Kalaallit Nunaanni qaqqatigut cykkilerneq? Eqqarsaat tamanna asseqanngilluinnarpoq, Chris Winterilli inuit nutaaliornernut qulartut aatsaat tusalinngilai. Big Mountain Bike Adventuresimik piginnittup cykkilerlutik misigisassarsiortartut eqimattakkaat nunarsuatsinni sumiiffinni immikkuullarissuni 20ni inissitsiternikuuai. Tamakkua iluatsinnissaannut sumiiffinni najugallit sumiiffinni pissutsinik ilisimasaqarnerpaat apeqqutaalluinnarput, taanna oqarpoq.
“Qaqqatigut cykkilertitsinermi sumiiffimmi pissutsinik ilisimasaqarluarneq pisariaqarluinnarpoq”
Continues further down the page...
“Qaqqatigut cykkilertitsinermi sumiiffimmi pissutsinik ilisimasaqarluarneq pisariaqarluinnarpoq”, taanna oqarpoq. “Sumiiffinni najugallit aqqutigisinnaasanik nassaarniarnermi akunnattoorfinnilu oqaatsitigut ikiortissatut pisariaqartinneqartarput.”
Assersuutigalugu 2019imi septembarimi Ilulissanut Sisimiunullu paasisassarsiutigaluni qaqqani cykkilernermik Winter aaqqissuussigami, Sisimiut Boat Safarimimik ingerlatsisutut Jan Banemannitut ittut isumalluutigai.
“Sumiiffimmi pissutsinik kisialu avinngarusimasumut imaatigut angallassinissamik ilisimasaqarluarmat, Jan ikiortigilluarparput,” Winter oqarpoq. “ Angalatilluta arlaatigut mekanikkimik, timikkut ajutoornermik imaluunniit silamik unammilligassaqalersimassangaluarutta taanna siunertatta anguniarnerani peqataalivissagaluarpoq. Angallavissat aaqqissuunnerisa saniatigut sumiiffinni najugaqavissut sammisarneri puigunaanersaapput.
” Ukiuni 20ni angallavissanik aaqqissuussisarnermini Winterip nalunngilaa, utikallluni niuerniartarnini aamma naleqartoq. Sumiiffinni inuiaqatigiit ikittunnguakkaanik angalatitsisarnernit iluanaarutissaqartaqaat, akornusersuutaanngitsumik takornariaqarneq pillugu immikkut ilisimasalik, Kelly Galaski, oqarpoq.
Ikittunnguakkaarlutik angalaqatigiittut sivisunerusumik ornitaminniikkajunnerusarput, aningaasartornerusarlutik kiisalu soorlu amerlasuukkaarlutik angalasunit umiarsuarnillu takornariartaatinit aningaasanik amerlanerusunik inuiaqatigiinni aningaasaqarniarnermut tunniussaqarnerusarlutik, angingaasaateqarfiup iluanaaruteqarniarani nunarsuarmi tamani aaqqissuussisarfiup, Planterra Foundationip, pisortaa oqarpoq. “Ikittuinnakkaarlutik angalaqatigiinnik angalatitsisartut aamma nalinginnaasumik anguniagarisarpaat, ornitaminni inuiaqatigiinnut sapinngisamik pitsaasumik sunniuteqarnissartik,” Galaski oqarpoq. “Tamakkua angalatittagaasa taakkunani inniminniinerminnut pissutigisarpaat, sumiiffinni najugaqavissunik niuertunillu sammisaqaqateqarsinnaanisssartik.”
Angallassivik, G Adventures, Planterramit misissuiffigeqqissaarneqarmat paasineqarpoq, ikittunnguakkaarlutik angalasut inuiaqatigiit tikitamik aningaasatigut kaaviiaartitsinerannut tapertaalluartartut: $1,000 sumiiffimmi akunnittarfinnut qulinut atorneqaraangata, $8,000 nalingisa kaaviiaartinneqartarnerannut tunngaviusarput. Sumiiffinni sullissisunut G Adventuresimit dollarit tamarmik akiliutigineqartut pisiniarfinnut pisiniutigineqarlutik atorneqaqqittarput, pisiniarfiillu aamma najugaqavissunit pilersorneqakkajullutik, taakkualu suli niuertumit najugaqavissumit pilersorneqarsinnaasarput, sulilu taakkua niuertunit allanit pisisimasinnaasarlutik, Galaski nassuiaavoq.
Amerlasuukkaanik angalatitsisartut amerlanerusunik tikititsisaraluarlutik, nalinginnaasumik sivikinnerusumik tikitaminniikkajunnerupput, tamakkununngalu atatillugu aningaasartuutit annertunerusarmata suliffeqarfiit annerusut najugaqavissunit pigineqanngitsut isumagisarpaat iluanaarutigalugillu. Taakkua aningaasartuutaasa ilaat ikinnerusut, inuiaqatigiit tikinneqartut akornanni kaaviiaartinneqartarput, Galaski oqarpoq.
“Takornarialerinerup iluani iluatsitsinerit naatsorsorneqakkajupput kisitsisit, kisitsisit sulilu kisitsisit atorlugit,” taanna oqarpoq. “Aningaasalli amerlasuukkaat akornusersuutaasunik kinguneqakkajunnerusarput. Uagut isumaqarpugut, takornariat tikitaminnut iluanaarutissiisarneri naapertorlugit iluatsitsinerit nalilersorneqarunik pitsaanerussasoq.” Winterip tamanna periuseraa: “Tikitatta aningaasaqarniarneranut aningaasanik amerlanerusunik qanoq ililluta tunniussaqarsinnaanerput ujartortuaannarparput.”
Ikittunnguakkaanik angallassiviit pillugit Winterip ilisimasai aallaavigalugit allatat ataani atuakkit.
Pinngortitami misigisassanut uanga pilersinniakkannut atatillugu, annerusumik sumiiffinni pissutsinik ilisimasallit isumalluutigisarpakka. Avinngarusimasumi aqqutissat arlalllit tikillugit, sorliup ingerlaviginissaanik ilisimannittut ingammik isumalluutigisariaqalertarpagut. Timaani angalanerinnarmi ilisimasortat pisariaqartittanngilagut. Oqaatsitigulli akunnattoornerni imaluunniit ajutoortoqassangaluarpat ilisimasortat aamma isumalluutigisussaavagut. Angalaniarnermi sila imaluunniit mekanikkimut tunngasut akornusiitillugit periarfissarsiornitsinni aamma pissutsinik sungiussisimasut pisariaqartittarpagut. Angalanermi akornutissaqalersillugu periarfissat taakkua ilisimasussaavaat.
Kalaallit Nunaannut angalaniarnerup aaqqissuunniarnera ajornakusooqaaq. Tamanna orninniaraanni ajornakusoortoqartarnera nalinginnaaginnrsoraara. Internetsikkut aallarteriarlunga Visit Greenland ikiortiseraara. Taakkua ikiuiumatoqaat. Taamatullu Jan nassaaralutigu. Arctic Circle Racemi aqqutikkoornissatta ingerlaqqinnissattalu aaqqissuunnerani taassuma ikiorpaatigut. Tamakkua piareermata aallaannariaalerpugut. Angallavissamik aaqqissuileraangama akiliisunik angallassilertinnanga, periarfissat pitsaanerpaat ujartorlugit uanga nammineq paasisassarsiorlunga misileraaqqaartarpunga.
Tamakkua saaffigiinnarsinnaavaatigut, sunillu neqerooruteqarnerlutik oqaluttuulluta. Angalanerit assigiinngittuaannarput. Paasiniaasarluta misigisassat sunik ilaartorlugit qanoq pitsanngorsaasinnaanerput sulissutigiuaannarparput. Angalanerit aaqqissuussagut kingulliit ingammik pitsanngorsagaapput.
Uagut avinngarusimanernut angalanerukkajunneruvugut. Angalasartut 90 procentii allatut misigisassarsiortarput. Aqqutit nungullarnikut uagut aqqutigineq ajorpagut. Tanatuma kinguneranik uagut angalaqatigut sumiiffinni ikittuinnarnik takornariaqartartuni aningaasartuuteqartarput.
Schweitzimi akunnittarfik Hotel Le Vallée Verbierip kujataani qooqqumi inissisimavoq. Ukiut 15it matuma siorna tassani siullermik najugaqarpunga. Qaqqatigut cykkilertartunik najugaqartoqarnissaa pillugu siullermik saaffigeqqaaratsigit, taakkua akipput, “Suna?” Paasinngeqqaaraluariarluta suut piumasarinerlutigit oqaluttuukkatsigit tapersersuilluarput. Taakkua biilinik tamatta angallatigisinnaasatsinnik piseriarlutik cykkilinut inissiivilerpaat. Uagut pisariaqartitagut ilinniutigalugit timersoriaaseq taanna sammillualeramikkut, maanna iluatsilluartumik ingerlatsilerput.
Angalanitsinni amigaatigisarput tassaavoq sumiiffinni najugaqavissut akorngini pissutsit kulturillu malugisaqarfiginerunissaa. Angalasarninni puigunaatsinnerpaavakka nunap inoqqaavi sammisaqaqatigisarneri kulturillu assigiinngitsut ilinniartarneri. Ungasinngitsukkut Indonesiamiillunga inuit angerlarsimaffiinut pulaartarnera nuannareqaara, soorunami ataqqinnillunga, qanoq inooriaaseqarnersut takullugit. Kalaallit sammisaqaqatiginissaannut kiisalu kulturiannut tunngasut piviusumik misigisaqarfiginissaannut periarfissat amerlippata, tamanna misigisinnaasatsinnut pitsannguutaassasoq ilimagaara, angalatitatta aamma tamanna iluarissangaluaqaat. Inuilaarsuup, ilulissat arferillu misigisaqarfiginerisa saniatigut aamma tamanna periarfissaasinnaapput nuannissaqaaq.
2019imi septembarimi Kalaallit Nunaata kitaani iluatsittumik angalanerup kinguneranik, Kalaallit Nunaanni cykkilerluni misigisassarsiorneq angalatitsiviup Big Mountain Bike Adventuresip neqeroorutiminut ilannguppaa. Angalatitassaat siulliit 2020mi septembarimi tikissapput.
Allattoq Ryan Stuart
