Visit Greenlandimi siulersuisut novembarip aallartinnerani umiarsuarnik allatigullu takornariaqarnermi issittumi avatangiisini mianerisassani qanoq ineriartortitsisoqarsinnaaneranut ilisimasanik misilittakkanillu pissarsinissaq siunertaralugu Svalbardimut angalappput. Angalanerup siunertaraa siulersuisut ukiuni aggersuni periusissiatigut pingaarnersiugassanut suliatigut ataatsimut tunngavissaqartinnissaat – innuttaasunut Nunatsinnilu takornariartitsinermik inuussutissarsiuteqarnermut iluaqutaasussamik.
Tikeraarnermi qitiulluinnartoq tassaavoq Visit Svalbardimik suleqateqarneq, tikitassami takornariartitsinikkut ataatsimoorussamik suliniaqatigiiffiusoq. Tassanilu sammisat eqqartorneqartut ilaatigut tassaapput tikeraartitsisutut atuuffeqarneq, takornarianut paasissutissiisarneq, nittarsaassineq, najukkani inuiaqatigiinnik oqaloqateqartarneq minnerunngitsumillu piujuartitsineq takornariaqarnermullu maleruagassiorneq. Tassanngaanniillu misilittagarineqartut nunatsinnut immikkut naleqquttuupput, takornariartitsinerup naleqalersitsisussamik aammalu pinngortitaq, kulturi najukkanilu inuiaqatigiit eqqarsaatigalugit ineriartortinneqarnissaa aamma ukkatarineqarmat.
Tikeraarnermi pilersaarutinut aamma ilaapput Longyearbyenimi umiarsualivimmeersut, najukkami takornarialerisut, katersugaasiviit aammalu suliallit qitiusut takornariaqarnikkut maleruagassiornermut ataqatigiissaarinermullu akisussaaffillit ataatsimeeqatiginerat: AECO (Association of Arctic Expedition Cruise Operators), Svalbard Reiselivsråd, Longyearbyenimi najukkami aqutsisut aamma Sysselmesteri. Taakku peqatigalugit ilaatigut inatsisiliorneq, avatangiisit innarlitsaaliorneqarnerat, angallassisartutut uppernarsaasersuisarneq, isumannaallisaaneq, assartuineq ingerlasussanillu pilersaarusiorneq aqutsinerlu kiisalu umiarsuarnik takornariartaatinik tikeraanillu tikiussortunik isumaginnittarneq oqaloqatigiissutigineqarput.
Kalaallit Nunaata maleruagassiornikkut nukittuumik inissisimareernera tikeraarnermi paasisat pingaarutillit ilagaat. Kalaallit Nunaata ingerlatsisunut takornarianullu nunatut piumasaqateqarnissaminut sapiissuseqartutut suliaqartunit Svalbardimi naapitanit arlalinnit tikkuarneqarpoq. Paasisassarsiorluni angalaneq taamaalilluni nutaanik isumassarsiffigineqaannarani aamma Kalaallit Nunaata pitsaasumut ingerlanera nunarsuullu immikkoortuani issittumi maligassiuisinnaanera uppernarsarneqarpoq.
Ataatsimiinnerit ataatsimoorutigisaat tassaavoq takornariartitsinerup aaqqiissutissamut ilaanissaanik ajornartorsiummullu ilaannginnissaanik erseqqissumik ukkataqarneq. Tamannalu pinngortitamik mianerisassamik innarlitsaaliuinermut, najukkami tunngaveqarnissap qulakkeernissaanut, takornariaqarnikkut ineriartortitsinerup siammasissumik tapersersorneqarnissaanut, aammalu inuiaqatigiinni aningaasarsiornikkut naleqalersitsinissamut qitiusumik inissisimanissaanut tunngatillugu atuuppoq.
Paasisassarsiorluni angalaneq takornariaqarnerup inuiaqatigiinni inuunermut qanoq tapersersuineranut pingaarutilinnik aamma paasisaqarfiuvoq kulturikkut sullissivinnik, neriniartarfinnik atortulersuutinillu allanik nunaqavissut ulluinnarni inuunerannut pisuunnguallaatigineqarsinnaasunik tapersersuisarnikkut. Pissutsit taakku nunatsinni aamma eqqumaffigivagut, Svalbardimili takusatsitulli suli assinganik naleqartillugillu periusissiornikkut ukkatarinngilagut.
Siulersuisut Svalbardimi paasisaat Visit Greenlandip iliuusissatut pilersaarutaani tigussaasumik pingaarnersiugassanngortinneqassapput. Ilisimasallu nutaat Visit Greenlandip suleriaqqinnissaanut ilanngunneqassapput, Kalaallit Nunaanni takornariartitsinerup siunissami ineriartortinneqarnerani inuussutissarsiuteqartunut innuttaasunullu iluaqutigineqartussanngorlugit.
Continues further down the page...
