2035-ip tungaanut suliffeqarfiup periusissiornikkut pingaarnersiugassaasa suliassaasalu sinaakkutissaat, periusissiaq ukiunut qulinut atuuttussaq ullumi Visit Greenlandip saqqummersippaa.
Pinngortitaq, piorsarsimassuseq inuillu ataqqillugit isumatusaartumik takornariaqarnerup ineriartornerata nukittorsarneqarnissaa periusissiami ukkanneqassaaq.
Ingerlatseqatigiiffiullu qanoq takornariaqarneq akisussaassuseqarfiusumik inuiaqatigiillu ineriartornerannut piffissaq ungasinnerusoq eqqarsaatigalugu ingerlatitsisuulluni, najukkami naleqalersitsinissaq, tanngassimaaruteqarnissaq periarfissallu nutaat ukkanneqassanersut periusissiami ersarissarneqarput.
Angusaqarusussuseqarnermiit iliuuseqarnermut
Politikikkut anguniagassat tigussaasumik iliuusissanngortinnissaannut Visit Greenland, nunatsinni takornariaqarnikkut siunnersuisoqarfittut qitiusumik atuuffeqarpoq. Taamaammat suleqatigiinneq, ataqatigiissaarineq ilisimasanillu avitseqatigiinneq aqqutigalugit, periusissiaq Naalakkersuisut takornariaqarnermut pilersaarusiaannit toqqaannartumik tunngaveqarluni politikkikkut anguniakkanut piviusunngortitseqataassaaq.
Periusissiallu suliarineqarnera tassaalerpoq, Naalakkersuisut pilersaarutaasa suliaralugit aallartinnissaannut Visit Greenlandimut alloriarneq tulleq. Pilersaarut politikkikkut anguniakkamik pingaarnermik sammiviliisoralugu takornarialerisut katersornissaat, suleqatigiinnerit siuarsarnissaat aaqqiissutillu – najugaqartunut nunalu tamakkerlugu – piviusumik ataavartumillu naleqalersitsiviusut pilersinnissaat Visit Greenlandip suliassarai.
– Ukiuni makkunani Kalaallit Nunaat nunanit tamalaanit soqutigineqaraluttuinnarluni, nutaanik mittarfittaarluni avataanillu angalasunit soqutigineqaleriartuinnarpoq. Pissutsillu taakku periarfissarpassuaqalersitsipput – kisianni aamma annertuumik akisussaaffiliipput. Periusissiami matumani periarfissat isumatusaartumik tigunissaannut, aammalu innuttaasunut takornarianullu nuannaarutaasumik takornariaqarnerup ineriartortinnissaanut Visit Greenland akisussaaffimmik annertuumik tigusivoq, siulersuisuni siulittaasoq Anette Lings taama oqarpoq.
2035-ip tungaanut naleqqat pingasut
Anguniagassat pingaarnerit pingasut, 2035-ip tungaanut ineriartortitsinissami naleraasussat Visit Greenlandip periusissiaani nassuiarneqarput. Siulleq ataatsimoorluni takornariaqarnerup pilersinneqarnissaanut tunngavoq. Innuttaasut piginneqataanermik akissusaaqataanermillu misigitinneqassapput, aammalu takornariaqarneq – innuttaasut nunatsinni najugaqartut avaqqunnagit – peqatigalugilli ineriartortissavarput.
Naleqqap tulliani takornariaqarnerup naleqalersitsivigineqarnissaa ukkanneqassaaq. Uani takornariat amerlanerpaat tikisinnissaat piinnarnagu aammali tikeraarsimanerisa, peqataatinneqarnerisa inuiaqatigiinnullu tunniussassaasa pitsaassusaat qitiutinneqassaaq. Takornariaqarneq nuna tamakkerlugu iluaqutissiissaaq – nunami sumiissutsinut tamanut ukiorlu tamaat – najukkamilu inuussutissarsiuteqartunut, suliffissanut misigisassanullu nukittorsaassalluni.
Naleqqat pingajuat nunatsinni isumalluutit naleqarnerpaat: pinngortitaq, piorsarsimassuseq ataatsimuussuserlu oqimaaqatigiissinnerisigut takornariaqarnerup ineriartortinneqarnissaanut tunngavoq. Kalaallit Nunaata immikkuullarissusaa takornariaqarnerup nungullarsassanngilaa. Ataatsimoorussagullu tamaasa ataqqillugit – takornarialerinermi sulinikkut tunngaviatigullu – akisussaassuseqartumik takornarialerisoqassaaq.
2025-2035-imut Visit Greenlandip periusissiaa KALAALLIT NUNAAT …suullu ataatsimoorfigisagut tamakkerlugit atuarneqarsinnaavoq uani.
Continues further down the page...
