Takornariaqarneq inuiaqatigiinni assigiinngitsutigut kalluaavoq – aningaasaqarnikkut, suliffeqarfeqarnikkut, kulturikkut ulluinnarnilu inuunermik. Taamaattumik takornariaqarnerup nalinga innuttaasutut paasinissaa taavalu ineriartortitseqataanissatsinnut isumassarsiorfigisinnaanissaa pingaaruteqarpoq. Tamanna tunngavigalugu Visit Greenland-ip Nunarput Nuan, Facebookkimi qupperneq, pilersippaa, tassanilu takornarialerinermi periarfissanik atorluaanissamut oqaloqatigiinnissamut kikkulluunniit tikilluaqqusaallutik.
Inuppassuit Nunarput Nuann COVID-19-ip tuniluunnerani paasisitsiniutitut eqqaamassajunnarsivaat, tassani Visit Greenlandip innuttaasut nunatta iluani sulinngiffeqarlutik angalanissaanik kaammattorpai. Maanna Nunarput Nuann atuutilersinneqaqqippoq, ilisimasanik avitseqatigiiffittut ataatsimullu nunatsinnik tulluusimaarutiginninnitsinnik siammarterivittut atussalluni.
“Kalaallit Nunaata nunarsuarmit tikitassatut pilerinarsarnissaa Visit Greenlandimi suliassatta pingaarnersaraat, tamannalu attattuassavarput. Innuttaasunulli avitseqatigiiffissamik pilersitsinissamut aamma akisussaaffeqarluta takusinnaavarput, tassani innuttaasut kikkulluunniit takornariaqarnerup ineriartorneranut malinnaasinnaassallutik, ineriartornermilu tassani peqataanissaminnut kajumissuseqalersinnaassallutik.” Visit Greenlandimi pisortaq, Anne Nivíka Grødem, oqarpoq.
Innuttaasut quppernermi Nunarput Nuan-imi oqaluttuanik isumassarsiorfiusinnaasunik taavalu takornariaqarnerup Kalaallit Nunaanni inoqarfinnut sunniutaanik paasissutissanik nalaassinissartik naatsorsuutigisinnaavat. Takornariaqarnerup pitsaaqqutai unammillernartuilu quppernermi takusinnaassavatit, innuttaasullu taakkua qanoq iliuuseqarfigisinnaanerlutigit paasisaqarfigisinnaassallugu. Quppernermi uani takornarialerisunit oqaluttuat nunatsinniillu oqaluttuat siammarterneqartassapput, taamaasilluta nunap ilaani najukkani assigiinngitsuni takornariaqarnerup sunniutai pingaassusaalu, kiisalu takornariaqarnerup ineriartornerata Kalaallit Nunaannut pitsaasuunissaa ataatsimoorluta qanoq qulakkeersinnaanerlutigu paasisaqarfigisinnaassallutigu
“Nunarput Nuan atorlugu takornariaqarnerup ineriartorneranik malinnaatitsinissarput peqataatitsinissarpullu kissaatigaarput. Takornariaqarneq innuttaasunit ikorfartorneqartilluni iluatsilluarnerusartoq nalunngilarput, taamaattumik takornariaqarnerunissaq uani anguniagarinngilarput, ataatsimoorlutali pitsaanerusumik takornarialerinissarput anguniarlutigu. Nunarput Nuann atorlugu takornarialerinermi periarfissanik akisussaassuseqartumik kivitseqatigiinnissamut tikilluaqqusivugut,” pisortaq oqarpoq.
Nunarput Nuan Facebookkimi quppernertut taamaallaat saqqummernavianngilaq, ukiunili tulliuttuni nuna tamakkerlugu aaqqissuussanik malitseqarumaarluni. Aaqqissuussat taakkua takornarialerineq pillugu oqaloqatigiinnernik ataavartunik periarfissaqartitsissapput, tassani nunap ilaani najukkani assigiinngitsuni innuttaasut naapisinneqarlutik najukkaminni eqqaanilu periarfissanik unamminartunillu oqallisigisaqarnissaat anguniarneqassalluni. Inuit tusarneqarnissaat taavalu innuttaasut qanimut suleqatigalugit takornarialerinerup inerisarnissaa Visit Greenlandip taamaasilluni qulakkiissallugu kissaatigaa.
Malinnaagit, takornarialerinerup ineriartornera paasisaqarfigiuk – qanorlu tamanna peqataaffigisinnaanerlugu isumassarsillutit: https://www.facebook.com/VGNunarputNuan
Continues further down the page...
