Ukioq manna nunarsuarmi angallannermi illuaqqajaaneq, piujuaannartitsilluni angalanermut tunngassuteqangaatsiarpoq, Kalaallillu Nunaata tulluusimaarutigalugu, Intrepid Travel 2025-p Not Hot Listianut ilanngunneqarneq nalunaarutigaa. Ilanngunneqarneq tamanna Kalaallit Nunaata akisussaassuseqartumik takornariaqarnermut tunniusimalluinnarneranik, angalasunullu pissanganartorsiorlutik misigisassarsiorusuttunut angalaffissatut soqutiginartuuneranik ersersitsivoq.
Not Hot List, Intrepid Travelimit ukiumoortumik saqqummersartoq, ornitassat ilisimaneqarpianngitsut, piujuartitsinermik pingaartitsinerusut pillugit allaaserinnittarpoq. Kalaallit Nunaata Qeqertarsuullu toqqagai, nunarsuarmi qeqertat annersaanni misigisassanik neqeroorutigineqartunik takutitsipput, tassaasut nuna kusanarluinnartoq piorsarsimassutsimillu kingornussassat pisuussutillit.
“Intrepid Travelip Not Hot Listiani maluginiarneqarnerput nuannaarutigaarput,” Visit Greenlandimi pisortaq Anne Nivika Grødem oqarpoq. “Takornariaqarnermik ineriartortitsineq inuiaqatigiinnilu peqqissutsip oqimaaqatigiissinnissaat pingaartitaraarput. Isumaqarpugut takornariaqarneq Kalaallit Nunaanni tamanut iluaqutaasariaqartoq, angalasullu issittumi pisuussutsinik toqqorsimanerusunik ujartuinissaannik kajumissaarpagut, takornariarfiunerusartut qitiusumik inissisimasut kisiisa nittarsaannagit.”
Not Hot Listimut ilanngunneqarnerup saniatigut, Intrepid Travelip Kalaallit Nunaanni ilisimasassarsiorneq nutaaq, ullunik qulinik sivisussusilik, sumiiffinni takornarialerisut suleqatigalugit neqeroorutigilerpaa. Angalaneq Nuummiit aallartittussaq Ilulissanut, Qeqertarsuarnut Qasigiannguanullu aqqusaassaaq, Intrepidillu nunatsinni siullermeerluni angalasitsinissaa aallarnissallugu. 2025-imi sisamariarluni angalatitsissaaq.
Ilisimasassarsiornerup takornariarfiunnginnerusartunik ilanngussinissamik ukkatarisaqartup, sumiiffimmi takornarialerisut suliniutaannik tapersiivoq. Intrepid Travel tassaavoq nunarsuaq tamakkerlugu B-Corpimik takornariaqarnermik ingerlatsisut ataqqineqarnersaasa ilaat.
Grødem ilassusiivoq, “Kalaallit Nunaanni angalatitsilluni aaqqissuussinerup, Kalaallit Nunaanni takornariaqarnermik ineriartortitsinissamut suliniutitsinnik tapersiivoq.”
Destination Disco Bayimi Destination Manageri, Navarana Bidstrup, suleqatigiinnissamut qilanaarnini aamma oqaluttuaraa.
“Tulluusimaarutigaarput misigisassat immikkuullarissut nunap immikkoortuani neqeroorutigineqartut ersersinneqarmata. Suleqatigiinnermik nukittuumik pilersitsinitsigut tikeraat misigisassaannik ilumoortunik neqerooruteqarsinnaavugut, takornariaqarnerup ineriartortinneqarnissaa qulakkeerlugu, avatangiisivut piorsarsimassuserpullu ataqqillugit. Periarfissaq tamanna pinngortitamik illersuinissamut, sumiiffinni inuiaqatigiit tapersernissaannut, aammalu angalasartut najukkamilu innuttaasut akornanni isumaqarluartumik ataqatigiinnermik pilersitsinermut iluaqutaassaaq.”
“Ukiumoortumik Not Hot Listimik saqqummersitsisarnitsinni anguniagaraarput takornariat takornariarfiunerusartunut taarsiullugu ornisattanut ilisimaneqannginnerusunut isumassarsiuunnissaat. Taamaalilluta sumiiffinnut allanut takornariaqarnerup iluaqutissartai siammartersinnaavagut, sumiiffinni inuiaqatigiinnut aningaasaqarnermullu pitsaasumik sunniuteqartussamik,” Intrepid Travelimi Global Productimi General Manager Erica Kritikides oqarpoq. “Visit Greenlandip suleqatiginera nuannaarutigeqaarput, nunakkullu ilisimasassarsiorluni angalanissap piviusunngortinnissaa qilanaaralugu,” ilassusiivoq.
Continues further down the page...
