Nunarsuarmi qullersat sap. ak. manna Glasgowimiipput, COP26-mi Parisimi isumaqatigiissummi anguniakkat qanoq naammassissanerlugit oqallissutigalugu. Taamaalisoqarnerani Kalaallit Nunaanni, silap pissusaata allanngoriartorneranut tunngatillgu qeqqani inissisimasumi, sermersuullu sukkasuumik aakkiartorfiani inuuneq ingerlaqqippoq.
Allanngortoqarsimavorli: Kalaallit Nunaat Parisimi isumaqatigiissummut ilanngiussimavoq. Allorneq tamanna Naalakkersuisunit tiguneqarsimavoq, silap pissusaata allanngoriartornerata unikaallatsinnissaanut iliuuseqarniarusullutik, Kalaallillu Nunaanni piujuartitsisumik mingutsitsinngitsumillu atuilerumallutik.
Kalaallit Nunaanni silap pissusaata allanngoriartornera, nunanut allanut naleqqiullugu sukkaneruvoq, maanimi kiassuseq pingasoriaammik sukkanerusumik sakkortusiartorpoq. Sunniutillu arajutsisassaanngillat. Piujuartitsineq Kalaallit Nunaanni oqaasiinnaanngilaq nutaaliaq, silallu pissusaata allanngoriartornera ullormiit ullormut unitsinneqarsinnaanngilaq. Akerlianik akisoorujussuussaaq Kalaallit Nunaat tamanna pillugu iliuuseqarnikkut aalajangiissuteqanngippat. Parisimi isumaqatigiissummut atsiorneq tassaavoq Kalaallit Nunaanni iliuutsit assingusut ilaannaat, assersuutigalugu oliasiorneq gassimillu misissuineq unitsinneqareersimavoq. Kalaallit Nunaat issittuni siullerpaalluni taamaaliorsimavoq.
“Kalaallit Nunaata Parisimi isumaqatigiissummut ilannginera pingaaruteqarpoq. Takornariaqarnermi Naalakkersuisut oqaatiginiarpaat, piujuartitsilluni takornariaqarneq tapersersorlugu. Piujuartitsilluni takornariaqarneq tassaasoq Kalaallit Nunaanni takornariaqarnermik inuussutissarsiutillit nammineerlutik anguniagarileriigaat. Kalaallit Nunaanni takornariaqarnerup ineriartortinnera piujuartitsisumik ingerlakkusupparput.” Hjörtur Smarason, Visit Greenlandimi pisortaaneq oqarpoq.
Piujuartitsinissamut pisussaatitaalernerup saniatigut Kalaallit Nunaata immikkut ittumik periarfissarilerpai ilinniartitsinissaq – nunap iluani silataanilu – silap pissusaata allanngoriartornerani sunniutit pillugit. Ilinniartitsinissamut periarfissat nutaat ilaat tassaavoq julimi 2021-mi Coronaqaleruttortoq ammaanersiortoq, Kangiata Illorsua.
”Kalaallit sikumut itisuumik atassuteqartuaannarsimapput. Silap pissusaata allanngortiartornerata isumavia sivisuumik inooqatigisimavaat. Taamaattumik naleqquttuuvoq Kangiata Illorsuata sikumik nersorinniinnarnatik inuit qanoq inuuniartarsimanerat qanorlu nunarsuarmi allanngorartumi naleqqussartarsimanerat oqaluttuarissallugu. Nunarsuup silap pissusaata allanngortiartornera pillugu ilinniartinnisssaanut periarfissatsialaavoq,” Elisabeth Momme, Kangiata Illorsuani pisortaq nassuiaavoq.
”Kalaallit nutaaliullaqqissutsimikkut inuussutissarsiornerminnilu naleqqussarsinnaanerminnut piginnaasaat nunarsuup sinneranut isumassarsiorfiulluarsinnaapput. Takornariaqarnermi ineriartortitsineq tassaavoq kalaallit naleqqussarfigisinnaasaat, silap kiatsikkiartornerani piniarneq allanngoriartorpat immallu sikua nungukkiartorpat. Tamatumanilu piujuartitsineq oqaasiuvoq pingaarutilik”, Hjörtur Smarason oqarpoq.
Inatsisartut Parisimi isumaqatigiissummut suli akuersissuteqanngillat. Akuersissuteqarnissamut suliniut 2023-mi Inatsisartuni pilersaarutaavoq.
Paasisaqarnerorusukkuit:
Visit Greenland
E-mail: press@visitgreenland.com
Elisabeth Momme
Kangiata illorsuani pisortaq
Oqarasuaat: +299 555588
E-mail: elisabeth@isfjordscentret.gl
Continues further down the page...
