Ilisimatusarfimmi immikkoortortami pisortatut ukiut kingulliit arfineq pingasut ilinniartitsinermik, ilisimatusarnermik ph.d.-liornerlu suliaralugit atorfeqarsimavoq.
”Ilisimatusarninnut atatillugu kalaallinut inuiaqatigiinnut paasissutissanik ingerlatitseqqittarpunga, isumagalu malillugu anguniakkavut ingerlatitseqqittarnikkut paaseqatigiissitsinikkullu angusinnaavavut. Visit Greenlandip nunatsinni takornariaqarnerup pitsaasumik ingerlanissaanik takorluugaa aammalu pitsaassuseq, isumannaassuseq, nungusaataanngitsumillu atuinissamut sammisumik suleriuseqarneq, nunatsinni sumiiffiit aallaavigalugit takornariaqarnermik suliniuteqarnissara qilanaaraara”, attaveqaqatigiinermut pisortanngortussaq oqarpoq.
Rosannguaq Rossen 40-nik ukioqartoq Sisimiuneerpoq, 2005-miilli ilaquttanilu Nuummiilerput. Issittup ilisimatusaatigineranik ph.d-tut tunuliaqutaqarpoq, tassalilu ilaatigut nunagisat nittarsaannerinik ilisimatusaateqarlunilu ilinniartitsisuusarluni. Aamma Air Greenlandimi timmisartuni saqisutut Visit Greenlandimilu siunnersortitut sulinikuuvoq.
Rosannguup attaveqaqatigiinnermut pisortatut, ilaatigut suliffeqarfiup iluani aammalu avataani suliffeqarfiup periusissiaa malillugu attaveqaqatigiitarnermut siunniussat isumagissavai. Saniatigullu suliffeqarfimmik soqutigisaqaqatigisanut sammisumik ineriartortitsineq pitsanngorsassallugu, kiisalu nunatsinni tusagassiutinut attaveqarneq isumagissallugu.
”Avatangiisinik inuiaqatigiinnillu ataqqinnilluni takornariaqarnermik ineriartortitsineq kikkunnit tamanit peqataaffigineqassaaq, tassanilu aamma pineqarpoq nungusaataanngitsumik ineriartortitsinerup qanoq siuarsarnissaanut ataatsimut paaseqatigiissinnaaneq. Periusissiatsinnilu siunniussatta, aammalu nunatsinni takornariaqarnerup ineriartornissaanut takorluukkat anguniagassallu, ersarissumik attaveqaqatigiittarnissaq pisariaqartippaat”, Visit Greenlandimi pisortaq Anne Nivíka Grødem oqarpoq, nangillunilu
”Rosannguup ingerlatitseqqiisarnermut attaveqaqatigiinnermullu tunngasutigut misilittagai atorlugit, Visit Greenlandimi soqutigisaqaqatitta piumasaqaataasa suleqataanissamullu kissaataasa eqqortinnissaasa piviusunngortinnissaannut, periarfissagissaarnerulerpugut. Taamaasillutalu nunatsinni takornariaqarnermik ineriartortitsinerup naleqarnerulernissaa nukittorsarneqassaaq.
Rosannguaq Rossen Visit Greenlandimi ukior manna decembarip aallaqqaataani sulilissaaq.
Anne Nivíka Grødem, mobil 560282, nivika@visitgreenland.com
Continues further down the page...
