Kangiata Illorsuata Ilulissani takornariaqarneq tukittorsassavaa

Qanittumi Kangiata Illorsua tikeraanik tikilluaqqusisinnaalissaaq. Tikeraanut illorsuup Ilulissani ilulissallu eqqaani takornat amerlisassavai.

Kangiata Illorsua Ilulissaniittoq 3. Juli matunik ammaassaaq tamannalu ukiut arlaallit sulianik naammassinniffiussaaq. Kangiata Illorsua 2015-mi isumassarsiarineqarpoq, Naalakkersuisut, Avannaata Kommunia aamma Realdania Ilulissat Kangerluani, UNESCO-mit illersorneqartup qanittuani tikeraanut illorsuarmik pilersitsinissaminnut suliniuteqalermata.

Ornigassaq UNESCO-mit illersorneqartoq takornarianit, pinngortitamik kusanaqisumik silallu pissusaata allanngoriartornerata kingunerinik misigisaqarusuttunit ornigarfioreerpoq. Visit Greenlandip pisortaa Hjörtur Smárason isumaqarpoq, Ilulissani takornariaqarnermut illorsuaq assut sunniuteqarumaartoq:

”Takornariaqarnerup ineriartortinnissaa Kalaallit Nunaanni pilersaarutini assut inituvoq. Kangiata Illorsua pilersaarutini taakkunani pingaaruteqarluni inissisimavoq, tassaavormi tikeraat illorsuisa arfiniliusussat, Kalaallit Nunaanni takornarianik ornigarneqarluartartuni sanaartugassat siullersaat. Naalakkersuisut, Avannaata Kommuniata aamma Realdaniap akornanni suleqatigiilerneq tassaavoq Kalaallit Nunaanni takornariaqarnerup ineriartortinnissaanut ikiutaasussat pingaarutillit ilaat,” Hjörtur Smárason oqarpoq.

Silap pissusaata allanngoriartornera qanoq isumaqarnersoq paasisaqarfiginerulissavarput

Illorsuaq alutornartoq 1.500 m2-nik angissusilik arkitektimit Danmarkimeersumit Dorte Mandrupimit titartarneqarsimavoq. Uppik qaqqanut mittoq takugamiuk ilusissaa isumassarsiarisimavaa. Tikeraat illorsuarmut iserunik saqqummersitaq ”Siku pillugu oqaluttuaq” iserfigissavaat tassanilu sikup pinngoqqaarneranit kangerluanilu inuuneq pillugu saqqummersitat qimerluuataarsinnaassavaat.

Kangiata Illorsuata ammarneqarnissaa COVID-19-mit sunnerneqarpoq, taamaattumik aallaqqaammut najugaqartunut taamaallaat ammarneqassaaq. Siunissami Illorsuup takornariat nunani tamalaaneersut, siku, sikup isumaa kiisalu silap pissusaata allanngoriartornerata pinngortitamut innuttaasunullu ulluinnarni sunniutai pillugit paasisaqarusuttut kajumissaassavaat:

“Neriuutigaarput Kangiata Illorsuanut kangerlummullu tikeraat, inuup pinngortitamit annerunngissusaa pillugu paasisaqarnerujumaartut. Pinngortitaq inullu ataasiupput pinngortitarlu mianerisariaqarparput, atorallaannarippummiuna,” Kangiata Illorsuata aqutsisua Elisabeth Momme taama oqaaseqarpoq.

Naapiffissaq nutaaq

Kangiata Illorsua siku, sikullu eqqaani inuuneq silallu pissusaata allanngoriartornera pillugu ingerlatitseqiisussaq aamma naapiffiussaaq. Illoqarfimmiut takornariallu Illorsuup caféanut neriartorsinnaassapput, isikkivik qalianiit ammasumiit qimerluujutigalugu. Illorsuup isuini affarnik qaliaqarpoq, tassanilu tikeraat UNESCO-p pisuffissaasa ilaanni angalaareerunik isinnginnerminni kamippaminnik saleeqqaarsinnaassapput.

Saniatigut ukiuunerani piorsarsimassutsimut tunngasunik assigiinngitsunik aaqqissuisoqartassaaq.

Asbjørn Bargsteen, Avannaata Kommuniani takornariaqarnermi suliaqartoq isumaqarpoq Kangiata Illorsua sumiiffimmi takornarialerisunut nunanilu tamalaani angalatitsisartunut iluaqutaajumaartoq.

“Kangiata Illorsua Ilulissani misigisassanut ilanngussisussaavoq. Illorsuup ornitassami UNESCO-mit illersorneqartumi inissisimanerata takornariat Ilulissiartut pissusissamisoortumik orniffissaattut inissisimassaaq. Takornarialerisut Sermermiuni ikaartarfimmut takornatiartitsigaangamik Illorsuaq tassaajumaarpoq ornitassaasa ilaat. Taamaalillutik aamma tuniniaasut nunani tamalaaneersut illup iluani misigisassanik amerlanerusunik ilanngussisinnaalissapput, tamannalu piffissaq takornariarfiuallaarneq ajortoq pitsaanerusumik inissisimalissaaq, “ Asbjørn Bargsteen oqarpoq.

Kangiata Illorsua ammaanersiorluni kaffillissaaq, 3. Juli nal. 11:00-miit, najugaqartulli tamarmik tikilluaqqusaapput (Malugiuk Illorsuaq ataatsikkut inunnik 150-nik inissaqartitsimmat). Paasisaqarnerorusukkuit www.isfjordscentret.gl alakkaruk.