Tassanilu niueqatigiinnissamut periarfissanik misissuillutik ilisareqatigiinnerulernissarlu siunertaralugu nunani killerni avannarlerni takornarialerisut angalanissanillu tuniniaasartut nunarpassuarneersut naapeqatigiissapput.
Nittarsaassinermi inuit 420-nit amerlanerit peqataassapput, ataasinngornermilu ualikkut ammaanersiornersuarmi pingaarnertut aningaasaliisuusoq Air Greenland tikilluaqqusisuussooq. Nunani tamalaaneersut angalanissanik tuniniaasartut tusagassiortullu 230-nit amerlanerit, Savalimmiuniit, Islandimiit nunatsinniillu takornariaqarnermik ingerlatsisut naapissapput.
Visit Greenlandimi pisortaq Anne Nivíka Grødem oqarpoq: ”Qaaqqusisuusutut Kalaallit Nunaata angallavissatut immikkuullarissutut nittarsaannissaa, taamaasillutalu tikeraat kissaataat malillugit misigisassarsiornissanik neqeroorfiginissaannut periarfissat atorluarsinnaavagut.”
Angalanissanik tuniniaasartunit takornariaqarnermillu ingerlatsisunit Vestnorden soqutigineqarluarpoq, peqataanissamullu nalunaarfissap ammarnerata kingorna qaammat ataaseq qaangiutiinnartoq Visit Greenlandip inissat tamakkertut nalunaarutigaa.
Pisortarli erseqqissaavoq nittarsaassinerup siunertarinngikkaa takornarianik amerlanerpaanik tikittoqartarnissaa. Kisiannili takornarissat nunat killiit avannarliit pingaartitaannik soqutigisallit, aammalu nungusaataanngitsumik ineriartornermut – aningaasaqarnikkut, inuiaqatigiinni aammalu avatangiisit eqqarsaatigalugit – tikittarnissaat piumaneqarneruvoq. Tamannalu eqqarsaatigalugu angalanissanik tuniniaasartut tusagassiortullu immikkut paasiniaaffigeqqaarlugit peqataanissamut akuerineqarput.
Anne Nivíka Grødemilu nassuiaavoq: ”Nunatsinni takornariaqarnermik ineriartortitsinerup periarfissaqarneranut aammali isumaalunnartortaanut tunngasunik oqallinneq Visit Greenlandimit maluginiarlugulu peqataaffigisarparput. Periusissiatsinni pingaartipparput nunatta misigisassarsiorfittut tuniniarlugulu nittarsaannissaa, nunatsinni naleqartitat nungusaataanngitsumillu tunngaveqarnerup tikeraanit ataqqineqarnissaa aallaavigalugu. Taamaattumik nittarsaassinermi uani angalanissanik tuniniaasartut qinnuteqarnerini nunatsinni misigisassarsiorfittut pingaartitanut tulluunnerat qulakkeerniarsimavarput.”
Takornarialerisut aammalu nunap immikkoortuini takornariaqarnermik ingerlatsiviit nunatsinneersut nittaarsaassinermi peqataatinnissaat, Visit Greenlandip aamma pingaartippaa, taakkulu Innovation Greenland aqqutigalugu angalanissamut ineqarnermullu tapiiffigineqarnissamut periarfissinneqarput.
Nittarsaassinermi peqataasut isumaqatigiissuteqareerluni naapinnissamut periarfissaqarput, taamasillutillu niueqatigiinnissat nutaat ilisareqatigiinnerillu pitsaasut pilersinneqassapput. Visit Greenlandimit nittarsaassineq takornarianut angalanissanik tuniniaasartut nunanit allaneersut, nunanilu killerni avannarlerni takornarialerisut imminnut nassaaralutik attaveqalersussatut naapiffigissagaat kissaatigaarput.
Anne Nivíka Grødemilu nuannaarluni oqaluttuarpoq: ”Taamatut naapiffiusinnaasumik periarfissaqarneq immikkoortortani takornariaqarnermik ingerlatsisut ikiortigalugit nunatta iluani illoqarfiit nunaqarfiillu tamakkerlugit peqataatillugit ”Naapiffissanik” pilersitsivugut. Angalanissanillu tuniniaasartut taamaasillutik tikitassat assigiinngitsut neqeroorutaat aammalu tikeraat tikikkusutaat ataqatigiisinniarsinnaavaat. Tassa takornariaqarneq nungusaataanngitsoq.”
Angalanissanik tuniniaasartut nittarsaassineq sap.ak. ataatsimik sioqqullugu pre-tour-imut, tassa siusinaarluni angalanermik taasamut, peqataanissamut periarfissaqarput, tassani siunertaalluni nunatsinni tikitassanut immikkorluinnaq ittumik misigisaqaqqaarnissaq. Sumiiffinni takornarialerisut aaqqissugaannik nunatsinni immikkoortortat tamarmik pre-tour -mik ingerlatsiviupput.
Usassaarut soqutigigaanni massakkut uani takuneqarsinnaavoq Vestnordens instagramprofil.
Aamma illoqarfinnut nunaqarfinnullu nittarsaatit uani takuneqarsinnaapput visitgreenland.com.
Nittarsaassinermut Vestnordenimut tunuliaqutaavoq North Atlantic Tourism Association, taassanilu siunertaavoq nunat killiit avannarliit takornariaqarnermik ingerlatsinerisa siuarsarnissaanut suleqatigiinnissaq. Taamaattumik Visit Faroe Islands, Visit Iceland aamma Visit Greenland nikittaallutik qaaqqusisuusarput.
Anne Nivíka Grødem, nivika@visitgreenland.com, tlf. 56 02 82
Continues further down the page...
