Akureyrimi Islandimiittumi Nunani Avannarlerni angalanermik nittarsaassinerit annersaat, Vestnorden, ukiunik 40-nngortorsiortoq nalliuttorsiutigineqaqqammerpoq. Nunatsinnilu takornariaqarnikkut suliffeqarfiit 36-t tungaanut amerlassusillit, Kalaallit Nunatsinni nunallu tamalaat akornanni, suleqateqarnerminnik siuarsaaniarlutik niuernikkullu atassuteqaqatiminnik nukittorsaasimallutik peqataapput.
Savalimmiut, Island aammalu Kalaallit Nunaata akornanni, nunani avannarlerni killerni takornarialerinikkut kattuffimmit NATA – North Atlantic Tourism Association-imit angalanermik nittarsaassineq aaqqissuunneqarpoq. Ukioq manna Island nittarsaassinermi aaqqissuisuuvoq, uanilu sapaatip akunnerata aallartinnerani nunat avannarliit killiani takornarialerisut suliffeqarfimmiit suliffeqarfimmut tunaartaqarluni naapinnerit (B2B), nioqqutissaatinik saqqummiussinerit attaveqarfinnillu oqaloqateqarneq sammillugit nunarsuarmit tamarmeersut angalatitsinermik ingerlatsisut naapissavaat.
Nunatsinni takornariaqarnermi sammivik ataatsimoorfiusoq
Ataasinngornermilu unnukkut aaqqissuussap saniatigut, ileqquusoq malillugu Visit Greenlandip aaqqissortakkaminut kalaallit takornarialerisut qaaqqunikuuai. Aaqqissuinerlu toqqaannartumik nittartakkatigut aallakaatinneqarluni malinnaaffigineqarsinnaasimavoq, taamaalilluni takornarialerisut takkullutik peqataasinnaanngitsut ungasianiit malinnaasinnaasimallutik. Ataatsimut sammiveqarnerup, ataqatigiissaarinerup tuniniaavinnullu pingaarnernut tuniniaanikkut suliniutit nukittorsarneqarnissaannik ukkataqarnermi aaqqissuussinermut pilersaarut malillugu Visit Greenland, Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen oqalugiarpoq, Air Greenland, Icelandair aamma Greenland Airports saqqummiussillutik.
Naggasiullugu Kalaallit Nunaanni akisussaassuseqartumik takornarialerinerup iluani immikkut suliniuteqarluni takornarialerisumut nersornaasiinermi, Greenland Tourism Award 2025-mi ajugaasoq suaarutigineqarpoq. Visit Greenland Air Greenlandilu suleqatigiillutik nersornaammik tunniussipput. (Tamanna pillugu tusagassiutitigut nalunaarut immikkut ittoq nassiunneqareerpoq.)
Misigisassarsiorluni takornariarfissatut Kalaallit Nunaata nittarsaanneqarnera
Vestnordeni pisortatigoortumik pingasunngormat naammassivoq, Visit Greenlandip Air Greenland suleqatigalugu peqqissaarullugit toqqakkat angalatitsinermik ingerlatsisut, Nuummut Kujataanullu sulinerminnut atatillugu isumassarsiortillugit angalatippaat. Ornitassatut tikitassani tikeqqaarnermi misigisassat siulliit, takornariaqarnikkut nioqqutissiat aammalu najukkami takornarialerisut pillugit angallassinermi peqataasut paasisimasaqalernissaat siunertaralugu, takornarialerinikkut inuussutissarsiuteqartut nunallu immikkoortuani takornarialerinikkut siunnersuisooqatigiit South Greenland qanimut suleqatigalugit angallassinissaq pilersaarusiorneqarpoq. Taamaasiornikkut angallanneqartut pisisartumi ujartugaannut tulluarsaasinnaanngussapput, Kalaallit Nunarpullu sunniuteqarluarnerusumik nittarsaassinnaanngussallugu. Angallassinermi peqataasut pisisartoqarnermikkut tunngavigisaat malillugu toqqagaapput, nunatsinnilu takornarialerisunut taakkulu neqeroorutaannut tulluartuullutik.
Vestnorden pillugu paasissutissat piviusut:
Vestnorden tassaavoq suliffeqarfinniit suliffeqarfinnut (business to business) angalanermik nittarsaassivik, nunani avannaamioqatigiit killiini ornitassanut takornarissanut tulluuttunut pilerisaarinissamik ukkassiviusoq, aammalu piujuartitsilluni ineriartornermut – aningaasaqarnikkut, inuiaqatigiinn avatangiisitigullu pitsaasumik tapersiissuteqarfiusartoq. Tamannalu pillugu angalatitsinermik ingerlatsisut aaqqissuisunit misissorluarneqartarput, naleqquttuunerat qulakkeerniarlugit.
Nittarsaassiviup siunertaraa peqataasunut sinaakkutit eqqortut pilersinnissaat, taamaalillutillu angalatitsiviit nunani tamalaanersut takornarialerisullu Nunanilu Avannarlerni Killerneersut akunnerminni ataatsimeeqatigiinnerit inniminnikkat aqqutigalugit imminnut naapinnissaminnut periarfissinneqarlutik. Ataatsimeeqatigiinnermilu niueqatigiinnernik nutaanik isumaqatigiissusiornert, attaveqaqatigiinnerillu pingaarutillit pilerssinneqartarlutik.
Kattuffik North Atlantic Tourism Association Vestnorden-nittarsaassinermi akisussaasuuvoq, siunertarineqarporlu Nunat Avannarliit Killerni takornartitsisarnermi suleqatigiinnerup siuarsarnissaa. Ingerlanneqartarnera nunamiit nunami nikerartarpoq, 2026-milu Kalaallit Nunatsinni ingerlateqqinneqarumaarluni.
Continues further down the page...
