Visit Greenlandip nuna tamakkerlugu innuttaasunik misissuinerata nutaap takutippaa innuttaasut amerlasuut Kalaallit Nunaanni takornariaqarneq pitsaasutut isigigaat. Misissuinerup aamma takutippaa takornariaqarnermik ineriartortitsinermi oqaloqatigiinneq annertunerusumik pisariaqartoq, paasissutissiisarneq annertunerusoq najukkamillu peqataatinneqarnissaannut periarfissat pitsaanerusut pisariaqartut.
Visit Greenlandid nuna tamakkerlugu misissuinera nutaaq, Kalaallit Nunaanni takornariaqarneq pillugu innuttaasut isumaat, Epinion suleqatigalugu ingerlanneqarpoq naatsorsuutigineqarlunilu ukiut tamaasa misissuineq ingerlanneqartarnissaa. Misissuineq Visit Greenlandip 2025-2035-mut periusissiaani sakkuuvoq pingaarutilik, tassani innuttaasut tapersersuinerat, peqataatitsinerat akisussaaffeqaqatigiinnerallu pingaarnerpaapput takornariartitsineq siunissami ungasinnerusoq eqqarsaatigalugu ineriartortinneqarnissaa najukkami naleqarnerulersitsisoq anguniarlugu.
Misissuinerup ilaatigut takutippaa innuttaasut takornariaqarneq pillugu nalinginnaasumik qanoq isumaqarnersut. Innuttaasut 46 procentiisa najukkaminnut takornarianik tikittoqartillugu tamanna annerusumik pitsaasumik imaluunniit pitsaasupilussuarmik misigisarpaat. 39 procentiilu misigisimapput pitsaasortaqarlunilu pitsaanngitsortaqartoq, 6 procentillu annerusumik pitsaanngitsumik imaluunniit pitsaanngitsupilussuarmik misigisaqarfigisarpaat.
Innuttaasut amerlanerit takornariat ataqqinnittutut isigaat, 16 procentiinnaallu isumaqarput najukkami takornariaqarneq imminnut ajornartorsiutinik pilersitsisartoq. Aammattaaq innuttaasut amerlasuut isumaqarput takornarianut erseqqinnerusunik najoqqutassaqartariaqartoq.
Misissuinerup aamma takutippaa takornariaqarnerup takornariallu sunniuteqarnerat paasissutissiinermullu amerlanerusunik pisariaqartitsisoqartoq oqaloqatigiissutigineqartariaqartorlu. Ullumikkut inuit ikinnerussuteqartut naammattumik paasissutissinneqartarput imaluunniit inuiaqatigiinni ineriartornermut sunniuteqarnissamut periarfissaqarluarlutik.
Misissuinerup inernera 2035-p tungaanut misissuinermi siullersaavoq, akisussaassuseqartumillu takornariartitsinerup ineriartortinneqarnissaanut suliniuteqarnissamut tunngaviuvoq. Ullumikkut qanoq inissisimasugut takutittarpaa, aamma innuttaasut takornariaqarnerup ukiuni aggersuni ineriartornissaanik qanoq isiginninnersut malinnaaffiginissaanut periarfissiivoq.
“Nunatsinni takornariaqarnerup ineriartornissaa nunaqavissut peqatigalugit pilersinneqassaaq. Taamaattumik pingaaruteqarpoq najukkami qanoq ineriartortoqarnera malinnaaffigissallugu, sumilu oqaloqatigiinnerup piginneqatigiinnerullu nukittorsarneqarnissaanik pisariaqartitsisoqarnersoq. Misissuineq Visit Greenlandip Kalaallit Nunaanni takornariaqarnermut tunngatillugu innuttaasullu peqatigalugit ineriartortitsinermik sulinermini ingerlaqqinnissaanut tunngaviuvoq pingaarutilik,” Visit Greenlandimi pisortaq Anne Nivíka Grødem oqarpoq.
Nunarput Nuan
Visit Greenland Pikiala suleqatigalugu 2025-mi 2026-milu illoqarfinni arlalinni oqaloqatigiinnernik qaaqqusisarpoq, sammineqarluni takornariartitsinerup ineriartornera maani najugalinnut qanoq ililluni najogaqarfitsialaasinnaanersoq. Suliniut taaguuteqarpoq Nunarput Nuan, siunertaralugulu takornariaqarnerup periarfissai unammilligassaalu pillugit innuttaasut oqaloqatigineqarnerulernissaat. Oqaloqatigiinnerit kingulliit Kangerlussuarmi, Qeqertarsuarmi, Ilulissani Nuummilu ingerlanneqarput. Oqaloqatigiinnerit tulliuttut Tasiilami, Qaqortumi Qaanaamilu ingerlanneqassapput.
Misissuineq pillugu paasissutissat
Continues further down the page...
