Travel Trade tassaavoq Visit Greenlandip internetsikkut qupperniliaa nutaaq tamanut atugassiaq. Siornatigut quppernerinikuusarput nutaarluinnarmik ilusilersorlugulu imalersornikuuarput, takornariaqarnermi suleqatigiit pisariunnginnerusunik atoriaannarnillu sakkussalersornissaat paasissutissaqartinnissaallu siunniullutigu.
Sumiiffinni takornarialerisuuguit unnuisarfiuteqarlutilluunniit, pisoqartitsisarnernik aaqqissuisuusinnaavutit cafémilluunniit ingerlatsisuuguit imaluunniit nuna tamakkerlugu takornarialeriffimmik suleqateqartuuguit una atorsinnaavat. Nunanit tamaneersunik takornariaqarnermik sulisuuguit imaluunniit nunanit tamaniit Kalaallit Nunaannut eqimattanik takornariartitsisarnermik suliaqaruit aamma una atorsinnaavat. Tamakkua allallu pissutigalugit, sakkussat atorfissaqartitatit tamaasa nittartagarput pingaarneq, visitgreenland.com aqqutigalugu pissarsiarisinnaanngilatit. Travel Trade aqqutigalugu sakkussatit pisariaqartitatit nassaarisinnaassavatit kiisalu nunani allani takornarialerisut Kalaallit Nunaanni sumiiffinni assigiinngitsuni attaveqartilersinnaallugit – taamaalillusi iluatsitasi ilungersuutisilu ilussinni eqqartorsinnaaniassagassigit, pissarsiaqarfiunerusumik akisussaassuseqarnerusumillu takornarialersinnaanersi suleqatigiissutigisinnaanngorlugu.
Qaamatip uuma naalernerani qupperneq tamanut atugassiaq qangarnisaq atorunnaarsinneqavissussaaq. Taamaammat maannangaaq Travel Tradep qanoq atorsinnaanera sungiusarsinnaavat, quppernerup nutaap pilersinnerani arlaannik arajutsisaqarnissat pinngitsoorniarlugu.
Continues further down the page...
Travel Trademi immikkoortut assigiinngitsut ilikkakkit.
Una quppernermi qanganitsami “nutaarsiassanik toqqorsivimmut” assinguvoq. B2Bmi nutaarsiassiat tamarmik tassani nassaassaapput – suut ujartussallugit nalunngereerukku, sammisat naapertorlugit immikkoortiterisinnaavutit. Quppernermi tassani aamma Marketplace toqqorsivik nassaassaavoq (taakkua tassaapput takornarialerinerup iluani nutaarsiassat kingulliit), tassuunalu B2Bmi nutaarsiassat qaammatit tamaasa ingerlaannartumik inboxikkut pisartagarilersinnaallugit.
Umiarsuarnik takornariat pillugit quppernermi paasissutissat pisariaqartitat tamaasa ataatsimut inissinnikuuagut, tikittussat allattorsimaffii, isumannaallisaanermut paasissutissat linkii kiisalu takornariat apeqqutigikkajunnerusaat allallu ilanngussorlugit. Umiarsuit takornariartaatit ornittagaat pillugit aamma immikkut nutaamik qupperneqalerpoq, Kalaallit Nunaanni takornariartaatit ornittagaat tamaasa nunap assingani nammineq ujarlerfigisinnaasanni inissillugit.
Quppernermi sakkussanut tunngasumi makkua nassaarisinnaavatit:
Qupperneq Neqeroorutilinnut tunngasoq atorlugu Kalaallit Nunaanni takornarialerisut kiisalu nunat tamat akornanni agentit Kalaallit Nunaannut takornaariartitsisartut attaveqarfigisartakkatit amerlisarsinnaavatit.
Quppernermi tassani Visit Greenlandimi qanoq iliortoqartarnera atuarsinnaavat – oqaluttuarisaanerput, piginnittut, periusissatut aaqqissuussat allarpassuillu ilanngullugit. Qupperneq Saaffigitigut atorlugu, allaffitsinni marlunni saaffigisinnaasanut tunngasut atuarsinnaavatit kiisalu emailikkut adressit nassaarisinnaallugit, paasissutissanik itisiliisitsiniaruit atorsinnaasatit. Sulisorput aagersimasoq kina saaffigissanerlugu nalunngikkukku, toqqaannartumik saaffiginninnissannut qupperneq Sulisut atoruk.
Forum
Forum nutaaq tassaavoq Travel Trademi nutaaliani pissanganarnerpaat ilaat. Kalaallit Nunaanni takornarialerinermik suliallit – Nunatsinniittut nunanilu allaniittut – naligiillusi isumasioqatigiiffigisinnaasarsi. Sammisat pillugu oqallinnermik aallartitsisinnaavutit imaluunnit allat oqallisissiaannut peqataasinnaallutit. Illit niuerfiit pillugu nutaarsiassat kingulliit aamma tassani siaruaassinnaavatit kiisalu takornarialeriffiit allat nutaarsiassaataannut malinnaasinnaallutit. Sammisaqarfik qaammatip qulliata ingerlanerani aallartissinnaassasoq naatsorsuutigaarput, aallartinniariarpallu paasissutissanik qanorlu atorneqarsinnaaneranik nalunaaruteqarumaarpugut.
Quppernerit Allat
Quppernerni tassani nassaassaapput immikkoortut pingasut saqqaata qulaani ilanngunneqanngitsut pingasut. Taakkua tassaapput: Tusagassiuutit kiisalu Avammut paasititsiniutit, Niuerfigineqartut Ineriartortsinneri kiisalu MICE.
Tusagassiuutinut Avammullu paasitsiniutit pillugit qupperneq, tusagassiortunut, sunniuteqartartunut imaluunniit Kalaallit Nunaannukarnissamini sponsoreqalerusuttunut pingaarutilinnik imaqarpoq. Niuerfigineqartut ineriartortinnerannut tunngasortaani, niuerfiit Visit Greenlandimit pingaarnertut anguniarneqartartut, takornariat assigiinngiiaartut anguniarneqartut kiisalu pisoqartitsinerit takornarialeriffiillu allat suleqatigisartakkagut nassaarineqarsinnaapput.
MICE naalisagaavoq – Meetings, Incentives, Conferences and Exhibitions, taannalu Kalaallit Nunaanni takornarilerinerup nioqquteqarfigineranut atatillugu nutaajukannerpoq. Kalaallit Nunaata niuertunut pisoqartitsivitsialaaneranut pissutissarpassuaqarmat, Kalaallit Nunaat MICE naapertorlugu ornitassatut immikkuularissutut puigunaatsutullu nunarsuup sinneranut nittarsaanniarsaraarput. Quppernermi tassani MICE kiisalu Kalaallit Nunaanni taamatut neqerooruteqareersut pillugit annertunerusumik paasisaqarsinnaavutit.
Takornarialerininni pisariaqartittatit tamaasa Travel Trade aqqutigalugu pissarsiarisinnaassagitit neriuutigaarput. Apeqqutissaqaruit imaluunniit akineqarusukkuit tusarfiginissannut qilanaarpugut. Sammisaqarfiup immikkoortortaani ‘Sammisaqarfimmi akissuteqarneq’ atorlugu imaluunniit b2b@visitgreenland.com aqqutigalugu allaffigiinnariaavatsigut.
