Ulluinnarni DMO nunap immikkoortuini takornariaqarnerup ineriartornerini takornarialerisut peqatigalugit ataqatigiissaarinermik suliaqartarput. Nunami piujuartitsinermik tunngaveqartumik takornariaqarnerup ineriartortuarnissaa qulakkeerniarlugu pisortanit ingerlatsiviusut aammalu namminersortut suleqatigiilluarnissaannik DMO ataqatigiissaarisarput.
Kalaallit Nunaani immikkoortortani takornariaqarnikkut brandeqarpoq arfinilinnik taakkualu DMO-nit isumagineqarput: Visit South Greenland, Explore North Greenland, Destination Disko Bay, Destination Arctic Circle, Visit Nuuk, aamma Visit East Greenland.
Nuna tamakkerlugu takornariaqarneq pillugu siunnersuisooqatigiittut Visit Greenlandip anguniagaraa Kalaallit Nunaat angalaffissatut immikkuullarissutut nittarsaatissallugu takornariaqarnerullu inuussutissarsiutitut inerisaavigissallugu. Angunigaavoq aningaasarsiornerup annertusarnissaa, suliffissaqartitsineq aammalu nunani tamalaani nittarsaassinikkut nunarput nittarsaatissallugu takornariaqarfissaq pisussaaffeqarluartoq. Suliniutit ilaattut Visit Greenlandip suliaraa qulakkiissallugu DMO-it nunatsinni attaveqatigiilluarnissaat ataatsimut piginnaasatigut ineriartortitsinissaq, ilisimasanik avitseqatigiinnissaq misilittakkanillu avitseqatigiittarnissaq anguniarlugu.
“Nuna tamakkerlugu suleqatigiinnerup Kalaallit Nunaanni ineriartornerup tamat iluaqusissuai. Takorissat nunap sumi killigi soqutigisarinngilai kisiannili tikiffissani misigisassat aallaavigalugit pisarlutik. Tamaammat pingaaruteqarluinnarpoq tikiffissatut ataatsimoorluinnarnissarput; Kalaallit Nunaat – suleqatigiittoq ataqatigiissumik misigisassanik inerisaasoq aammalu imminnut aaqqissuisutut tikitassatullu allorissaaqatigiittoq”, oqarpoq Anne Nivíka Grødem, Visit Greenlandimi pisortaq.
Workshoppertitsinermi qulequttat arlallit oqallisigineqarput, ilanngullugit branding, oqaluttuaqattaattarnerit aammalu nunatut uppernarsaasersortarneq, taakkuuppummi tamarmik nukittuumik pissanganartumillu takorniat misigisaqartinniarlugit suliniutit qitiusut.
Workshoppertitsinermi peqataasut ilisimasatigut avitseqatigiinnissaminnik periarfissinneqarput, misilittakkat torrallatarisarsimasallu suleqatigiinnermi iluaqutigisinnaasat siunissami Kalaallit Nunaanni takornariaqarnerup ineriartorteqqissinnaanerini toqqammaviusinnaasut oqaloqatigiissutigineqarlutik.
Suliniut tassaavoq Visit Greenlandip ataavartumik suleqatigiinneq tapersersoqatigiinnerlu siammasissoq anguniarlugu sulineq minnerunngitsumillu piujuartitsineq tunngavigalugu takornariaqarnerup inertortitsineq nunatta tamarmiusup iluaqutissaa anguniarlugu sulineq.
Continues further down the page...
