Arpannerit takisuut uku sianissutsikkut assoroornarnerpaatut inissisimapput. Tamassumunnga peqqutaanerpaavoq arpannikkut unammiuaartitsinertulli Maratoninisulli tusintilikkaanik 10 tusintilikkaaniilluunniit arpattartunik unammisassaqanngittarneq, isiginnaariarpassuit eqqaanngikkaluarlugit. Ukunanili arpannerni 20-nik peqataasoqarsinnaagaangatta iluatsitsisaqaagut!
Taamaakkaluartorli kiap atorfissaqartimmagu inunnik ulikkaaqqasumik qoororsuakkoornissaq, avatiminni savarpassuarnik qivioqarluartunik hiistinillu nuannaaqataasunik tapersersorteqaraanni. Isikkivissuarlumi! Tamakku tamarluinnarmik qalipaatilersueqataallutik aaqqissuussatsinnut imikkuullarissuutitsipput.
Kalaallit Nunaata kujasinnerpaaffiani aasaanerani 2019 arpaffissanut pilersaarut isumassarsiorfigiuk
Continues further down the page...
Tamaani isiginnaartut pattaattut illersuillutillu suaartaattut aallartiffimmi misigineqarsinnaapput, apuuffissarlu Qaqortumi illoqarfiup qeqqani inissisimalluni. Uupakaasinneqassanngilatilli. Apuutinnginnerni tasersuaq sanioqqullugu orpikkat nunalu maavaartoq assoroorfigeqqaassavatit, qattunerit aqqusaarlugit sioqqanik aqqusineq ingerlaarfigalugu illoqarfimmut utissallutit. Nunakkut 1200 meterisut sivingassuseqartumik arpaffeqarluni marathonerneq una arpaffissani pingasuni sakkortunerpaavoq.
Uani nunap timaani marathonerneq immikkuulluarilluinnartumik misigisassaqarfittut periarfissiivoq. Ulloq taanna ukiumoortumik kujataarmiunut ilaqutariinnullu katerisimaarneq ingerlanneqartarpoq – ukiumoortumik savaatillit festivaaliannik taaneqartartoq. Tassani savaatillit ulluinnarsiutaat ingerlanneqartarput hiisterneq, ningariaalluni unamminerit, savat qiviuinik sanaanik aammalu savat nassuinik guldinillu pinnersaasianik tuniniaanerit, kiisalu savaatillit namminneq savaatiminnik neqaarniarnerat. Taamaattumik nalliuttorsiuutigilluarneqartarpoq, illillu arpannerpit naammassereernerani nalliuttorsiuutissaqarluarumaarputit!
Una arpanneq marathonernerunngilaq, nunalli timaani assigiinngitsutigut misigisassarsiornertut arpannerulluni – ullunik marlunnik sivisussuseqarluni tammaarsimaarfimmi unnuinertalimmik ingerlanneqartarpoq. Ullormi siullermi UNESCO-p nunarsuarmi piffiit eriagisat ilaat arpallutit, qajartorlutit, sikkilerlutillu ingerlaarfigisssavat, apuunnalli. Pinngortitami qooruusumi alianaalluinnartumi unnuereernerup kingorna aatsaat qaqqasioqqaarluni, sikkileqqeqqaarluni, marathonernerup affaaniit takinerulaartumik sermersuup tungaanut arpaqqeqqaarlugu Tasikuluulik Adventure Race naammassillugu oqaatigineqarsinnaanngussaaq!
Marraannarmi arpaffiunngikkaluarpoq, marrartertassaatilli.
Ingasattumik sakkortuumik arpaffiunngikkaluarpoq, sakkortuumilli arpaffinnik aqqusaagaqartassaatit.
Arpaffinnik aaqqissuisut Tasikuluulimmut assartuussineq isumagiumaarpaat, Qaqortup illoqarfianiit akunnerup affaanik sivisussuseqartoq, arpattussalli nammineq atortussatik isumagissavaat, attarsillutilluunniit.
Vikingit eqqartortillugit marathonerfissaq kingullermut Viking nr. 2, Leif Erikson, ataataata ukioq 900-kkut naajartorneranni najugaqarfigisimasaanut atsiunneqarsimavoq. Maanna Qassiarsuk-mik taaneqartartoq UNESCO kulturikkut eriagisassanut ilaalersimasoq. Nunaqarfik savaateqarfiusoq 40-t missaanni inoqarpoq, arpattoqartillugulu inui sisamariaatingajammik amerlisarput!
Leif Iluanaarajuup Marathonia Y-tut ilusilimmik ingerlaarfissaliarineqarsimavoq, Qassiarsummiit kangerluk taserpassualik aqqusaarlugu kangerluk tullermut nunaqarfik Nunataaq-mut arpaffissaalluni. Ingerlaarfissap affaa tikikkaanni kaajallaffissaq ajassaatiusatut ilusilik tikinneqassaaq savaateqarfiullu tungaanut Inneruulaliup tungaanut aqqutissaq ingerlaffissaalluni.
Una arpanneq taakkunani sisamani aaqqissuunneqarsimasuni ajornannginnersaavoq, ingerlaarfissat ajornanngitsunnguit sioqqanik aqqusernit ATV-nik savaatillit namminneq sanasimasaat ingerlaffigineqassammata – Inuuniarnerminni nunaatiminnut imminnullu tikiffigissagaangamik ingerlaarfigisartagaat.
Tamaani sanaartukkanik angisuunik takusassaqanngilaq. Minutsit arlaqanngitsut ingerlaareerninni nunaqarfik Tasiusaq 44-nik inoqartoq taassumalu sioqqanik aqqusineeraa qaangereersimassavat, taamaasillutillu 42.2km-it kingulliit kujataata alianaannerpaartaani kangerlummi Tasermiuni ingerlaarlualereersimassallutit. Pisarneq malillugu isikkiviit alianaannerpaat qutsissumiit takuneqarsinnaapput, isikkiviillu immikkuullarinnersaat kingullertut takuneqartussaanngorlugu ingerlaarfik aaqqissorneqarnikuuvoq. Uani Marathonernerup naajartornerani innarsiorfissaq tikinneqassaaq, taannalu qaangeraanni innarsiorfissap tullia, aamma tullia. Taannalu marathonernerit pingasut ajornannginnerpaartaraat! Ukioq manna arfineq-marluinnaat tassunga peqataaniarlutik nalunaarsimapput.
Narsarsuarmiit, Narsamiit, Qaqortumiit Nanortalimmiilluunniit (Illoqarfik qaninneq) takornarianik angallassisartut namminersortut aqqutigalugit Tasiusamut angalaneq pilersaarusiorneqarsinnaavoq. Arpattussat amerlanerit ulloq sioqqullugu arpaffissartik misilittariaatigalugu unnuiartortarput. Aasaanerani qaamaneqqortusigaangat unnukkut pigaarnissaq kajuminnartarpoq, taamaalillunilu seqernup tarrilernera kiisalu qalipaatigilluni alianaasseruttornera misigineqarsinnaalluarluni! Taamaakkaluartorli qasuersimanissaq pisariaqarpoq. Nunami tammaarsimaffimmi sinissimatilluni allaaneq ajorpoq isertugaatinik toqqortanik timaani pinngortitami ajornaquteqanngitsumik arpassinnaanissamut nukissanik tunineqarsimalluni.
Psst! Aammattaaq tamaani 10km-ik takissusilimmik arpaffissaqarpoq!
