Nuuk Water Taximi pisortaq Anders Lykke Laursen, “Green Team”-imi suleqatigiissitani nammineq piumassutsiminik sulisimasoq, allagartartaarnermillu qilakkeereqaraanikoq isumaqarpoq, allagartartaarneq Kalaallit Nunaanni tamanut iluaqutaassasoq:
”Illoqarfinni pingaarnerni piujuartitsisutut allagartartaarneq Kalaallit Nunaata takornariaqarnerata ineriartornera tupinnartoq, takornariarfissatullu pilerisaarinerput ikorfartussavai. Kalaallit Nunaat taamakkerlugu alloriarnertut isigaara, tassami massakkut piujuartitsisuni aqqutissiuisutut inissisimaleratta,” oqaluttuarpoq.
Visit Greenlandi aamma ”Green Team”-imi sinniisuusimavoq, neriuutiginarporlu Nuup allagartartaarnera, Kalaallit Nunaanni illoqarfinni allani isumassarsiorfiujumaartoq:
”Nunarsuaq tamakkerlugu takornariaqarnermi piujuartitsineq ukkatarineqarpoq, tamannalu tuniniaasut takornariallu toqqaasarnerannut sunniuteqarpoq. Taamaattumik takornariarfissatut inissisimanitsinnut pingaaruteqarluinnarpoq piujuartitsisutut aqqutissiuinissarput. Visit Greenlandimi piujuartitsineq nunap immikkoortuini assigiiinngitsuni takornarialerisunilu tigussaanerulersikkusupparput. Piujuartitsineq periusissatsinni qitiutillugu inissinnikuuarput,” Visit Greenlandip pisortaa Hjörtur Smárason oqarpoq.
Piujuartitsisunik takornariaqarnerup tuniniaavia soqutigineqarneralu ukiuni makkunani annertusiartorpoq, taamaattumik Nuup EarthCheckimit allagartartaarnera, nunatsinnut takornarianik amerlanerusunik qulakkeerinninnissamut alloriarneruvoq pingaarutilik:
“Angalasarnitsinni oqaloqatigiinneq piujuartitsinermut tunngakkajuttarpoq, tikeraanilu ersittarpoq najugaqartunut ineriartortitsinermut taperseeqataasarneq pingaartinneqartartoq. Taamaattumik piujuartitsineq tikeraatsinnut soqutiginartuuvoq,”Thorlak Skifte Nielsen, Two Ravensimik aallarneeqataasoq takornariartitsisartorlu oqarpoq.
Piujuartitsilluni takornariaqarnermut soqutiginninneq annertooq Anders Lykke Laursenip aamma maluginiarpaa. Taamaattumik piujuartitsineq Nuuk Water Taxip ulluinnaani suleriaasaanilu eqqarsaatigilluarneqartarpoq:
“Sullitatta akornanni piujuartitsineq annerusumik soqutigineqarnera malugaara. Nunani allani tuniniaasut angalaqatigerusunneq ajorpaatigut, takussutissiisinnaanngikkutta nerinermut atortunik plastikkiusunik atuinnginnitsinnik. Taamaattumik plastikkit tamarmik atorunnaarsinnikuuagut, taarsiullugillu immiartorfiillu alussaateeqqallu aatsinneqarsinnaasut, qisunnik atoqqitanik sanaat atulerlugit,” oqarpoq.
Sermersooq Businessi, suliniummi aqutsisuusimasoq, allagartartaarnermullu tunngaviliisumik nalunaarsuutinik katersinermi ataqatigiissaarisoq, tulluusimaaginnanngilaq allagartartaarneq anguneqarsimammat, kisianni aamma ingerlatsineq ilinniarfiusutut nalilerpaa, Suliniummi aqutsisoq Susanne Bisgaard oqaluttuarpoq. Neriuutigaa illoqarfiit allat aamma aallartikkumaartut:
“Allagartartaarnitsinni takutikkusupparput piujuartitsineq tamanoortuusoq. Suleqatigiilluarsimavugut peqatigiillutalu allagartartaarneq angusimallutigu. Anguniakkamik piviusumik naammassinninniaqatigiinnitsinni ataqatigiilersimavugut. Taamaattumik ingerlatsineq assut pissarsiaqarfiusimavoq. Nunatsinni takornariarfissat allat kaammattorusuppagut suleqatigiinnik katerseqqullugit, piujuartitsinermullu iliuutsitik isiginiaqqullugit immaqalu EarthCheckimiit allagartartaarnissaminnut suliniuteqaqqullugit” Susanne Bisgaard, Sermersooq Businessimi suliniummi aqutsisoq oqarpoq.
Paasissutissanik allanik perusukkuit attavigisinnaavatsigut:
Susanne Bisgaard – Earth Check pillugu apeqqutissat
Suliniummi aqutsisoq – Sermersooq Business
Toqqaannartumik oqarasuaat: (+299) 366949
Email: subi@sermersooq.gl
Hjörtur Smarason – Apeqqutit nalinginnaasut
Pisortaq – Visit Greenland
Oqarasuaatit angallattakkat: +45 22 80 14 16 / +299 27 99 98
Email: hjortur@visitgreenland.com
Hlif Linnetved – Piujuartitsineq pillugu apeqqutit
Piujuartitsinermi aqutsisoq – Visit Greenland
Oqarasuaatit angallattakkat: + 45 29 72 84 12/ +299 24 29 28
Email: hlif@visitgreenland.com
Continues further down the page...
