Ataatsimoorluni nutaamik suliniuteqarnermi, 2021-2022-mi ingerlanneqartussami, Visit Greenland nunallu immikkoortuini assigiinngitsuneersut DMO’t, sulinertik suleqatigiinnertillu annertusivaat. Nittarsaanermik ingerlatsinerup nutaap anguniagaraa, Kalaallit Nunaata pingaarnertut DNA-vata kinaassusersinissaa, Kalaallillu Nunaata takornariarfissatut unammillersinnaanissaanut iluaqutissartaasa assiliornissaat. Taamaalilluta takornariaqarnermut tunngatillugu nittarsaaneq nutaaq aallartissinnaaniassagatsigu, tuniniaavinni pingaarnerniittut misigisassarsiorlutik takornariartartut sullillugit kajungilersillugillu.
Piffissami siullermi tuniniaaviit qaninnerit ukkatarineqassapput, soorlu Danmarki nunanilu avannarlerni nunat allat. Nunarsuaq tamakkerlugu tunillaassuunneq annikillippat, nunani tamalaani, soorlu Europami nunanilu ungasissuni takornariartartut sullinneqalissapput.
Nittarsaanermut suliniutip piareersarneqarnera aatsaat aallartilaarpoq, workshopinilu nunap immikkoortuineersut DMO’t soqutigisaqaqatigiillu allat peqatigalugit, qaammatini tulliuttuni ingerlanneqartussani ilusilersorneqassalluni. Suliniut 2022-mi, nunarsuaq isumannaalleqqippat, ammaqqippat angalanerillu ingerlaqqilerpata aallartinneqassaaq.
Misigisassarsiorlutik takornariat takornariaqarnerup iluani, tikiffimminni aningaasanik atuinerusartutut, piujuartitsinissamik, pinngortitamik piorsarsimassutsinillu soqutigisaqartutut nalilersorneqartarput. Taamaattumik Visit Greenlandip takornariaqarnermut periusissaani 2020-2024-mi atuuttumi pingaarnertut ukkatarineqarlutik.
“Nittarsaaneq pingaaruteqarpoq pissutigalugu takornariarfissamut, tuniniakkanut pingaartitanullu ilisimassusermik pilersitsisarmat. Takornariarusussinnaasut takornariarfissanut allanut naleqqiulluta immikkoortissinnaalissavaatigut pingaarutilimillu eqqaamasinnaassalluta. Angalanissamik pisilernermi, takornariarfissatut unammillikkatsinnut naleqqiulluta ornikkusutani siullerpaatut inissisimaneq pitsaasuuvoq” Susanne Bisgaard, Sermersooq Businessimi suliniummi aqutsisoq oqarpoq.
“Nunarsuup ammariartoqqilernerani takornariaqarnerullu aallarteqqinnerani, takornariarusuttunik kajumilersitsinissamut unammillernerit sakkortusussaapput. Ataqatigiissumik iliuuseqarnerup aningaasaliinerullu naammattup Kalaallit Nunaannut takornariat sukkasuumik amerliseqqissinnaavagut, takornariaqarnermilu aningaasaqarneq annertuseqqillugu.”
Nittarsaanermik suliniuteqarneq Kalaallit Nunaata DNA-vanut, nunap immikkoortuini ilisarnaatinut, takornariarfissatullu oqaluttuassatsinnut ikkunneqassaaq. Oqaluttuarneq pingaaruteqarpoq najugaqartullu nunaminnut tulluusimaarutaannut tunngasuussalluni, takornariat namminneq misigerusullugu Kalaallit Nunaannut tikeraarnissaannut kajumilersitsilluni.
Kalaallit Nunaata ilisarnaataata DNA-va Visit Greenlandip nunallu immikkoortuisa pilerisaarinerini ersersinneqassaaq. Nittarsaanermi atortut qanorlu iliorsinnaanerit sakkuusivinniit aasariaannaassapput, soqutigisaqaqatigiinniillu Kalaallit Nunaata takornariarfissatut nittarsaannerini atorneqarsinnaassallutik.
Sakkuusivik nittarsaanermilu atortut takornarialerisut nittarsaanissaannut tuniniaanissaannullu pisariinnerulersitsissaaq, Kalaallillu Nunaata sooq angalaffiginissaanut nalunaarut ataqatigiissumik annissinnaalersillugu.
Nittarsaanermut periusassamut tunngatillugu suleqatigiinneq nutaaq, isumalluutinik sapinngisamik pitsaanerpaamik atuinissamut isumakkeerinissamut tamakkiisumik ukkatarinnissaaq, piginnaasanillu atorluaassalluni. Saniatigut periusissap Kalaallit Nunaata ilisarnaataanik, nunallu immikkoortuini assigiinngitsuni pilerisaarinermi suli annerusumik imminnut ikiorsernissaannik isumannaarissalluni.
Kalaallit Nunaanni takornariat amerlanerusut tikittalerpata, aningaasaqarnermut angallassinermilu/logistikkimi, akunnittarfinni neriniartarfinni kiisalu takornarialerisuni allani pilersitsisussanut iluaqusiissaaq.
Apeqqutissaqarussi Visit Greenlandip pisortaa Hjörtur Smarason attavigisinnaavarsi:
Email: hjortur@visitgreenland.com,
Oqarasuaat angallattagaq/Mobil/Mobile: +299 27 99 98 / +45 22 80 14 16
Continues further down the page...
