Massakkorpiaq Kalaallit Nunaanni Danmarkimilu takornarialerisut akornanni inuussutissarsiortunut akisussaanermut sillimmasiineq inatsisit malillugit piumasaqaataanngilaq. Tamanna aamma peqqutigalugu immaqa Kalaallit Nunaanni takornarialerisut amerlasuut taamaattumik sillimmasersimanngillat.
Takornariartitalli arlaat angalaartitsinerup nalaani ajutumeerpat imaluunniit atortuminik aserortoorsimappat taarseeqqusissummik piumaffigineqariataarsinnaavutit. Ilanngutassiami uani qanoq taarseeqqusissummik pinaveersaartitsisoqarsinnaanersoq misissussavarput.
Islandimi nunanilu allani takornarialerisunut inatsisitigut piumasaqaataavoq inuussutissarsiortutut akisussaanermut sillimmasiinissaq. Saniatigut aamma takornarialerisunut ataatsimoortumik angalatitsinernik tuniniaasunut inatsisitigut piumasaqaataavoq, akiliisinnaajunnaarnissamut qularnaveeqqummik immikkut ittumik peqarnissaq. Qularnaveeqqut Icelandic Toursim Board aqqutigalugu pilersittussaavaat. Naak tamanna Kalaallit Nunaanni atuutinngikkaluartoq, takornariamiit taarseeqqusissummik piumaffigineqariataarnissamut arlaatigut sillimmasernissaq innersuussassaavoq. Takornariarmi angalaarnermi aaqqissuussami timikkut pigisatigulluunniit ajutoorsimasoq isumaqariaannaavoq, takornarialerisup ajutoorneq akisussaaffigigaa.
Kalaallit Forsikring
Kalaallit Forsikring Kalaallit Nunaanni takornarialerisunut Inuussutissarsiortutut akisussaanermut sillimmasiisinnaavoq. Tuniniakkat ajornanni ataani allassimasut sillimmaserneqarsinnaapput:
Assersuutitut Kalaallit Forsikringi aqqutigalugu angalatitsinerit sillimmaserneqarsinnaanngitsut tassaapput:
Gouda Forsikring
Maannakkorpiaq tassaapput sillimmasiisartut kisiartaallutik takornarialerisunik qimussiussisartunik sillimmasiisinnaasut. Ajuku oqaasaat:
“Uagutsinni akisussaanermut sillimmasiinermi angalanermi amigaatit sillimmaserneqartarput, soorlu qimussertitsinermi kukkuneq/amigaateqarneq peqqutigalugu ajutumeertoqarsimappat.
Soorlu takornariaq najummatsinnginnermini imaluunniit nikuinniarnermini qimussiniit nakkarpat, takornarialerisup tamanna akisussaaffigissanngilaa. Kisianni qimusseq uppissimappat imaluunniit takornariaq qimussimit aportissimappat tamanna takornarialerisup akisussaaffigissavaa, taamaalilluni sillimasiineq atuutissaaq.
Sillimmasiineq aamma atuutissaaq qimussiussineq ingerlanneqarsimanngippat (angalanermi akiliutaasumi qimussertitsinerup akiata utertinneqarnera), imaluunniit takornariaq kingusinaarluni Kalaallit Nunaannut tikissimappat taamaalilluni angalanermini ullormik annaasaqarpat (angalanermi ullormut akiliummik taarsiineq) allarpassuillu ataatsimut angalatitsinermi inatsisitigut akisussaaffiit, angalatitsisartunut atuuttut aallaavigalugit pilersinneqartut”
Kingulleq taasaq taamaallaat atuutissaaq, takornarialerisoq Rejsegarantifondeni aqqutigalugu ataatsimut angalatitsinermut tunngatillugu sillimmasiisimappat. Tamanna naleqquttuuvoq ataatsimut angalatitsinernik/ataatsimut misigisassarsiortitsinernik (misigisassamik ataasiinnaanngitsumik) tuniniaagaanni.
Codan Grønland/Illit Forsikring
Codan Grønland/Illit Forsikring maannakkorpiaq takornarialerisunut tuniniakkanut tunngatillugu akisussaanermut sillimmasiisinnaanngillat, kisianni siunissami qaninnermi periarfissaalernissaa sulissutigivaat. Taamaattumik Illit Forskikring innersuussipput sianeqqusillutik, paasiniarlugu tamanna piffissami tassani periarfissaanngorsimanersoq.
Tryg Grønland
Tryg Grønland Kalaallit Nunaanni takornarialerisunut Inuussutissarsiortunut akisussaanermut sillimmasiineq ajorput.
Pisiassanut tunngatillugu akisussaanermut sillimmasiineq kissaatiginngikkaanni, imaluunniit pisiassaatinut tamanna periarfissaanngippat, minnerpaatut niuernermi piumasaqaatini akisussaajumanani nalunaarummik (tuluttut disclaimers) ilanngussinissaq innersuunneqarpoq. Taamaalilluni takornariaq pisinnginnermini nalorninarsinnaasut tamakku akisussaaffigerusunnerlugit nammineq aalajangeeqqaarsinnaaniassammat.
Akisussaajumanani nalunaaruteqarneq takornariap taarseeqqusissuteqarsinnaanngiivinneranik isumaqanngilaq. Isumaqarunik ajutoorsimanermut akisussaaffik takornarialerisumiittussaasoq, imaluunniit takornarialerisup takussaasumik inatsisitigut pisussaaffini – isumannaassutsimut niuerluarnermullu ileqqunut tunngatillugu – unioqqutissimappagit taarseeqqusisinnaatitaapput. Kisianni akisussaajumanani nalunaaruteqarsimanermi qanorluunniit pisoqaraluarpat pisiniaq pisinnginnermini navianarsinnaasut, namminerlu akisussaaffigisassani pillugit arajutsisinneqassanngilaq. Kalaallit Nunaata pinngortitaani angalaarnermi sorpassuarnik naatsorsuutiginngisanik pisoqariataarsinnaavoq, kingornalu takornarialerisumiit akisussaatitsinermut tunngatillugu ilaat nalileruminaassinnaapput.
Angallatit minnerit 12-nik ilaasoqarsinnaasut pillugit ilisimatitsissut, Umiartornermut tunngasutigut inatsinut ilaasoq malillugu, Kalaallit Nunaanni angallatit akiliilluni ilaasoqarsinnaasut akuerineqaqqaassapput. Inuussutissarsiortutut akisussaanermut sillimmasiineq inatsisitigut piumasaqaataanngilaq, kisianni takornarialerisut isumaqarput tamanna innersuussassaalluartoq. Umiartornermummi tunngasutigut inatsit malillugu akisussaasutut inissiisoqarsinnaavoq, millionillu arlallit koruunit angullugit eqqartuutitittoqarsinnaalluni – naak aksussaajumanani nalunaartoqareeraluartoq. Allatut oqaatigalugu takornariaq Umiartornermut tunngasutigut inatsit nassarlugit aningaasarpassuarnik taarseeqqusisinnaavoq, taamaattoqassappalli inuussutissarsiortutut akisussaanermut sillimmasiissut ikiorsiisinnaavoq.
Tamaat isigalugu pisinnaasut assigiinngitsorpassuit paasilluarnissaat pisariusinnaavoq, pinngortitamimi peqqarniitsumi ajutooriataarsinnaanerit assigiinngitsut tusindiupput, takornariarlu nalileeriataarsinnaavoq tamakku takornarialerisup pisuussutigigai/akisussaaffigigai.
Misigisassarsiorlutik angalatuut amerlanerpaat nammineerlutik angalanissaminnut sillimmasiisarput, tamakkulu timikkut- imaluunniit pigisatigut ajutoornermut sillimmataasinnaapput, pisoqariataassappallu angalasup nammineq sillimataata illersorsinnaavaa. Kisianni takornariaq qanorluunniit sillimmateqaraluarni taarseeqqusisinnaavoq. Tamanna pisoqarujussuartillugu taamaallaat atuutissaaq, Kalaallimmi Nunaanni ajutoornermut tunngatillugu taarseeqqusineq aallaavittut Kalaallit Nunaata eqqartuussiviani ingerlanneqartussaammat.
Internettikkut misigisassanik pisinermi nalinginnaalernikuuvoq pisisoq ‘opt-in’-imi krydsileeqqaarluni akiliisinnaanissaa – tassa pisinermi piumasaqaatinik atuarsimanini, paasinnissimanini akuersininilu uppernarsaqqaarlugit akiliisinnaasarpoq. Tamanna pisisartunut sullissineq pitsaasuuvoq, takornarialerisullu ilisimassavaa isumannaallisaanermut, pisiamik tunniussinermut allanullu tunngatillugu ‘isumaqatigiissut’ takutissinnaassallugu.
–
Pisiassaq saaffiginnittarfimmi/takornariartitsisumit/angallatip naalagaanit/saqisumit assigisaanniilluunniit pisiarineqarsimappat, allassimasunik/atuagaaqqanik saqqumisuuteqarnissaq innersuunnarpoq, tassani isumannaassuseq pillugu ilitsersuutit, isumannaallisaanermut innersuutit kiisalu akisussaajumanani nalunaaruteqarnerit ilanngunneqarsinnaapput. Angalanissamut atuagaaqqanik tunniussinngikkaanni taava assut innersuunnarpoq angalaarnerup aallartinnginnerani isumannaassuseq pillugu ilisimatitsinissaq, kiisalu toqqaannartumik toqqaannanngitsumilluunniit qanoq naatsorsuuteqarfigeqatigiinnermik inissiineq. Kalaallit Nunaannut takornariaqqaat amerlasuut nalornissutigisarpaat sillimaniarneq ajunnginnersoq, isumannaassuserlu pillugu ilisimatitsineq pitsaasoq toqqissisimaneriinnaanngitsumik kisianni aamma suut naatsorsuussassaanersut pillugit paasititsisarpoq, tamannalu sapinngisamik pisiamut nalerisimaarnermik qulakkeerinnissinnaasarluni.
Ataani atuarneqarsinnaavoq akisussaajumanani nalunaarutip qanoq allanneqarsinnaaneranik assersuut:
Tamatigut pingaaruteqarpoq niuernermut piumasaqaatinik erseqqissunik peqarnissaq, taamaalilluni illit sullissininnut tunngatillugu takornariap/pisisartup naatsorsuutigisai naleqqunniassammata – imaluunniit qaangerneqarniassammata. Silataaniit pissutsit kingunerisaannik ilimaginngisanik pisoqariataarsinnaavoq, tassanilu niuernermut piumasaqaatit erseqqissut, ass. akisussaajumanani nalunaarutit aamma/imaluunniit akuerinninnermi krydsiligassaq, ilinnut maalaaaruteqartoqassagaluarpat imaluunniit taarseeqqusisoqassagaluarpat iluaqutigisinnaavatit.
Inuussutissarsiortutut akisussaanermut sillimmasiineq tassaavoq takornariamit taarseeqqusisoqassagaluarpat ikiutaalluarsinnaanerpaaq, tamannalu takornarialerisunit oqaloqatigisatsinnit amerlanerpaat innersuutigaat – pingaartumik angallatinik takornariartitsisarnemi – Umiartornermummi tunngasutigut inatsit taarseeqqusisinnaanermut annertuumik periarfissiimmat.
Pinngortitami peqqarniitsumi angalanermi navianartoqartarpoq, pingaartumik siullermeerlutik tikeraanut silap pissusaa, pinngortitaq, sila logistikkilu allaanerusutut misinnarsinnaapput taamaattumillu eqqissisimannginnermik nalorninermillu pilersitsillutik. Sapinngisamik paasinarluarnikkut ikiorsikkit. Ingasaassilluni nassuiaassineq toqqissisimanermillu annerpaamik tunisineq pitsaanerpaavoq, takornariammi paasissutissanik pisariaqartitsinerat suusupagisassaanngilaq. Sullissinermi pitsaasumi pingaarnerpaat ilagivaat paasissutissat naleqquttut piffissaq eqqorlugu tunniunnissaat!
Mads Lumholt
Nuummi matuersaatit qorsuit marluk
Scroll to top