Nunat tamalaat akornanni takornarialerisut nukittuut nunatsinneersut

Ukiuni makkunani - minnerunngitsumik Amerikap avannaanneersunit pinngortitamik, eqqissisimaanermik misigisassanillu piviusunik ujartuisunit - Kalaallit Nunaat ornitassatut kajungerineqaleraluttuinnarpoq. Nunatsinni Amerikap avannaa niuerfittutnutaarsiassaanngilaq, taamaakkaluartorli timmisartuussisarnerit USA-mit nunatsinnut toqqaannartut 2025-ip aasaani ammarpata, ajornaannerusumik angalasoqarsinnaalertussaavoq. Angalatitseqatigiiffiillu USA-miittut Canadamiittullu atassuteqaqatiginerisa nukittorsarnissaannut tamanna periarfissiissaaq – takornariallu amerlanerulernissaannut.

Nuuk, ulloq 2. juni 2025

Nunat tamalaat akornanni inuussutissarsiuteqartunut aaqqissuussinermut Denverimi Coloradomiittumi, misigisassarsiortitsilluni takornariartitsinermik ukkassiviusumut Adventure Elevate North America 2025 -mut nunatsinneersut takornariaqarnermik inuussutissarsiornermit aallartitarpaaluit peqataareerlutik uteqqammerput. Aaqqissuussinermut nunanit assigiinngitsunit 46-nit peqataasut 450-it sinnillit katersuupput, taamaalillunilu Adventure Elevatemi katersuunnerit annerpaartaat pisimalerpoq. Tassani nunarsuaq tamakkerlugu angallassisartut, angalanermi agentit takornarialerisullu allat, misilittakkaminnik avitseqatigiinniarlutik niuernikkullu nutaanik attavissartaartorniarlutik naapipput. 

Visit Greenlandip aallartitat nunatsinneersut ataqatigiissagai ukuupput: Arctic Circle Treks, Hotel SØMA, Mikami Guest Houses, Travel by Heart, Two Ravens, Destination Disko Bay, Destination Arctic Circle, Explore North Greenland – kiisalu Visit Greenland.

Visit Greenlandip NALIK Venturesillu akunnerminni ataatsimoorlutik tapiinissamut aaqqissuussinerat aqqutigalugu, peqataaniartut aningaasatigut taperneqarnissaminnut qinnuteqarnissamut periarfissinneqarsimapput. Nunat tamalaat akornanni tuniniaavinnik aamma attaveqarfinnik naapertuuttunik takornarialerisut nunatsinneersut atuisinnaalersinnissaat – taamaalillutillu siuariartornissaminnut nunallu tamalaat akornanni suleqateqarnissaminnut periarfissaasa nukittorsarnissaat matumani aaqqissuussinermi siunertaavoq. 

Aaqqissuussamissaaq Visit Greenland Destination Partneritut peqataavoq, tamatumalu Kalaallit Nunaata peqataanera ersarinnerulersippaa, aammalu pitsaasunik periarfissiiffiulluni nunat tamalaat akornanni takornarialerisut nunatsinnut soqutiginneqisut alapernaaqisullu oqaloqatigineqarnissaannut.

Takornarialerisut nunatsinneersut aaqqissuussanut Adventure Elevatetut ittunut peqataasarnerat, tassaavoq siunissami takornariarumaartussanut suleqatigilerumaagassanullu attaveqaatitaartorniartarneq – Kalaallillu Nunaannik nittarsaassineq. 

Nunatsinni pissutsinut naleqartitanullu naleqquttumik takornariaqarneq ineriartortinneqassaaq. Taamaammat nunat tamalaat akornanni aaqqissuussanut Adventure Elevatekkutut ittunut peqataaneq saqqumilaarniarnerinnaanngilaq – tuniniaavinnummi naapertuuttunut attaveqarnerup, aammalu ersarissumik najukkamik aallaaveqarnissap attatiinnarniarnissaata nukittorsarnissaannut periusissiornikkut sulineruvoq. 

Kalaallit Nunatsinnit suliffeqarfiit qulingiluat aaqqissuussamut peqataanerat,  takornariaqarnerup siunissaata suleqataaffiginissaanut – piffissaq, isumalluuteqarneq pimoorussinerlu atorlugit – piumassuseqartoqarneranik uppernarsaataavoq. Suliniarnerneq nunat tamalaat akornanni niuerfinnik atuilernissamut nukittorsaanerinnaanngilaq, aammali tassaalluni takornarialerisussanut inuussutissarsiuteqartunut najukkamilu inuiaqatigiinnut naleqarnerulersitsiviusinnaalluartoq.