“Illoqarfiit nunaqarfiillu tamarmik immikkuullarissumik oqaluttuassartaqarput. Sumiiffinni ilippanartut aallarnerfigalugit nuna tamakkerlugu misigisassanik nittarsaaneq ineriartortikkusupparput. SIUARTA suliniutaavoq ataatsimoorussaq, nunatsinni piujuartitsisumik ineriartortitsinermik tapersersuisoq, aammalu tikeraartut piviusunik immikkuullarissunillu misigisaqarnissamut kissaataat eqquutsikkumallugu – sumiiffiit avinngarusimasut ilanngullugit.“ Visit Greenlandip pisortaa, Anne Nivíka Grødem oqaluttuarpoq.
Suliniutip aallartisarnerani Kujataa aallunneqarsimavoq, takornariaqarnermi inuussutissarsiornermilu peqatigiiffik Innovation South Greenland qanimut suleqatigalugu.
“SIUARTA-p suliniutaani kajuminneq periaaserlu nuannareqaagut. Nunaqavissunik suleqateqarneq tunngaviusumik pilersaarusiornermi pingaartitatta ilagivaat, kisianni aamma aningaasalersuineq. Kalaallinik aningaasaliisartunik tatiginnittunik annaasaqaratarsinnaagaluarlutillu Kujataanut aningaasaleerusuttunik ujartuivugut. Neriuppugut suliniutip SIUARTA-p workshopsinik ingerlatsisaqattaarnera pulaaqattaarnerilu aqqutigalugit nunap ilaani takornariaqarnermi inuussutissarsiutillit ilippanartut ilisimaneqarlualersinnaajumaartut aammattaaq akuersiissutit amerlanerit kujataani takornariaqarnermi suliaqartunut tunniunneqartalerumaartut.“ Innovation South Greenlandimi pisortaagallartoq, Sarah Woodall, oqaaseqarpoq.
Suliniut SIUARTA periaatsinik siunnersorteqarfiup INUVA-p misissuinermi suliaani nassuiarneqarsimasunik tunngaveqarpoq, GrønlandsBANKEN-ip Inuussutissarsiornermut Aningaasaateqarfianit aamma NALIK Ventures-imit aningaasaliiffigineqarlunilu tapiiffigineqarpoq. Misissuinerup ilaatigut takutippaa inuussutissarsiornermik sumiiffinni avinngarusimasuni ineriartortitsiniaraanni qanoq ililluni iluatsitsilluarnissamut kriteeria anguneqassappat periuseq buttom-up atorneqassasoq. Periaaseq taanna aallarnerfigigaanni, sumiiffiup takornariaqarnermut inuussutissarsiornermullu ineriartortitsinissamut pisariaqartitai suliniuteqarnermik aalajangiisuussapput. Imaappoq, suliffeqarfik sumiiffimmiittoq nioqqutissamik ineriartortitsinissamut ikiugassaassappat tamanna ingerlanneqassaaq. Aamma, suliffeqarfik alla allisaanissamut ikioqquguni taava tamanna pillugu siunnersuineq ingerlanneqassaaq. Taamaalilluni projektimi sullissinermi neqeroorutaasut assigiissaartuussanngillat, akerlianillu ilitsersuineq pisariaqartitanut aalajangersimasunut tulluarsagaasassalluni.
INUVA-mi aallarniisunik siunnersorti, Claus Christoffersen, SIUARTA workshop- ertitsisarpoq, suleriaaserlu una atorlugu Kujataani ineriartortitsinissamut periarfissanik annertuunik takorluugaqarpoq:
“Suliffeqarfiit tamarmik assigiinngillat, assigiinngitsunillu pisariaqartitsillutik. Suliffeqarfinni minnerni pisariaqartitat ataasiakkaat tunngavigalugit ilitsersuisinnaaneq angusaqarnarnerusinnaavoq, pisarneq malillugu periaatsimut sanilliutissagaanni. Kujataani sumiiffiit periarfissanik ulikkaarput, aallartisaasullu pikkorissuullutik. Maannakkut piginnaasanik ineriartortitsineq aalluttariaqarparput, sullitanut attaveqarneq aammalu suliffeqarfimmik ingerlatsinermi tunulequtaasut aalajaatsunngorniassammata. Visit Greenlandip NALIK-llu iliuuserisaat ineriartortitsinermi tassani peqataapput.”
NALIK Ventures-imi manageri, Allan Chemnitz, suliniutip aallartinneqarsimanera nuannaarutigaa aammalu sumiiffimmi peqataanissaq suliatut pingaartutut isigalugu:
“Pingaarpoq NALIK Ventures Kalaallit Nunaat tamakkerlugu sullissimmat. Suleqatigut Visit Greenland INUVA-lu ikiortigalugit Kalaallit Nunaat tamakkerlugu ineriartortitsivugut, tamanullu iluanaarutaalluni, inuussutissarsiortut aallarnisaasullu ilanngullugit. Suliniutip aallartinnerani, maannakkut pisumi, takuneqarsinnaalereerpoq ilisimasanik pingaarutilinnik uagutsinnut tunniussisuusoq.”
Maanna SIUARTA 2023 tamaat ingerlanneqassaaq, Avannaani, Tunumi aamma Kujataani takornariaqarnermi aammalu inuussutissarsiornermi sumiiffinni pissutsinik pitsanngorsaataassalluni.
Tusagassiuutinut nalunaarut oktobarip 13-iani 2022-mi saqqummiunneqartoq takuuk.
Continues further down the page...
