Ukiuni kingullerni filmiliornikkut saamisaqartunik takornariaqarneq filmiliortartunit tv-kkullu nangeqattaartuliortarnit nunat kusagineqarluartut kusanarluinnartunillu avatangiisillit amerlarnerujartuinnartunik tikinneqartalerput.
Assersuutigalugu taaneqarsinnaapput Savalimmiut Norgellu avannaa kangerluit kusanarluinnartut arsarnerillu peqqutaallutik, taakkuummatami filmiliortartunit, kingornalu taakkua tikissimaneranit, assorsuaq soqutigineqartut. Sumiiffiit tamakkua allaanngilaq postkortit aalasuliarineqarlutillusooq saqqummersinneqartalersut taamaasilluni filmiliornermik nuannarisaqarluinnartunit ornigineqartorujussuanngorlutik kusanassuseq piviusuussuserlu filmini takusimariarlugu namminneerlutik ornikkumalersarlugu.
Filmiliornikkut sammisaqartunik takornariaqarneq taaneqartarpoq takornariaqarnermi saniatigut pingaaruteqartunik isertitsivittut, tassa takornarissat angalasut fimiliorfissaqqissututut isigisatik sumiiffinnut tikittarpaat namminneq filmimi imaluunniit tv-kkut nangeqattaartuliarineqarsimasuni takusimasatik takujumallugit angalasut. Nunat tamalaat akornanni taamatut takornariaqarnikkut misilittagaqarsimasut misigisimavaat nuna sumiiffiik pineqartoq pillugu annerusumik eqqummaariffiginninnerlutillu naleqarnerusutut isiginnittariaaseqalersimasartut, minnerunngitsumillu sumiiiffimmut aningaasatigut annerusumik iluaquteqarnera takusinnaalersimallugu. Angallannikkut pitsaasumik ataqatigiissarneqarnikkut nittarsaassinikkullu sumiiffiup kusanartup ataatsip filmimi nuannarineqarluartumi takutinneqarnerata kingunerisaanik takornarissanit allanit misigerusunneqarluni sumiiffiik taanna nammineerluni misigiumallugu tikikkumaneqarnerulissaaq.
Kalaallit Nunaat, avatangiisitigut kusanassutsi aammalu kulturikkut pisuussutsi fimiliorfissatsialattut inissisimalluinnarpoq periarfissarissaaqalunilu uanilu periarfissaqarluarpugut Kalaallit Nunarput filmiliorfissatsialattut ornigarneqarnissatut nittarsaassinnaallugu, filmiliorfigineqarsimasut kusanassusaat allanut takuneqarsinnaasutut nittarsaallugit.
Filmiliornikkut sammisaqartunik takornariaqarnerup periarfissiissutai tamakkiisumik piviusunngortinneqassappata aaliangiisuulluinnarpoq sammisatigut arlariitsigut ataqatigiissaakkamik Kalaallit Nunaanni filmiliorfissatsialaaneranik inissisimasanissaq anguniarlugu anguniagaqatigiinnissaq. Periutsikkut isumatusaartumik aningaasaliineq pisariaqarpoq pingaartumik attaveqarnikkut, piviusuuffittut takusassiatut inissisimaffiit piareersimatinnissai aammalu filmiliornermik ingerlataqartut aaqqissuussaasumik suliffeqarfiliarinissai soorlu institutitut aammalu filmiliornermik suliaqartut ataatsimiititaliarsuanik pilersinissaq pisariaqassaaq. Taassuma qulakkiissavaa sumiiffinni ataqqinninneq, avatangiisinut nunanullu mianerinnittumik ingerlatsisoqarneq aammalu piffissaq ungasinnerusoq isigalugu aningaasatigut iluaquteqartoqarnissaanik qulakkeerinninneq.
Nunani tamalaani misilittakkat takutippaat filmiliornikkut sammisaqarnikkut takornariaqarneq ingerlatsisunit amerlasuunit suleqatigiinneq pisariaqartinneqartartoq tamarmillu annertuumik siammasissumillu iluatsittumik filmiliornermik sammisaqartunik takornariaqarnerup annertusiartorneranut angusaqartartut. Soorlu makkunatigut:
Suleqatigiit assigiinngitsut ataatsimut suleqatigiinnerisigut aammalu nunaqavissut peqatigalugit sulinissaq pisariaqarluinnarpoq aatsaat taama isiornikkut piujuartitsinermi tunngaveqartunik takornariaqarneq inerisarneqarsinnaammat taamaasiornikkut piffissaq unaarannguaq kisiat isiginagu kisiannilu siunissamut piffissamut ungasinnerusumik isigisumik ataqqinartumik pisuussutit kulturikkullu nukissat pissarsiffiusumik atorluarumallugit aammalu sumiiffiup ornigarluarneqartumik inissisimanissaa angujumallugu.
Ataqatigiissaarilluarnerup nunaqavissut aammalu soqutigsaqatigiit allat suleqatigiilluarnerat qulakkeerneqassaaq filmiliornerup iluatsittumik naammassinissaannaanik qulakkeerinninnani kisiannili sumiiffiup filmiliornikkut takornariaqarnikkut kivitsisinnaanerup ajornannginnera qulakkiissavaa.
Suleriuseq tamanna aammalu ataqatigiissakkamik sulinissaq maannamut Kalaallit Nunaanni periusiunngilaq naliginnaasoq. Neriuutigaarput takornariaqarnerup iluani atukkatigut nukittorsaanikkut amerlanerusunik periarfissatigut inerisaasinnaaneq aqqutissaassasoq taamaasiornikkullu filmiliornermik ingerlatsisunut sammititamik takornariaqarnerup nunatsinnut tamanit iluaqutissanngortillugu ilapertuutaasinnaasoq annertooq.
Visit Greenland aamma Film.gl immikkut ilisimasavut uani pitsaasumik kinguneqaqqullugu oqaloqatigiissutiginissaanut piareersimavugut. Ataatsimoorluta Kalaallit Nunaanni filmiliornikkut ingerlataqartunut takornariaqanerup annertusarnissaanut periarfissat piviusunngortikkumallugit suliumavugut.
Continues further down the page...
