SIUARTA-p ukiuani siullermi takornarialerinerup nunamillu matuminnga tunngaveqarlutik inuussutissarsiutillit allat siuarsarneqarnissaat pingaartinneqarsimavoq. Workshoppeqartitsinerni qanittukkut pisuni suleqatigiinneq, piginnaasanik ineriartortitsineq sumiiffigisamillu tunngaveqarluni takornariaqarnikkut aallarniisarnerit pillugit oqallinnerit ilanngunneqarput. Suliniutillu ersersippaa siunissaq ungasinnerusoq eqqarsaatigalugu suliniuteqartarneq ataavartumillu ineriartortitsisarneq inuussutissarsiortunut pingaaruteqarluinnartuusut. Nikolaj Sørensen Café de Upernavimmeersoq suliniummut atatillugu workshoppeqartitsinermut peqataavoq imalu oqaaseqarluni:
“Takornariartitsisarnermi niuerutigineqartartut pillugit Upernavimmi namminersorlutik inuussutissarsiuteqartut suleqatigiinnerat naapeqatigiinnermit Visit Greenlandimit NALIK Venturesimillu aaqqissuunneqartumit ikiorserneqarpoq nukittorsarneqarlunilu. Naapinneq manna inuussutissarsiortut kattuffiannut assingusumilluunniit namminersorlutik inuussutissarsiuteqartut suleqatigiinnerannut alliartuutaalersussamik pilersitsiffiuvoq. Neriuppunga Visit Greenland aamma NALIK Ventures Upernavimmut nunaqarfiinullu maani sumiiffigisatsinni takornariaqarnikkut ataavartumik ineriartortitsiniarlutik tikeraartuartarumaartut.”
Qaanaamuttaaq tikeraarnerup takutippaa taavani takornariaqarnikkut ineriartorfissarissaartoqartoq, arlariinnillu ajornartorsiuteqarfiusunik qaangerniagassaqartoq, pingaartumik klimap allanngoriartornerata malitsigisaanik qaangerniagassaalersunik. Inuussutissarsiortut takornarialerisullu, amerlasuutigullu aalisartut piniartullu, sukkaqisumik allanngoriartortunut tamakkununnga naleqqussartariaqartarput aningaasanik isertitaqarneq piniarnerinnarmit, aalisarnerinnarmit takornarialerinerinnarmilluunniit pisinnaaneq ajormat. Taamaattumik taavani suliniutaasut pillugit ikiuineq tapersersuinerlu ineriartortoqaqqinnissaanut aalajangiisuulluinnaassapput.
Tamanna pillugu Qaanaami Workshoppeqartitsinermi ineriartorfissatut periarfissarsiornissaq Kalaallit Nunaannilu illoqarfiit avannarpasinnersaannut takornariat kajumilersinnissaannut taavani isumalluutaasunik atuinissaq immikkut pingaartinneqarput.
”Naapinnerni taakkunani tupinnarnerpaaq tassa SIUARTA-mik suliniuteqartut illoqarfeeqqani pisariaqartinneqartunik illoqarfiit annerusut pisariaqartittagaannit allaanerusunik paasinnilluinnarmata. Taama pitsaatigisumik paaseqatigiilluarfiutigisumillu naapitsigajunngilagut. Tamanna suliniummut aallartilluarneruvoq. Siuariartornerlu qaammatialuinnarni, ukiumi ataatsimi marlussuinnarniluunniit pineq ajorpoq. Ataavartumik siuariartortitsisoqartariaqarpoq, neriuppugullu oqaloqatigiittarnerput ingerlatiinnarumaaripput.” Saki Daorana Ultima Thulemik piginnittoq oqarpoq.
Suliniummi ”SIUARTA!”-mi isorliunerusuni suleqatigiinneq ineriartornerlu siuariartortinniarlugit bottom-up-imik aallaaveqarneq pingaartinneqarsimavoq. Ilisimaneqalersorlu tamanna suliniutip aallartisarnerani anguneqarsimasoq siunissami Visit Greenlandip NALIK Venturesillu suleqatigiillutik suliniutigiumaagassaannut ilanngunneqarumaarpoq. Taakkumi marluullutik inuussutissarsiornikkut takornarialerinikkullu siunissaq ungasinnerusoq eqqarsaatigalugu iliuuseqarnissaq ataavartumillu ineriartortoqarnissaa pingaartippaat. Taamaattumik suliniut ”SIUARTA!” maanna nalilersorneqareerpoq, suliniut pitsaaneruleqqullugu suliniutissallu inuussutissarsiortut pisariaqartitaannik ilisimaneqalersunillu katersorneqarsimasunik tunngaveqartillugit toraarfiligaaneroqqullugit.
Continues further down the page...
