Kalaallit Nunaata Amerika Avannarlermut niuerfinnut attaqaveqarnini nukittorsarpaa, sapaatip akunnera kingullermi The Nordics North American Roadshow-imi peqataareerluni – Nunat avannarliit arfineq-marluk akornanni ukiorpanngortuni suleqatigiiffiat, angallannermik takornariagassatut ornitassat akornanni attaveqaatinik pilersitsinissamik nunavillu akimorlugu angalatitsivinni takornariartitsisartunik pingaarutilinnik pilersitsinissamik siunertaqartumut.
Ukioq manna roadshow-imi tikinneqqarput Seattle, Toronto aamma New York, tassani nunani avannarlerninngaanniik sinniisut angallannermi suliaqartunik ataatsimeeqateqarput misilittakkanik avitseqatiginiarlugit, attaveqaatit nutaat pilersinniarlugit siunissamilu suleqatigiinnissamut periarfissat pillugit oqaloqatiginiarlugit.
Anne Nivíka Grødem, Visit Greenlandimi pisortaq oqarpoq:
”Amerika Avannarlermit tikikkuminarnerulerneq aallaavilugu Nunatsinnik alutorinnillutik misigisassarsiorlutik takornarianut tulluarsakkamik tuniniaavimmik ineriartortitsinissamut periarfissaqalerpugut. Massakkummi siunissamilu suleqatissat toqqaannaq attaviginiarnissaannut, takorluugaasa naalaarnissaannut, takornariartitsinerup massuma utertitsivigineqarnissaanut aammalu tuniniaanermi ilisimasaqalernissap angusaqarfiunissaanut angalatitsisartunut una periarfissatsialassuuvoq.”
Kalaallit Nunaat ukunannga sinniisuutitaqarpoq Travel By Heart, Greenland Travel, Hotel Aurora aammalu DMC Nordic Greenland – sinniisuutitat ilai misilittagartuujullutik aammalu ilai siullermeerlutik peqataallutik, tamarmilli attaveqaatiminnik annertusaanissartik pilerigilluinnarsimavaat aammalu nunatta takornariartitsivissatut periarfissaasinnaasut annertusiartuinnartut saqqummiussimallugit.
Ukioq manna juunimi New Yorkimiit (Newark) Nuummut toqqaannartumik timmisartuussisalernerit atulersinneqarneranninngaanniit, Amerika Avannarlermi takornariaqarnikkut nittarsaassinikkut aaqqissuussaq anginerpaaq aaqqissuussinermi matumani malunnartinneqarpoq. Silaannakkut angallassinerit annertusarneqarnerat ingerlaannassaaq, tassami United Airlines ukiup tulliani Nunatsinni angallasseqqissammat, taamaalilluni Amerika Avannarliup nunalluissittup akornani angallassinikkut nukittorsaasoqaqqissalluni.
Roadshow-ip nalaani takornarialerisut peqataanerini Nunatsinnut soqutiginnittoqaleriartuinnarnera ersersippaat, piujuartitsillunimi takornariaqarnerup iluani ornitassami periarfissat pillugit pisiortortartunit angalatitsiverujussuarniit aalajangersimaqqissaartunik sammisaqarluni takornariartitsisartunit paasisaqarfigineqarnerunissaat kissaatigineqarpoq.
Hotel Aurorami pisortaq Klaus Dupont Iversen, ima oqaaseqarpoq:
“Kalaallit Nunaannik ilisimasaqareersut takornarialerisut soqutiginninnerujussuat misigaarput, oqaloqatigiinnerillu siornatigornit amerlanerusunik isumaqatigiissutinik tigussaasunik isumaqatigiissusiorfiupput. Amerikap avannaani niuerfimmi periarfissat nutaat, New Yorkimut toqqaannartumik aqquteqalernerata ammaappai.”
Kalaallit Nunaata nunani avannarlerni suleqatigisaminut qutsavigaa ataavartumik suleqatigiinnermut ataatsimullu suliniuteqarnermut akisussaassuseqartumik takornariaqarnerup ineriartortinnissaanut ataatsimoorlutik aallussinerannut.
Continues further down the page...
