TUSAGASSIUUTINUT NALUNAARUT
Nuuk ulloq. 18. Marts 2024
Takornarialerisut nunaqavissullu takornariartaassuit tikittarneri annerpaamik iluaqutigisussaangortinniarlugit Visit Greenlandimit umiarsuarsuit tikeraqqilinnginnerini nittartakkamik ataatsimoorfimmik “Cruise Call” liste-mik nutarterivoq.
Nittartakkap nutarternissaa takornarialerisut isummersuutaanniit aallaaveqartumik pilersitaavoq. Maajimi 2023-mi angalanissamik aaqqissuisut, oqartussat takornarialerisullu Visit Greenlandip misissuititsineranut peqataapput. Misissuitsitsinerup siunertaraa umiarsuarnik takornariaqarnerup inissisimanera nunap assinngorlugulusooq ersersissallugu (ersersiineq).
Qanittumi Cruise Forum 2024 ingerlanneqaqqammivoq uanilu oqaloqatigiilluarnerit ingerlanneqarput. Ataatsimiinnerni taama ittuni Visit Greenland annertuumik pingaaruteqartunillu pissarsiaqarpoq tamannalu tunngavigalugu periusissiat pingaarnersiukkat aallutarinissaanut tunngavissilluarneqarpoq:
“Visit Grenlandip suliassaata pingaarnerit ilagaat takornariaqarnerup ineriartortinneqarnerani nunaqavissut takornarialerisullu pissarsiassaat annerpaaq qulakkeerniarlugu sulissalluni. Nittartakkap nutarternera maanna ullutsinnut tulluarsarsimalersoq tassaavoq takornariaqarnerup pitsaanerusup – tassa suliffeqarfeeqqaniit innuttaasunut ataasiakkaanut iluaqutaasussaq – maanna atorluarneqarneratigut takornariartaassualerinerup iluaqutissartai tamanit iluaqutigineqartussaq,“ oqarpoq Helene Lyberth Steffensen, Visit Greenlandimi Head of Content and development.
Visit Greenlandimi ukkatarineqartut ilagaat takornariartaassuit tulattartussat pillugit ataqatigiissaakkamik sullissinissap aqqutissiuunnissaa. Maanna pinasuartumik pitsaanerusumillu Cruise Call listip atuutilerneratigut pilersaarusiorsinnaaneq takornariartaassuillu Kalaallit Nunatsinnut tikittartut pissarsiffigineqarsinnaaneri annerpaaffianiitinnissaanik siunertaqarpoq. Maanna suliffeqarfiit nunaqavissullu piareersarnissamut tikeraarfissatullu pitsaanerusumik misigisaqartitisinissamut nukissatik atorluarsinnaanerulissavaat.
Suliat tamakku saniatigut Visit Greenlandimiit Inuussutissarsiornermut, Niuernermut, Aatsitassanut, Inatsisit Atuutsitsineqarnerannut Naligiissitaanermullu Naalakkersuisoq takorniaqarnermut inatsisissaq suliarineqartoq suleqatigiissutigalugu angalanerani peqataassaagut. Inatsisissap siunertaraa takornariartaassuit tikittartut nakkutigalugillu ataqatigiissarneqartarnissaanik suliaqarneq aammalu piujuartitsinermik tunngaveqartumik ingerlatsinissamut takornarialerisunit periusissiarineqartussamut 2025-2035-mut atuuttussamut ilassutigineqartussat katersornissaanut peqataassaaq.
Anguniagaavoq takornariaqarnerup piujuartitsinermik tunngaqartumik ineriatortinnissaa tamanit nunaqavissunit iluaqutaallunilu Kalaallit Nunaata kulturikkut avatangiisitigullu iluaqutaasumik takornariaqarnikkut akisussaassuseqartumik inerisaanissamik qulakkeerinninneq.
Continues further down the page...
