Sumiiffiit suliniuteqarfigineqartut atorfissaqartitaannik aallaaveqarluni isorliunerusuni takornariaqarnerup ineriartortinneqarnissaa suliniummi immikkut ittumik pingaartinneqarpoq.
SIUARTA-mi sammisaqartitsinerit ukiup aallartinnerani Kujataani aallarnerneqarput, oktobarillu qaammataani Ittoqqortoormiini inuiaqatigiinni isorliunerpaat ilaanniittuni silarsuarmi anginerpaasumik kangerloqartuni malitseqartinneqarpoq. Tappavani inuussutissarsiortunik anguniagaqartunik naapitsinerup Ittoqqortoormiit takornariaqarnikkut ineriartortitsiffigineqarluarsinnaanerat uppernarsarpaa, suliniuteqaqatigiinnikkullu anguniagaavoq tappavaniittut suleqatiginerisigut takornariaqarnikkut ineriartorfiusinnaasut eqeersarneqarnissaat.
Tikeraarnermi takornarialerisut workshoppeqatigiinnermut Ittoqqortoormiit siunissaat ineriartortinneqarnissaallu pillugit kissaatinik sammisaqarfiusumut katersortinneqarput. Tamatuma saniatigut inuussutissarsiortunik ataasiakkaaraluni siunnersuinissaq unammilligassanut periarfissanullu tunngatitaasoq neqeroorutigineqarpoq.
Mette Pike Barselajsen, Nanu Travelimi pisortaq, workshoppimut peqataavoq aammalu oqaloqatigiinnerit kingunerilu iluaralugit:“Tamatta takornariaqarneq inerisassagutsigu, tapersersorneqarnissarput tamaniit pisariaqartipparput. Ittoqqortoormiit eqqaa, Kangertittivarlu nalunngilagut qanoq takornariaqarnermi atorluarsinnaallugit. Inerisaaniaruttali aamma tapersersorneqarnissarput, siunnersorneqarnissarpullu pisariaqartipparput.”
Aamma Ken Madsen, Sanasoq Ittoqqortoormiit aps.-imi pisortaq peqataavoq, oqarlunilu:
“Ittoqqortoormiini periarfissagissaarpugut, pingaaruteqarporli avataaniit ikiorneqarnissarput. Ikiorneqarneq siunnersorneqarnerlu malitseqartuaannartussaavoq, taamaasilluni una suliniut ajunngitsorujussuulluni.”
Visit Greenlandimi NALIK Venturesimilu takornarianik tikerartunik isumaginnissinnaasut nukittorsarneqarnissaat pingaartinneqaqaat, taamaaliornikkut illoqarfiit nunaqarfiillu takornarianik amerlanerusunik tikeraartitsisinnaanissaat qulakkeerneqassammat. Kalaallit Nunaat nutaanik mittarfeqalerpat angalanissamut periarfissarinnerulernissamut atatillugu naatsorsuutigineqarportaaq takornariat tikittartut amerlanerulissasut. Tamanna akuersorneqassappat tikeraartussattaaq pitsaasumik eqqortumillu misigisaqartarnissaat qulakkeerneqassappat illoqarfiit nunaqarfiillu tikeraartussanik amerlanerusunik isumaginnissinnaanissaat pingaaruteqarpoq. Tamatumanilu ineriartortitsinerup piujuartitsiniarnermik takornarialerisullu piumasaannik tunngaveqarnissaa pingaartuuvortaaq.
”Ittoqqortoormiini inuit pikkorissut piumassusillillu amerlaqaat, naallu illoqarfik anginngikkaluartoq ineriartorfiusinnaasoqaqaaq. Suleqatigiinnikkut soorlu maanna pisukkut, oqaloqatigiinnertigut ilisimasanillu avitseqatigiinnertigut, illoqarfiup takornariaqarfiusutut siuarsarneqarnissaanut ikioqatigiissinnaavugut. Taamalu illoqarfiup aningaasaqarnera iluaqusersussavarput tamaanilu pilersitat nukittorsassallugit, taamaasillutalu inui iluaqusissavagut asimullu misigisassarsioriarlutik takornariarniartut naatsorsuutigisaat neqeroorutigisinnaalissallugit,” Visit Greenlandimi takornariarfissanik ineriartortitsinermi aqutsisoq Linda Kleist oqarpoq.
Ukiortaap tungaanut suliniummut atatillugu Upernavimmi, Qaanaami taajakkualu eqqaanni sammisaqartitsisoqassaaq, sumiiffinnilu suliniummut ilanngunneqarsimasuni inuussutissarsiortunik siunnersuineq ingerlanneqaqqissalluni.
SIUARTA Visit Greenlandimit NALIK Venturesimillu peqatigiiffissatut pilersitaavoq, siunnersuisartorlu INUVA suleqatigineqarpoq. Suliniummi bottom-up-imik aallaaveqarluni Kommune Kujallermi, Tasiilami eqqaanilu, Ittoqqortoormiini ukiullu naajartulernerani Qaanaami Upernavimmilu takornarialerisut inuussutissarsiortullu atugaasa pitsanngorsarneqarnissaat pingaartinneqarpoq.
Visit Greenlandimi pisortaq Anne Nivíka Grødem, nivika@visitgreenland.com
NALIK Venturesimi pisortaq Thomas ‘Tyt’ Mogensen, tyt@nalik.com
Aamma takuuk: VISIT GREENLANDIP AAMMA INNOVATION GREENLANDIP SULEQATIGIINNEQ NUKITTORSARPAA.
Continues further down the page...
