NUNATTA NUNANI TAMALAANI SAMMINEQARNERA

Ulloq 9. jan. 2026

Nunarsuarmi politikkikkut pissutsit Nunatta nunanit tamalaanit sammineqarneranik nunarsuarlu tamakkerlugu tusagassiuutinit allaaserineqarneranik kinguneqaqqippoq. Paasissutissat naleqartitanik nunatut inuiaqatigiittullu ilisarnaatigisatsinnik tunngaveqartut aallaavigalugit Nunatta ersarissumik nittarsaannissaa nuna tamakkerlugu takornariaqarnermut siunnersuisoqatigiiffittut salliutipparput.

Maannakkullu inissisimaffigisatsinni Visit Greenland tigussaasunik suliniuteqarpoq tikeraanik ulluinnarni oqaloqateqartarnissi nukittorsarnissaanut tapersersuisussanik, suliaqarfiit attaveqaatillu akimorlugit ataatsimoorussamik oqariartuutigisanik nukittorsaasussanik, aammalu nunatta tikitassatut tatiginartuunerata attatiinnarnissaanut tapersersuisussanik.

NITTARSAASSINERMI OQARIARTUUTIT ATAATSIMOORUSSAT
Nittarsaassinermi oqariartuutissat nittarsaassinermilu najoqqutassat katersorlugillu pissarsiariuminartunngortippagut, taamaalillusi nammineq attaveqaqatigiittarnissinni aallaavigalugit atorneqarsinnaasunngorlugit. Atortussat oqariartuutissanik qitiusunik, tone-of-voicemik oqaaseqatigiinnillu tikeraanut nunanit tamalaaneersunut sammitinneqartunik imaqarput – nammineq attaveqaqatigiinnissinni, nioqqutit allaaserinerini, nittarsaassinissinni allanilu toqqaannartumik atorneqarsinnaasut.

Oqariartuutissat qitiusut assigiit atornerisigut paasissutissat tikeraanut paasiuminarnerulissapput niuerfimmilu ataatsimoorluta nukittunerusumik inissisimassaagut.

Nittarsaassinermi najoqqutassat nittarsaassinermilu oqariartuutit UANI nassaarisinnaavatit.

PAASITITSINIAANERIT NUNANUT TAMALAANUT SAMMITINNEQARTUT
Visit Greenlandip nunanit tamalaanit maannakkut soqutiginnittoqarnera paasititsiniaanerit nunanut tamalaanut sammitinneqartut marluusut, nunatta kulturianik, inuinik pinngortitaanillu ersarissumik oqaluttuarfiusut, nunanullu tamalaanut saaffiginiakkanut immikkut toqqakkanut sammitinneqartut, nukittorsarnissaannut atorpaa. Paasititsiniaanerit pingaartumik inuit attaveqaqatigiittarfii aqqutigalugit ingerlanneqarput, oqariartuutilli attaveqaqatigiinnerni tamani assigiimmik ataqatigiissinneqarput aallaqqaataaniillu nunani tamalaani saaffiginiakkanut sammitinneqarsimallutik, oqariartuutit attaveqaqatigiinnitsinni tamarmiusumi siammasissumik atorneqarsinnaasunngorlugit.

Nunarput tamakkerlugu takornariaqarnermik inuussutissarsiuteqartut kaammattorneqarput namminneq attaveqaatitik aqqutigalugit atortussanik nassiussueqqullugit, aammalu oqaluttuat namminneq suliniutigisaminnut, takornarianik sullississutiminnut nioqqutiminnullu toqqaannartumik ataqatigiissinnissaannut. Taamaaliornikkut paasititsiniaanerit najukkamit toqqammaveqassapput sunniuteqarsinnaanerussallutillu.

Paasititsiniaanerit marluusut tassaapput:

• ‘SHHH…’ – nipaannerup Kalaallillu Nunaata nunarsuarmi nipiliorfiusumi qasuersaarfissatut qaqutigoortutut misiginissaanut qaaqqusissutaasoq.
• ‘We Are Kalaallit Nunaat’ – inooriaasitta, naleqartitatta nunatsinnillu immikkuullarissunngortitsisut qulequttat aqqutiginagit nunami naapinnerini misigisassat oqaluttuarinerat.

Paasititsiniaanerit Visit Greenlandip nittarsaassinermi oqariartuutigisai aallaavigalugit ineriartortinneqarput attaveqaatitsinnilu ingerlareerlutik. Ilissinnut pissarsiariuminartunngortikkumallugit paasititsiniaanermi videonik atortussat UANI katersorpagut attaveqaatissinnilu piumasassinnik atorsinnaavasi.

Paasititsiniaanerni siunertaavoq:

• tuniniaanissinni tunisassinnillu tapersersuinissaq tikeraat Nunatsinnut piukkunnaateqareersut soqutiginninnerisa inniminneerusunnerisalu attatiinnarniarnerisigut – taamaaliornikkullu nangaassuteqartoqarsinnaanera taamaatitsisoqarsinnaaneralu annikillisarlugit,
• tikeraanik oqaloqateqarnerup oqilisarnissaa qanilaartumik misigisaqartitsinikkut erseqqissumillu attaveqaqatigiinnikkut eqqissisimanermik erseqqissusermillu pilersitsinikkut,
• pissusissat, oqaatsit oqariartuutillu qitiusut suut atornissaannut ataatsimoortumik aallaavissaqartinnissarsi, nittarsaassinissinni tikeraanillu suleqatinillu attaveqaqateqarnissinni atoqqissinnaasassinnik.

Paasititsiniaanermut pilersaarutit sukumiinerusut maannakkorpiaq suliarivagut niuerfiillu, piffissaliinissaq aamma suliniuteqarnermut qanoq pitsaanerpaamik peqataasinnaanersi pillugu ingerlaavartumik ilisimatittarumaarpatsigit.

PISUT MALITTARINEQARPUT
Niuerfimmi qanoq inissisimasoqavinnera ilisimajumallugu ilissi qanimut oqaloqatigalusi pisut malittarivagut – tikeraanit apeqqutigineqartartunut aammalu pissusilersuutaannut tunngatillugu. Taamaatitsisoqarsimaneranik nalaataqarsimagussi tusarfigerusuppatsigit, imaluunniit paasiniaasoqartarnerani, inniminniisoqartarnerani taamaatitsisoqartarneraniluunniit allannguutinik maluginiagaqassagussi. Taamaalilluta maannakkut inissisimaffigisami paasissutissat tunngaviginerullugit suliniutinik naleqqussaasinnaassaagut sammisassallu inuussutissarsiummik tapersersuisinnaanerusut salliutillugit.

Ugguuna allaffigisinnaavatsigut: [email protected]

Nunatsinnut angalanernut atatillugu immikkut sianigisassaqarneranik pisortatigoortumik nalunaaruteqartoqarsimannginnera maannakkorpiaq innersuussutigisinnaavarput. Tikeraat toqqissisimajunnaassappata imaluunniit paasissutissanik sillimaniarnermut tunngasunik ujartuissagaluarpata kaammattussavatsigit angalanermut ilitsersuutit pisortatigoortut aamma oqartussat paasissutissiinerat attaveqaqatigiinnissinni tamatigut innersuussutigisaqqullugit.