Ulloq 1. septemberi 2025
Takornariartitsineq ineriartorfiulluarpoq, nunatsinnullu tikeraartartut ukiut tamaasa
amerliartuinnarput. Tamannalu periarfissanik pilersitsivoq, aammali ulluinnarni inuunermut
qanoq sunniuteqarnera pillugu apeqqutinik pilersitsilluni. Visit Greenlandimi nalunngilarput
takornariartitsisarneq aatsaat akisussaassusilimmik ineriartortinneqarsinnaasoq innuttaasut
tusaaniarneqarpata peqataatinneqarpatalu. Taamaattumillu eqqartueqatigiinnertalimmik
ataatsimiinnissamut qaaqqusivugut, inoqarfinnilu innuttaasut tamarmik eqqarsaatiminnik,
misilittakkaminnik isumassarsiaminnillu oqaloqatigiinnermi eqqartueqataasinnaassapput.
Suliniutip immikkoortuani siullermi sumiiffinni ukunani ataatsimiititsisoqassaaq:
Qeqertarsuaq, Ilulissat, Kangerlussuaq, Tasiilaq, Nuuk, Qaqortoq aamma Qaanaaq
Eqqartueqatigiinnertalimmik ataatsimiititsinerit siunertaraat innuttaasut inuiaqatigiinni
ataatsimoorlutik oqaloqatigiinnissaannut periarfissaqartinnissaat. Oqaloqatigiinnerit
toqqissisimanartunik sinaakkuteqartinneqassapput ammasumik ataqqeqatigiissumillu
ingerlanneqassallutik – ilungersunartut, quianartut Araba kaffilu mamartoq
inissaqartinneqarlutik. Innuttaasut misigisartagaat, eqqarsaataat isumassarsiaallu ullormut
oqaluuserisassanngortinneqassapput.
Kikkut tamarmik nipaat pingaaruteqarput
Takornariaqarnerup oqaloqatigiissutigineqarnissaa soorunami illoqarfinni ataatsimiinnerni
taamaallaat ingerlanneqassanngilaq. Ataatsimiinnerimmi saniatigut Facebookimi quppernermi
Nunarput Nuan-imi, takornariaqarnikkut ineriartortitsineq pillugu nutaarsiassanut ilisimasanillu
avitseqatigiinnermut katersuivittut atorneqartumi, paasissutissanik ingerlaavartumik
saqqummiussisoqartassaaq. Tassani innuttaasut kikkulluunniit malinnaasinnaapput,
apeqquteqarlutik isummersorlutillu – nunatsinni sumi najugaqarnertik apeqqutaatinnagu.
Tamatuma saniatigut nuna tamakkerlugu misissuineq aallartinneqartussaavoq, innuttaasut
takornariartitsinerup ulluinnarni inuunerminnut qanoq sunniuteqartarneranik
misigisartakkaminnik apuussinissaminnut periarfissinneqassallutik. Taamaaliornikkut innuttaasut
kikkulluunniit tunniusseqataanissaminnut periarfissaqassapput – eqqartueqatigiinnertalimmik
ataatsimiititsinerni najuullutik, imaluunniit digitalitigut apuussaqarlutik peqataagunik.
Aammattaaq Visit Greenland suliniutinut, aaqqissuussinernut suleqatigiinnernullu atatillugu
nunatsinni illoqarfinnut inoqarfinnullu akulikitsumik angalasarpoq. Taakkunanilu innuttaasunik
oqaloqateqarnerit ingerlaavartumik pisarput, sapinngisamik amerlanerpaat
apuussisinnaaqqullugit. Taamaattumik illoqarfinni taaneqartuni
najugaqanngikkaluaraanniluunniit Nunatsinni takornariartitsisarnerup qanoq ineriartornera
pillugu ataatsimoorluni oqaloqatigiinnermi tusaaneqarnissaq oqaaseqarnissarlu suli
periarfissaassaaq.
Suliniut Nunarput Nuan pillugu
Suliniut Nunarput Nuan Visit Greenlandimit, EU-p Mingutsitsinngitsumik Siuariartortitsinermut
Aningaasaataanit aningaasalersugaavoq Grønlandsbankenillu Inuussutissarsiornermut
aningaasaateqarfianit tapersersorneqarluni. Siunertarineqartoq tassaavoq suliniut aqqutigalugu
eqqartueqatigeeriaatsinik misileraanissaq tassuunalu eqqartueqatigiinnermut ilusiliamik
ineriartortitsinissaq takornariartitsinerup ineriartornera pillugu innuttaasut
oqaloqatigiinnissaannut periarfissaqalersikkumallugit, takornariartitsisarneq najukkani
inuiaqatigiinnut nakuussutitut pisuussutitullu ineriartortinneqarnissaa misigineqarnissaalu
siunertaralugu.
Innuttaasut, peqatigiiffiit ataatsimoorfiillu allat eqqartueqatigiinnermut peqataanissamut
misilittakkaminnillu, isummersuutiminnik isumassarsiaminnillu avitseqatigiinnissamut
kaammattorneqarput. Nuna tamakkerlugu sumiiffinnilu aaliangersimasuni Peqatigiiffiit
soqutiginnittut, takornariartitsineq pillugu isummersuutigisaminnik saqqummiussiniarlutik Visit
Greenlandimut saaffiginnissinnaapput uunga: [email protected]
Continues further down the page...
