Illoqarfiilli pinngormata ukiup ingerlanerani pisoqartitsisoqallattaasarnera illoqarfinni inuunerup ilaginikuuaa. Assigiinngitsunik kulturillit ullumikkut siornatigullu ukiup qanoq ilinera agguataarniarlugulusooq pisoqartitsillattaasoqartarpoq. Assigiinngitsunik pisoqartarnerata peqataaffigisarneratigut, qanoq kultureqarnerput apeqqutaatillugu ataqatigiissitsisarlunilu paasititsissutaasarpoq kiisalu kulturitsinnut atasunik takutitsinerusarluni.
Misigisassarsiornerit niuertiginerinut pisoqartitsisarnerit annertusiartuinnartumik ilanngunneqartalerput. Nunarsuatsinni tamani pisoqartitsisarnerit aningaasaqarnermut qaffassaataallutillu illoqarfiit nittarsaanerannut iluaqutigineqarluartarput. Hallmark events-inik taaneqartartut ornigassamut aalajangersimasumut atatinneqartarput, taakkualu ornigarluarneqarnissaannut iluaqutaasarlutik ussassaarutaasarlutillu ornigassarititap unammillerluarsinnaaneruneranut iluaqutaasarlutik. Münchenimi Oktoberfest imaluunniit Tour de France nunanit tamanit ornigarneqartartut tamatumani assersuutaalluarsinnaapput.
Kalaallit Nunaanni pisoqartitsisarnernut assigiinngeqisunut assersuutaasinnaapput Arctic Winter Games kiisalu kaffisoriartitsisarnerit. Taamaammat pisoqartitsisarnerit assigiinngitsorujussuarnik annertussuseqarsinnaapput, taamaattorli takornarialerinermi tamarmik atorneqarsinnaasarlutik. Pisoqartitsisarnerit kulturitsinnut atatinneqartuaannarnikuummata, kalaallit kulturiata takornarianut paasititsissutiginiarnerani taamatut pisoqartitsisarnerit atorneqarsinnaasarput.
Continues further down the page...
Pisoqartitsisarnerit aaqqissuunneqartareersut arlalinnik iluaqutissartaqarput.
Pisoqartitsisarnerit arlallit takornariaqarluartarnerata avataatigut aaqqissuunneqartarput, taamaammallu ukiup ingerlanerani misigisassanik allanik neqerooruteqartannginnerup nalaanni neqeroorutigisinnaasanik inerisaaniarnermut ikorfaetuutaasinnaallutik. Tamatumunnga assersuutaasinnaavoq Nuuk Food Festival ukioq manna oktobarimi ingerlanneqartoq. Nuummi arfernik takornariarnerit qajartornerillu aggustimi septembarimilu unitsinneqartarmata, tamanna illoqarfimmi nutaamik misigisassaqartitsilerpoq.
Takornarialerinerup ukioq naallugu inuussutissarsiutigineqarsinnaanera eqqarsaatitsinni qitiulluinnarpoq. Taamaaliornikkut aatsaat takornarialerineq imminut ingerlanneqarsinnaalersissinnaavarput. Ukioq naallugu takornarialerinerup inuussutissaalersinneratigut, takornariaqarpiannginnerani takornarialerisut allanik suliffissarsiortariaqarnerat pinngitsoortissinnaavarput, suliatik pillugit piginnaaneqarluartut sulisorilersinnaavagut kiisalu sumiiffinni takornarianut neqeroorutigineqartut patajaallisarsinnaallutigit.
Taamaammat ukiup ingerlanerani piffissani assigiinngitsuni pisoqartitsisarnerit aaqqissuunneqarsinnaanerat periarfissaalluarpoq. Ukiut tamaasa aaqqissuunneqartartut aallaavigineqarsinnaasut soorlu makkuusinnaapput:
Nuuk Snow Festival siorna aallarteqqinneqarpoq tullianillu 2020mi martsip 5ianniit 8ta tungaanut ingerlanneqassalluni. Festivalimut peqataaneq soorlu arsarnernik isiginnaarnermik, kakaomik kissartumik imaluunniit kingorna nerisitsisinnaanerit periarfissatsialaapput. Sorpassuit isumassarsiarineqarsinnaapput. Assersuutigalugu Italiami, Ruslandimi, Kinami Japanimilu apuseraluni festivalernerit alutornartut, takornariat nunanit tamaneersut ornigartarpaat. Nuummi apuserititsisarneq minnerugaluartoq, takornariat soqutigilluarsinnaavaat.
Arctic Sounds 2020mi apriilip 9anniit 13ata tungaanut Sisimiuni sumiiffinni assigiinngitsunik (kiisalu Sarfaq Ittummi) ingerlanneqassaaq. Festivalimi kalaallit nipilersortartut saqqumilaarnerutiliinnarnagit aamma nipilersortartunik nunanit avannarlerneersunik issittormiunillu allanik ornigarneqartarpoq. Nipilersortussat inuit nuannarigunikkit pilerisaaruminarnerussapput, tamannalu ussassaarinermi iluaqutigilluarneqarsinnaavoq. Qimussertarnerup taamaatilernerani festivali ingerlanneqartarpoq, taamaammallu pisoqartitsinermi nipilersornermik misigisassanut soorlu qimussertitsinerit, illoqarfimmi pisuttuartitsinerit imaluunniit illoqarfimmi immikkuullarissuusinnaasut misigisaqarfigitinneri tapiliunneqarsinnaapput.
Festivali 2019imi oktobarip 7anniit 13ata tungaanut ingerlanneqarpoq. Ungasinngitsukkut arnat takornariat marluk attaveqarfigigakkit allaffigalunga aperaannga, qanoq ilillutik kalaallit eqqumiitsuliaat kulturiallu misigisaqarfigisinnaanerlugu. Piaarinaatsoornikkut Nuuk Nordisk Kulturfestivalip ingerlanneqarnerata nalaani takornariartussaapput. Nuuk Nordisk Nunatsinni pisoqartitsisarnernut allanut sanilliullugu annertoqaaq, nunanilu avannarlerni allani pisoqartitsisarnernut sanilliullugu annertunerarneqarsinnaanera anguniarneqarluni. Festivalimi eqqumiitsuliat, isiginnaartitsinerit, nipilersornerit, atuakkerinerit, illunik titartaasarnermut tunngasut nerisassanullu tunngasut misigisaqarfiginissaat periarfissaapput, tamannalu takornarianut neqerooruteqarnermi ilanngunneqarluarsinnaavoq. Suut tamarmik aaqqissorneqareerlutik piareeqqapput, taamaammat takornariarusuttut soqutigisaasa eqqorniarnissaat apeqqutaaginnarpoq. Ilaanni aamma takornariat festivalimut peqataanissaasa pisariillisarnissaat naammassinnaasarpoq.
Disko Arts Festival 4.10 Ilulissani ingerlanneqarpoq. Festivali allanut sanilliullugu nutaajuneruvoq, tassanili nutaalianik nipilersorneq, isiginnaartitsineq kiisalu assigiinngitsutigut takutitsinerit saqqummiunneqartarput. Ilulissani pinngortitaq alutornareertigimmat, kulturip puigorneqatsiarneqarsinnaanera paasineqarsinnaavoq. Taamatulli pisoqartitsineq takornarianut neqerooruteqarnermi pitsaalluinnartumik ussassaarutigineqarsinnaavoq. Kalaallit Nunaatami avannaani kulturi nutaaliaq misigerusussanngilaa? Takornariaqarluartarneratalu naalerneraniinnera iluaqutigilluarneqarsinnaavoq. Takornariaarukkiartornerata nalaani takornariat angerlalerunik misigisaqarluarsimanissaat qulakkeerniarlugu periarfissat atorluakkit.
Pisoqartitsisarnerit ukiut tamaasa ingerlanneqartartut ilaannaminiinnanngui uani assersuutigineqarput. Kalaallit Nunaannili illoqarfinni nunaqarfinnilu pisoqartitsisoqartaqaaq, soorlu atornikuerniarnerniit inuiattut ullorsiornermi aaqqissuussanut. Visit Greenlandip aggustimi visitgreenland.com aqqutigalugu saqqummiuppaat sakkussaq nutaaq: pisoqartitsinernut ullorsiut. Siunissami pisoqartitsinissat paasissutissartaat tassani atuarsinnaavatit, illit neqeroorutissannut aallaavissatut isumassarsiorfigisinnaasatit. Illit nammineq aamma ukiut tamaasa pisartut, takornarianit soqutigineqarsinnaasut, pillugit paasissutissanik nassissinnaavatsigut imaluunniit saaffigaluta taamaalilluta takornariaqarnerup inerisarnissaa pillugu isumassarsioqatigisinnaavugut.
Siunissami Kalaallit Nunaanni pisoqartitsisarnerit ikiliartoratik amerliartornissaat uanga siulittuutigisinnaavara. Takornariarfigineqartartuni assingusuni tamanna malugineqareernikuuvoq. Taamaammat ukioq naallugu takornarialerinermik inuuniuteqartoqarlualesinnaaneranut periarfissaqarluarpoq. Pisoqartitsiffiusartut tamakkua aaqqissuuneqareerlutillu inerisarneqareernikuummata, uagut nammineq tamakkunannga aaqqissuussinissaq isumagisariaqanngilarput. Taamaalilluta kalaallit kulturiat takornarianut misigisaqarfigitissinnaavarput, sumiiffinnilu aaqqissuusserusuttunik tapersersuinitsigut sumiiffinni inuiaqatigiit aamma ikiorsersinnaavagut.
Visit Greenlandip misissueqqissaarnerata takutippaa, pinngortitami misigisassaqarnerit kulturimut tunngasunik misigisassaqarnernik ilaqartarneri, Kalaallit Nunaannut takornariartartut soqutigikkajukkaat. Taamaakkaluartoq kulturimut tunngasut suli atorluarneqartanngillat. Takornariat arlallit saaffiginnittarput, kalaallit kulturiat kiisalu najugaqavissut attaveqarfiginissaannut periarfissat suunersut apersuutigalugu. Angerlassimaffinni assersuutigalugu nerisitsisarnerit kaffillertarnerillu soqutigineqariartuinnarlutillu misilikkusunneqarusuttarnerat annertusiartuaarpoq.
Takornarialerisut arlallit isumatusaarlutik pisoqartitsisarnerit soorlu ukiup qanoq ilinera apeqqutaatinnagu aaqqissuunneqarsinnaasut kaffillernertut ittut, takornariaqarnerup ineriartortinnerani qanoq atorluarneqarsinnaasarnerat eqqarsaatigisarpaat.
Allat aamma pisoqartitsinerit annertunerusut assigiinngitsunik aaqqissuinertalerlugu angalatitsisarnerminni atorluartarpaat, tamatumunnga assersuutaasinnaapput Tasermiut Expeditions angalatitsinerminni Leif Eriksson Marathon ilanngullugu neqeroorutigisaraat kiisalu Polar Marathonimut atatillugu Albatros Arctic Circle neqeroorutigineqartartoq.
