Nunat tamat akornanni niuerneq pillugu saqqummersitsinerit peqataaffigissagaanni annertujaamik aningaasaliissuteqartoqartariaqartoq nalunnginnatsigu, taava peqataanissat sooq soqutigisinnaaviuk? 2019imi niuernermik saqqummersitsinernut annertuunut, sumiiffinni takornarialerisut peqataasut sooq peqataanerlutik sumullu iluaqutaaneranik nassuiaataat katersukkagut uani ilannguppagut.
Continues further down the page...
Taanna ukiumoortumik aaqqissuunneqartartoq annertooq, Misigisassarsiorluni Angalaneq pillugu Niuernermut Kattuffik – Adventure Travel Trade Associationimit aaqqissuunneqartartoq, misigisassarsiorluni angalanermik inuussutissarsiutillit nutaanik attaveqaqatissarsiorlutik, ilinniaqatigiillutik, suliaminnik annertusaallutik kiisalu suleqatissarsiorlutik, assigiinngitsunik aaqqissuussat ulluni tallimani misigisaqarfigisarpaat. 2019imi taanna Gøteborgimi Visit West Swedenimit aaqqissuunneqarpoq.
ATWSip aaqqissuunneqartarnerani 2019 siullerpaamik Kalaallit Nunaat immikkut “lounge”-mik iniffissaqarpoq. Taamaalilluta saqqummersitsisoqarnerata nalaani ullut tamaasa Kalaallit Nunaannut tunngasuinnnaat immikkut inigisatsinni saqqummersissinnaagatsigit, sumiiffinni aaqqissuussisartut DMOt allallu takornarialerisut aaqqissuusseqatigisinnaallutigit.
“Angallassisarnerup silarsuaani aallarterlaatut ATWS-mut peqataasimanerput pissarsiaqarnaqaaq, matunik nutaanik periarfissanillu nutaanik ammaassisuuinnarnani aamma ilinniutaalluarami.”
– Adam Kjeldsen, Two Ravens
“Inuussutissarsiortunik amerlanerusunik suleqateqarusulluta peqataavugut. Pitsaasumik suleqateqalernissaq sivisunerusumik anguniagassaasoq paasinikuuarput. Ilumoorussilluta sulinerput sivisuumillu suleqataasinnaanerput takutinniarlugu ukiut marluk malitsiinnarlugit ukiumoortumik saqqummersitsinerit aalajangersimasut peqataaffigisarpagut.”
– Martin Sørensen, Greenland Fiord Tours
“ATWSimi pitsavinnik atassuteqarfissaqalerpunga. Takornarialerineq ataatsimut isigalugu aamma paasisaqarfiginerujussuuara. Kalaalllit Nunaanni atassuteqarfissakka saqqummersitsinermi naapitakka aamma qulananngitsumik sunniuteqarluarumaarput.”
– Salik Parbst Frederiksen, Tasermiut Camp
Tulliani ATWS Australiap Kujataani, Adelaidemi oktobarimi 2020 ingerlanneqassaaq, peqataanissamullu nalunaartoqarsinnaalereerluni. Aaqqissuussaq taanna pillugu uani atuarit.
Seatrade Cruise Global umiarsuarnik takornariartitsisarneq pillugu katerisimaarnerit nunarsuatsinni annersaraat. Ukiut tamaasa taanna apriilimi Floridami Miamimi ingerlanneqartarpoq. 2019imi taanna aaqqissuussaq Kalaallit Nunaanni suliffeqarfiit 13it aallatitaasa amerlaqisut peqataaffigaat.
“Mingutsinaveersaarluni takornariaqarneq uagulli akornatsinnitut sammineqarluarmat katerisimaaqataaneq assut eqqarsalersitsivoq. Innuttaasut politikerillu akornanni aamma paasinnilluarlutik takornariartitatsinnik akuerinnissinnaajuarnissaat neriuutigaara.”
– Pitsi Høegh, Greenland Sagalands
“Kalaallit Nunaanni umiarsuarnik takornariaqarnerup annertusarlugulu inerisaaffiginissaanut una katerisimaarneq amerlaqisutigut periarfissiivoq, kiisalu takornariat taakkualu angallannissaannut pisariaqartitat atortussallu aningaasaliiffiginissaannut periarfissiilluni. Taammaammat Miamimi peqataanerput pingaaruteqarpoq, siunissamimi niueqatissagut tassani naapikkatsigit.”
– Jørgen Larsen, Albatros Arctic Circle
“Seatrade aatsaat peqataaffigaara, mailikkullu oqarasuaatikkullu taamaallaat ilisarisimasagut amerlaqisut naapillugit aamma pissanganarlunilu pissarsinaqaaq. Inuttut naapeqatigiinnerup kinguneranik, takornariartaatinik umiarsuaatilinni angalanissanik aaqqissuisartut, toqqissisimanerullutik Kalaallit Nunaanni angalatitsisinnaalernermikkut aamma immikkuullarinnerusunik amerlanerusunik misigisaqartitsinissaminnik neqerooruteqarsinnaalerput.”
– Henrik Skydsbjerg, Tupilak Travel
Visit Greenlandimi akornusersuutaanngitsumik takornariaqarnerup anguniagarinera eqqaamallugu 2021miit siumut Seatrade Cruise Global peqataaffigisassavarput. Nunanut tamanut atassuteqarnitsinni avatangiisinut sunniuteqarnerput annikillisarniaatigalugu, siunissami umiarsuit takornariartaatit minnerit, ilisimasassarsiuutitut ittut, samminerunissaannut aalajangiinerput aamma eqqaamassavarput. Seatrade Global Kalaallit Nunaanni sumiiffinni takornarialeerisunit peqataaffigineqartuartassaaq, kiisalu Visit Greenland Seatrade Europemut peqataatitaqartuartassalluni, taannalu tulllianik 2012imi septembarimi Hamborgimi ingerlanneqassalluni. Seatrade Europe kiisalu Seatrade Global pillugit annerusumik atuarit.
Vestnorden tassaavoq Nunani Avannarlerni Killerni – Kalaallit Nunaat, Island kiisalu Savalimmiut – ukiumoortumik niuerneq pillugu saqqummersitsisarneq, sumiiffinni takornarialerisut nunani allani 20t sinnerlugit amerlassusilinni pisisartumik naapinnissaannut periarfissarisartagaat. Taanna 2019imi Savalimmiuni ingerlanneqarpoq.
“Taanna uannut saqqummersitsisarnerit pingaarnersaraat, tassanimi takornarialerisut ulluinnarni suleqatigisartakkakka aammali Kalaallit Nunaannukartitsisartut niueqatigisartakkakka naapittarpakka. Qanimut suleqatigiilernissatsinnut tamatumalu attatiinnarnissaanut taanna periarfissiisarpoq.”
– Lisbeth Andersen, Greenland Travel
“Niueqatigisartakkat attavigisakkallu naapinnissaannut kiisalu naapitat allat suleqatigilernissaannik pilersitsinissamut, allallu aatsaat naapitat attaveqaqatigilernissaannut Vestnorden periarfissiivoq.”
– Anders Lykke Laursen, Nuuk Water Taxi
Vestnorden nunat pingasut taakkua paarlakaallutik ingerlattarpaat, 2021milu Kalaallit Nunaanni ingerlanneqaqqittussaalluni. Taamaammat pisisartut attaveqarfii 2021mi Kalaallit Nunaanni naapikkusutavit attaveqarfiginissaannut Vestnorden 2020 periarfissatsialaavoq. Taanna saqqummmersitsineq pillugu uani atuarit.
2020mi niuerneq pillugu saqqummersitsinissat Visit Greenlandip peqataaffiginiagaasa allattorsimaffii piniarlugut una tooruk.
Niuerneq pillugu saqqummersitsinernut angalanerup tapiiffigineqarnissaanut ilaanni qinnueqartoqarsinnaasarpoq. Greenland Business avataanut niuernermut anigaasaateqarfeqarpoq ilaanni tapiisartumik. Attaveqarfigikkit annerusumik paasiniaavigalugit.
Niuerneq pillugu saqqummersitsinernut peqataasinnaanerit pillugu apeqqutissaqaruit, qinnuigaatsigit una aqqutigalugu attaveqartfigeqqulluta; b2b@visitgreenland.com.
