Aggustip aallartinnerani Kangerlussuarmi Sisimiunilu nunap immikkoortuani misigisassat ukkataralugit Visit Greenlandimiit assiliiartortoqarsimavoq. Anguniarneqarpoq inunnut amerlanerusunut tikeraarnissamut kajungilersitsiniarluni, assinik videonillu pilersitsinissaq – taamaalillunilu sumiiffimmi takornariaqarnermik ineriartortitsineq taperserneqarluni. Angalaneq Arctic Circle Business aamma sumiiffinni takornarialerisut qanimut suleqatigalugit pilersaarusiorneqarpoq.
Ukiut tamaasa Visit Greenlandi pilerisaarinermut atorneqartussanik nutaanik assiliiniarluni videoliorniarlunilu nunap immikkoortuinut aalajangersimasunut angalasarpoq. Assit videollu assiisivimmi pissarsiarineqarsinnaanngortinneqartarput, tassanilu takornariaqarnermik suliallit namminneq nittarsaassinissaminnut aallersinnaallutik. Tamatumuuna Destination Arctic Circlemut angalavugut, sumiiffiup saqqumilaarnerunissaa anguniarlugu – mittarfiit nunanit allanit tikittarfiit nutaat angalariaatsillu allanngoriartortut eqqarsaatigalugit suliassaq tamanna pingaaruteqarpoq, tamakkumi tamarmik Kalaallit Nunaanni takornariaqarnermik ilusilersueqataapput.
Kangerlussuaq Sisimiullu misigisassarsiorfissatsialaapput
Visit Greenlandimi suliniutini misigisassarsiorluni takornariaqarneq pingaarnertut sammineqarpoq. Misigisassarsiorlutik angalasartut pinngortitami misigisassanik ilumoortunik ujarlertuupput, taakkununngalu Kalaallit Nunaat angalaffissatut naleqqulluinnartuuvoq. Takornariarpassuarnik kajungilersitsineq anguniarnagu naleqarluartumik pilersitsinissaq pitsaanngitsumillu sunniuteqannginnissaq anguniarneqarpoq – taamaalilluta akisussaassuseqartumik ineriartortitsineq tapersersussavarput pitsaassuseq amerlassutsiniit salliutillugu. Kangerlussuaq Sisimiullu tassaapput ornitassat, misigisassarsiorluni takornariaqarnermut tunngatillugu misilittagaqarluartut, aammalu misigisassarpassuarnik annertuunik neqerooruteqareersut kiisalu ineriartortitsisinnaanermut periarfissaqarluartut.
Kangerlussuaq misigisassarsiorfissatut naleqqulluarpoq; pisuffigineqarsinnaavoq, uumasunik takornariarfigineqarsinnaavoq, takornarianut piniarfigineqarsinnaavoq sermersuarmullu isaaffiulluni. Sisimiuni aamma ukioq kaajallallugu pinngortitami timi atorlugu misigisassanik, takornariaqarnikkullu nioqqutissanik allanik pilersinneqarluarsimasunik neqerooruteqarpoq. Saniatigut aamma Arctic Circle Track nutaaq ammarneqarmat, illoqarfiit taakku marluk akornanni angalanissamut periarfissaqarnerulerpoq – Arctic Circle Track tassaavoq ATV-nut aqqusineq 100 km-inik takissusilik, nunaqavissunut takornarianullu periarfissanik nutaanik pilersitsisoq.
Suleqatigiinneq takornariaqarnermilu periarfissat nutaat
Angalanermi nunap immikkoortuani misigisassanik pingaarnernik arlalinnik takutitsinissamut assinik videonillu pilersitsisoqarpoq– ilaatigut Kangerlussuarmi sermersuarmut angalaarnerit aamma fatbikerneq, kiisalu Sisimiuni pisunnerit, arfernik takornariarnerit aamma aasaanerani qimmit qimuttut atorlugit qamuterneq – ukiuunerani qimussertarnermut taarsiullugu. Tamatuma saniatigut Arctic Circle Track nutaaq assilineqarpoq, soorlu aamma najukkami unnuiffiit, nerisassat kiisalu Kalaallit Nunaanni UNESCO-mut ilaasoq nutaaq Aasivissuit – Nipisat assilineqarlutik.
Sumiiffiup ukkatarinissaanut suliniutinut atatillugu assit videollu pilersinneqarput. Anguniarneqarput angalasartut amerlanerusut kajungilersinnissaat takornariaqarnerullu nuna tamakkerlugu siammarterneqarnissaa, taamaalillutik angalaffiit amerlanerusut sumiiffinnilu inuiaqatigiit takornarianit iluaquserneqassapput. Timmisartut angallavii nutaat aamma Kalaallit Nunaanni angalariaatsit allanngorneri eqqarsaatigalugit, tamanna suliniutaavoq pingaarutilik.
NASSUIAAT: Nuna tamakkerlugu aamma nunap immikkoortuini nittarsaassinerup ataqatigiissinneqarnera
Nuna tamakkerlugu nunallu immikkoortuini takornarialerisut qanimut suleqatigiinnerisigut Kalaallit Nunaat angalaffissatut nittarsaanneqartarpoq. Visit Greenlandip akisussaaffigaa nunatta nunat tamalaat akornanni nittarsaanneqarnissaa aammalu niuerfiit assigiinngitsut akornanni saqqumilaartitsinissaq. Tamatumalu saniatigut nunap immikkoortuini takornarialerisut namminneq immikkut misigisassanik ineriartortitsinissaminnut nittarsaassinissaminnullu akisussaasuupput. Nuna tamakkerlugu nunallu immikkoortuini suliniutit ataqatigiissinneqaraangata – soorlu uani taamaaliortoqartoq – ataatsimoornermik nukittuumik pilersitsisoqartarpoq. Destination Arctic Circle-p sumiiffimmi ilisimasai attaveqarfiilu iluaqutigalugit assit videollu naleqquttut pitsaasullu qulakkeerneqarput, Visit Greenlandillu siammasissumik nittarsaassisinnaanera saqqumilaarnissamut periarfissiivoq tikeraanullu nutaanut kajumilersitsilluni. Taamaalilluni suleqatigiinneq una takornariaqarnerup akisussaassuseqartumik ineriartortinnissaanut sumiiffimmilu tunngaviliinissamik aammalu nunat tamalaat akornanni saqqumilaartitsinissamik tapersiivoq.
Continues further down the page...
