimatitsinikkut misigisassarsiortitsisartutut ilisimaneqarpoq, takornarissanik qimusserluni sermersualiaassisarnera, qamuteralaat atorlugit angallassisarnera, nunatsinneersunik pissarititaasunik nerisaqartitsinikkut aammattaaq kalaallit piorsarsimassusaannik paasissutissiisarnera ilisimaneqaatigalugu
• Diskobay Tours – qimminik qimuttunik ileqqutoqqanik aallussisut, pinngortitamut ataqqinnillutik ileqqutoqqanik najoqqutaqartumik inooriaatsip attatiinnarneqarnissaannik pingaartitsisut, kiisalu inoqarfinnik ineriartortitseqataasut

Taakku Raw Arcticituulli nunatsinni takornariaqarnermi ineriartortitsilluaqataapput. Qujaffigaagut, takornariaqarnermullu tunngatillugu suliaqartut allat takornariaqarnerup akisussaassuseqarluartuunissaanut suliniuteqartut qujaffigalugit.    

Raw Arcticip Greenland Tourism Award 2025-mut nersornaaserneqarneranut pilluaqqusivugut. Nersornaaserneqarnerisa saniatigut tammajuitsussarsipput eqqumiitsuliortup Kim Kleist Eriksenimit ilusilersorneqartumit aamma Air Greenlandimit angalanissamut gavekortinnapput 10.000 koruuninik naleqartumik.