Illit nammineq immaqa naalliuutigisinnaavat, imaluunniit nalunngisaqarsimassaatit Corona pillugu ulluni makkunani isumakuluttumik. Tamanna taaguuserneqarnikuuvoq Coronasomnia (Corona pillugu sininnaveerneq) inuillu ilimagisamit amerlanerit taamak nappaateqartutut nakorsanit nalilerneqarnikuupput.
“Sininnaveertaruit kisimiinngilluinnarputit – nunarsuarmioqatitit amerlasuut aamma sininnaveertarput,” Dr Steven Altchuler, Mayo Clinicimeersoq BBC-mut taama oqarpoq.
Nuna tamakkerlugu takornariaqarnermut siunnersuisoqatigiit Visit Greenlandi videoliorsimavoq atserlugu “Feels of Greenland”. Video iluaqutigalugu qasuersaarsinnaavutit coronallu stressernartua puujulaarlugu. Visit Greenlandip ASMR-ip silarsuaanut 40 min. qaaqquaatit, tassanilu takusinnaavatit piorsarsimassutsitsinniit tigulaakkat 11-it, soorlu kalaallisuut, qilaatersorneq, qajartornerlu. Tamakku misigisinnaavatit attortinnikkut, isussuffigitinnikkut qilaatersortunillu tusarnaarnikkut.
ASMR tassaavoq autonomous sensory meridian response, nalunnginnittullu nalussanngilaat taakku Youtubemi videoni isiginnaarneqarnersaasa maanna ilagigaat. Videot nipinik assigiinngitsunik sianiutinik stimuleeriisunik, eqqissisimaartitsisinnaasunik quinalaartitsisinnaasunillu imaqarput.
“Visit Greelandimi amerlasuujuvugut sininniaraangatta ASMR-mik isiginnaaqqaartartut. Ukiut marluk kingulliit isigisat tusaasallu iluaqutigalugit misigisanik attortinnartunik innannginnitsinni unnuit tamaasa isiginnartarsimavugut. Taamaattumik isumaqarpugut Kalaallit Nunaanniit ASMR videonik sananissarput isumassarsiatsialaasoq – nuna minguissutsiminik, nipaassutsiminik timimik kiisalu tarnimik nutaanngortitsisinnaanerminik ilisimaneqartoq,” Insuk Kim, Visit Greenlandimi nittartagalerisoq, ASMR-imillu nuannarisalik oqarpoq.
Qaammatini tulliuttuni Visit Greenlandip ASMR videot saqqummersinniagai piorsarsimassutsitsinnit tigulaarisuupput.
Continues further down the page...
Kalaallit Nunaat tassaavoq nuna eqqissillutit siniffigisinnaasat nalunagu aqqusinermi pisussinnaallutit Coronamik tunillatsinnissannik eqqasuuteqarnak.
Kalaallit Nunaannut tikereersimagaanni takuneqarsinnaavoq inuuneq tamaanni nalinginnaasumik ingerlasoq. Neriniartarfinni nerisinnaavutit killilersorneqarnak, tusarnaartitsisunut isiginnaariarlutit, imerniartarfinni issiaarujoorlutit pisinniarfinnilu angalaarujoorlutit qanermut assiaqutinngikkaluarlutit (nunanit allanit tikeqqamminngikkuit angerlarsimaannaqqusaanngikkuillu). Martsiminngaanniit Kalaallit Nunaat 30-iinnarnik COVID-19-mik tunillatsittoqarsimavoq.
Maannakkut Aprilip tungaanut Kalaallit Nunaat matoqqatinneqarpoq. Kalaallit Nunaata killilersuinera sakkortooq isumaqarpoq, aatsaat navianarunnaarpat ammariartoqqilernissarput naatsorsuutigineqassasoq. Kalaallit Nunaata pilersaarutigaa innuttaasut tamarmik junip 21-niutinnagu akiuussutissamik kapitissimassasut. Soorunami akiuussutissat nassiunneqartut amerlassusaat, kiisalu innuttaasunik qanoq tiguneqarneri apeqqutaassapput.
Kalaallillu Nunaannut angalasinnaanngortoqaqqinnissaata tungaanut, nalaasaarfinniit Kalaallit Nunaanniit nipit, attortinnerit kiisalu isussunnerit misigikkit.
Naalaarutitit siutinnut inissikkit videolu isiginnaarlugu!
