Nunatsinni takornariaqarneq pillugu siunnersuisunit illoqarfinni pingasuusuni – Nuummi, Qaqortumi Ilulissanilu – mittarfissuit atulernerisigut qanoq amerlatigisunik sullissisinnaanissamik misissueqqissaarnernit inernerit saqqummiunneqarput. Misissueqqissaarnerni taakkunani Kalaallit Nunaanni takornariaqarnerup akisussaassuseqartumik paasissutissanillu tunngaveqartumik ineriartortinniarneqarnissaa siunertaavoq.
Ilisimaneqareersutut Atlantikoq qulaallugu timmisartuussisarnissami mittarfissaq Ilulissaniittoq 2026-mi ammarneqassasoq naatsorsuutigineqarpoq, ulluliunneqartussalli Greenland Airportsimit ilisimatitsissutigineqarnissaa suli utaqqineqarluni. Qularutissaanngilaq mittarfittaassap atulerneratigut nunarput tikikkuminarnerulissasoq angallannerillu allanngorumaartut, tamatumalu kingunerisaanik nunatsinnukartartut amerliartuinnartillugit nunatta qanoq amerlatigisunik sullissisinnaaneranut piumasaqaatit apeqqusersorneqalerumaartut.
Anne Nivíka Grødemip, Visit Greenlandimi pisortap, oqaatigaa qanoq amerlatigisunik sullissisinnaanermik misissuineq ataqatigiissarluagaasumik pilersaarusiornissamut takornariallu tikittartut nunamut tamarmut siaruarlutik takornariartarsinnaanissaannut iluaqutissiiumaartoq, taamaalillutik nunatsinni sumiikkaluartulluunniit takornariaqarnerup ineriartornera atorluassammassuk. Ilanngullugu erseqqissaatigaa takornariaqarnermik ineriartortitsinissami akisussaassuseqarneq qanorlu amerlatigisunik sullissisinnaanerup eqqarsaatigineqartuarnissaa pisariaqartuusut, taamaasiornikkut takornariat ornigassallu pisariaqartitaat imminnut naapertuutissammata.
2024-mi aasakkut Visit Greenlandip Avannaata Kommunianik takornarialerinermillu inuussutissarsiuteqartunik taavaniittunik siunersiuinermigut sammineqartuni pingaarnerni pingasuni Ilulissani qanoq amerlatigisunik sullissisoqarsinnaanera misissorpaa: Unnuisarfeqarnermi, neriniartarfeqarnermi aamma angallassisarnermi/misigisassarsiortitsisarnermi. Ukiunilu tulliuttuni tallimani unnuiffissarsiortartussat qanoq amerlassuseqarnissaannik missingiussiniarnermi ineriartorfissatut ilimagineqartut pingasut najoqqutarineqarput (tikeraat annikitsumik, akunnattumik annertuumillu amerleriarnissat najoqqutarineqarlutik).
“Maanna qanoq amerlatigisunik sullissisinnaaneq silatusaartumik atorneqaqqullugu tamannalu naleqqunnerpaamik ineriartortinneqaqqullugu paasissutissanik tunngavissiinissaq siunertaavoq. Tamatuma saniatigut Kalaallit Nunaanni qanoq amerlatigisunik sullissisinnaanerup tamakkiisup takornariallu qanoq amerleriaateqarsimasut sullinneqarsinnaanerisa paasissutissiarineqarnissaat siunertaavoq. Pingaartitarpullu tassaavoq ukiup qanoq ilinerisa tamarmik angallaviunissaat atorluarneqarnissaallu.” Taakkualu saniatigut erseqqissaatigaa inuussutissarsiuteqartut tassaasut takornarialerinermik ineriartortitsisut. Aamma ukiuni makkunani qanoq amerlatigisunik sullissisinnaanerup qaammammit qaammammut qanoq ineriartortittuarneqarnera ajasoorutiginerpaa.
Misissueqqissaarnermit takutinneqarpoq Ilulissani mittarfissaq 2026-mi ammarpat nunanit tamalaanit illoqarfimmut tikittartut amerleriangaatsiassasut. Imalu amerlitigissapput nunap immikkoortuani tamarmi naleqqussaasoqartariaqassalluni, pingaartumik unnuisarfeqarnikkut neriniartarfeqarnikkullu.
Misissueqqissaarnermit siullertut takutinneqarpoq neriniartarfiit ulikkaarsimasartorujussuanngussasut, inuussutissarsiuteqartullu nunaminertanik sulisussanillu pissarsiniartarnertik ullumikkut ajornartorsiutigisaraat. Aappaattullu takutinneqarpoq unnuisarfeqarneq neriniartarfeqarnerlu eqqarsaatigalugit suli aningaasaliisoqartariaqartoq. Inerniliunneqartorlu tassaavoq unnuisarfiit neriniartarfiillu maannangaaq amerliniarneqartariaqartut, sulisussallu amigaataalissanngippata sulisussaqarnissaq qulakkeerneqartariaqartoq.
Ilulissani qanoq amerlatigisunik sullissisinnaanermik misissueqqissaarnermit inernerit uaniipput: https://tourismstat.gl/analyses/
Continues further down the page...
