Tusagassiuutitigut nalunaarut:
19. oktober 2021
Kalaallit Nunaanni qanittumi nutaanik mittarfeqalertussanngornerata eqqumaffigeqqunissaa aammalu Kalaallit Nunaata takornarianit ornigassatut nittarsaannissaa, Kalaallit Nunaanniit peqataasut marluusut siullermik pingaarnertullu sammivaat.
”Mittarfissat sunik nutaanik periarfissiissanersut, aammalu Kalaallit Nunaat ornigassatut eqqumaffigineqarnissaata sulissutigineqarnera aallartilluareerpoq. Tassami mittarfiliortiternerit saniatigut sullitassanik nutaanik kajungerinnilersitsiniarnissaq, taamaalilluni taakkua naammassippata atuilertussat amerlanerulernissaat, uagutsinnut suliassaavoq pingaaruteqartoq. Suliap ingerlanera sivisuumik ingerlasussaavoq, tassami matut ammartiterneqartussaammata”, oqarpoq Kalaallit Airports-imi pisortaaneq Jens Lauridsen.
Visit Greenlandip aamma Kalaallit Nunaata takornarianit ornigassatut nittarsaannissaa immikkut sammivaa.
”Kalaallit Nunaat misigisassarpassuarnik asseqanngitsuni takornarianut neqeroorutissaqarpoq, taakkualu amerlanerulersikkusuppagut, taamaattumik oqariartuutigineqartut ilisimanninnerlu ullumikkornit annertunerusumik siammarterneqassapput. Peqatigisaanik akisussaassusilimmik aammalu takornariat eqqortut sullillugit ineriartorusuppugut, taamaalilluta aamma tamatuminngarpiaq ikiuussinnaasunik suleqatissarsisussaalluta”, oqarpoq Visit Greenlandimi pisortaq Hjörtur Smárason.
Mittarfiit naammanngillat
Mittarfiit nutaat aamma Kalaallit Nunaat takornarianit ornigassatut imminnut ataqatigiilluinnarput. Tassami mittarfiit imminerminni takornarianik kajungerinnilersitsisinnaanngillat. Tikissinnaanerup ajornannginnerulernissaanut sakkussaannaapput. Kalaallit Nunaanni misigisassat immikkuullarissut inuit kajungerinnilersittussaavaat.
”Tassami mittarfiit takusarlugit tikittoqanngisaannarpoq. Inuit Kalaallit Nunaat misiginiarlugu tikittarput. Mittarfinni sullitassat amerlanerulissappata, Kalaallit Nunaat takornarianit ornigassatut nittarsaanneqartariaqarpoq. Taamaattumik Visit Greenland aamma Kalaallit Airports aamma suliap ingerlanerani tassani qanimut suleqatigipput”, oqaluttuarpoq Jens Lauridsen.
”Suleqatiginneq taanna tamatsinnut aammalu Kalaallit Nunaat tamakkiisutut isigalugu nukittorsaavoq. Piujuartussamik perusutatsinnik siunissaqalernissamut periarfissaqarpugut, tassanilu sammivik ataaseq sammivigalugu ingerlanissarput ikioqatigiinnissarpullu aalajangiisuulluinnartumik pingaaruteqarpoq”, ilassuteqarpoq Hjörtur Smárason.
Ineriartornerup nunarput, pinngortitaq kulturilu malinnaatissinnaallugit sukkassusilimmik pinissaa Kalaallit Airports-imut aamma Visit Greenlandimut qitiulluinnarpoq.
- Kalaallit Nunaannut takornariat 2019-imi 100.000-upput. Taakkunannga 58.150-t nunamit aallaavilimmik takornariaapput, takornariartaatit umiarsuit 46.600 missaanniittut ilaasorisimallugit.
- Niuerfinni anginersaasut maannakkut tassaavoq Danmark, tulliullutik Tyskland, Amerika Avannarleq, UK aamma Frankrig.
- Nuummi aamma Ilulissani mittarfiit 2.200meterisut takissuseqartussaapput aammalu 45meterisut silissuseqartussaallutik.
- Takissusaasa Amerikamut Avannarlermut aamma Europamut utimullu toqqaannartumik timmisartoqarnissaa ajornarunnaarsippaat.
- Kalaallit Nunaat 2022-mi Vestnorden-imut, 2024-mi mittarfiit naammassinissaat sioqqullugu Kalaallit Nunaanni Vestnorden kingullersaanni, tikeraartitsisuusussaavoq
Ataatsimeersuarneq pissarsiaqarfigilluarneqarpoq
Aammalu ataatsimeersuarneq taamatut suli aalajangersimasunik isumaqatigiissuteqarnernik kinguneqanngikkaluartoq, peqataaneq annertoorujussuarmik pissarsiaqarfiusimasoq pisortat marluusut tamarmik isumaqarput.
”Kalaallit Nunaat takornariarfissatut annertuumik soqutigineqarpoq. Annertoorujussuarmik. Taamaattumik tassuunaannaq angalaneq pissarsiaqarfiungaatsiarpoq. Eqqumaffiginninneq annertoorujussuuvoq”, oqaluttuarput Hjörtur Smárason aamma Jens Lauridsen isumaqatigiillutik:
”Soqutiginartorujussuarmik ingerlavoq. Aamma suliniuterput aammalu siunissami tamatumani periarfissaalertussat annertuumik soqutigineqarput. Atassuteqaatissat pilersinneqarput aammalu eqqumaffiginnitsitsisoqalerluni, taamaattumik neriulluarnartorujussuulluni.”
Milano-mi ataatsimeersuarnissaq sioqqutitsiarlugu Visit Greenland aamma Kalaallit Airports aamma Vestnorden Travelmart-imi, Islandimi Reykjavik-imi ingerlanneqartumi peqataapput. Vestnorden Kalaallit Nunaanni angalanermut nuisitsiviit annersaraat, aammalu tassani aamma Kalaallit Nunaat annertuumik soqutigineqarpoq.
”Maannarpiaq eqqumaffigineqarnitta atorluarnissaanut periarfissaqarpugut, tamannalu soorunami atorluassavarput”, oqarpoq Hjörtur Smárason.
Paasissutissanik annertunerusunik piniarnermi attaveqarfigineqassaaq:
Kalaallit Airports
Attaveqaqatigiinnermi sulisoq Mikkel Bjarnø Lund
Mail: mbl@kair.gl
Tlf: +299 23 17 00
www.kair.gl
Visit Greenland
PR-mi pisortaq Tanny Por
Mail: Tanny@visitgreenland.com
Tel: +45 20 76 96 90
www.traveltrade.visitgreenland.com
