Kangerlussuaq allanngoriartorpoq, siunissamilu nunatsinni takornariartitsinermi inissisimaffia atuutsinneqarneralu pissutsinut nutaanut naleqqussarneqartariaqarluni. Nuna tamakkerlugu nunallu immikkoortuiani takornariaqarnermut siunnersuisoqatigiiffittut ataatsimoorussatut suliassatut pingaarutilittut isigaarput, allanngoriartornerullu ingerlanerani ikiorseerusulluta – najukkami inuiaqatigiit ataqqillugit, siunissarlu ungasinnerusoq eqqarsaatigalugu naleqarnerulersitsisoqarnissaq ukkatarinerisigut, nunatsinni tamanut iluaqutaasussamik.
Isumaqarpugut Kangerlussuaq nunatsinni takornariaqarnerup iluani suli qitiusumik inissisimasoq, qujanaqisumik takornariartitsisartut 15-init amerlanerusut suliniuteqarnerat pissutigalugu. Taakkua sulinerat najugaqarfiup takornariarfissatut pingaaruteqarneranut aalajangiisuuvoq. Taamaattumik ataatsimoorluta aaliangiupparput Kangerlussuup nukittuffii nunani tamalaanut ersarissarnissaa nittarsaannissaalu salliutissallugu. Tamatumalu saniatigut ineriartornerup ingerlaannarnissaa taperserniarlugu illuatungeriittut siunnersoqatigiinnissarput siunniullugu. Takornariartitsisartut qanimut suleqatigalugit Kangerlussuup misigisassarsiorluni tikeraarfissatut pilerinartutut inissisimanera nukittorsarlugulu sulissutigissuarput.
Mittarfiit nutaat angalasarnerit allanngortikkaluarai, qularinngilarput Kangerlussuaq nunatsinni takornariaqarnermi pingaarutilimmik inissisimajuassasoq, pisuttuarnermi, uumasunik takuniaanikkut piniartitsinikkut, ilisimasassarsiornikkullu angalanermi neqeroorutitsialaqarmat. Misigisassat tamakku Kangerlussuaq takornarianut misigisassarsiortunut immikkut kajungernartippaat – nunarsuarmi tamani timertik atorlugu sammisaqarniartunut misigisassarsiortunullu pinngortitamut kulturimullu attaveqarluarnerorusullutik takornariarumasut amerliartorput.
2025-mi ATV-it atorlugit aqqut 100 kilometerisut takitigisoq naammassissaaq, takornariat pinngortitamik avatangiisiminnik nutaamik paasisassarsiornissamut periarfissaqalissallutik.
Aammattaaq aqqut taanna nunaqavissunut takornarialerisunut suliffeqarfinnullu nutaanik periarfissiissaaq misigisassarsiornissamut neqeroorutinik ineriartortitinissamut, tamatumalu kiguneranik nunaqavissut takornariarsinnaaneranut aamma nukitsorsaaqataassalluni.
Kangerlussuaq nunatta takornariaqarneranut qangali qitiusumik inissisimavoq, Københavnimiillu toqqaannartumik timmisartuussisoqartuarata ingerlatiinnarneratigut, misigisassarsiorfiulluarsinnaaneralu pissutigalugit inoqarfik takornariarfittut inissisimanera pingaaruteqartuassooq. Kangerlussuarmi takornariaqarnerup siunissaata sulissutiginerani periuserissuarput, sumiiffimmi ingerlatsisut, suliffeqarfiit, oqartussat takornariaqarnermullu siunnersuisoqatigiit qanimut suleqatigineritigut. Pissutsit allanngoriartornerini ilisimasanik piginnaaneqarfiillu suleqatigiissinnaanermut nukittorsaanermi avitseqatiginninnissamut saaffissatut inissisimavugut, toqqammaviit aalajaatsut pioreersullu piginnaanngorsaqqinnerini.
Aammattaaq inuussutissarsiortut kajumissaarpavut pisariaqartitaminnik, kissaatiminik, neqeroroorusiani ineriartotiteqqiinermini, suliniuteqarnermi, pilersaarutillu pillugit malinnaavigeqqulluta. Erseqqissumik attaveqatigiinneq, uatsinnut aamma pitsaanerusumik tapersiinissatsinnut iluaqutaassooq, sumiiffimmi ineriartornissamut pisariaqartinneqartut aamma tunniulluarsinnaanerulissallugit. Iliuuseqarfigerusupparputtaaq sumiiffinni takornarialerisunik oqaloqatiginninneq suleqatiginninnerlu. Kangerlussuup nunatta takornariaqarneranut pingaaruteqassusaata attatiinnarnissaa ineriartortinnissaalu ataatsimut iliuuseqarneq akisussaaqataanerlu aqqutaassasut upperilluinnarparput.
Anne Nivíka Grødem | CEO
Taatsi Fleischer | Destination Manager
Continues further down the page...
