Nunarsuaq tamakkerlugu COVID-19-mik tuniluunneq takornariaqarnermut assorsuaq sakkortusimavoq, Visit Greenlandip Takornariaqarnermi misissueqqissaarnermit nalunaarusiaani tamanna ersersinneqarpoq. 2020-mi nunakkut takornariat 70%-nik ikileriarsimapput, umiarsuarnillu takornariataatinik Kalaallit Nunaannut tikittoqarsimanani. April 2020’mi Grønlandsbanken-nip 2020-mi takornariaqarneq 80%-mik appariassasoq siulittuutigivaa. Appariaat inuiaqatigiinnut 450 mio. Kr. annaasaqataassalluni. 2020-milu takornariaqarnermi appariaat 70%-iuvoq, inuiaqatigiinnullu tamanna 400 mio. Kr. missaanik naleqarsimalluni.
Naalagaaffeqatigiit avataaniit Kalaallit Nunaannukarnissamut killilersuinerit annertuut peqqutigalugit Kalaallit Nunaannut takornariat amerlanersaat 2020-mi Danmarkimeersuusimapput, taamaakkaluartoq Danmarkimiit angalasut ukiup siulianut naleqqiullugit 46,3%-mik ikileriarsimapput.
Naalagaaffeqatigiit avataaniit takornariat ikileriaataat 70-90%-miippoq Islandimiillu Ilulissanut timmisartuussinerni ilaasut 2020-mi 97%-nik ikileriarsimallutik.
Danmarkimeersut amerlasuut suliartorlutik Nuummut tikissimapput, suliffeqarfinnik Naalakkersuisuneertunilluunniit ataatsimiigiarlutik. Taamaalilluni Nuummi mittarfik nalaatsinerlunnermi pitsaanerulaamik angusaqarsimavoq, sumiiffiilli sinerissamiittut allat annertunerusumik eqqugaasimallutik.
”Kisitsisit takutippaat nunap immikkoortuini sumiiffiit assigiinngitsut qanoq eqqugaasimanersut. Islandimit timmisartuussinerit matuneqavissimapput sulilu matoqqallutik. Sumiiffiillu takornariaqassagunik Islandikkut timmisartuussinernik atorfissaqartitsisut tassani eqqugaapput,” Visit Greenlandip pisortaa Hjörtur Smarason taamak oqarpoq.
Visit Greenlandip takornariaqarnermi misissueqqissaarnernit nalunaarusiaa, nalunaarsuutinit Kalaallit Nunaanni Naatsorsueqqissaartarfimmeersunik kiisalu takornarialerisunik Kalaallillu Nunaanni najugaqartunik apersuinernit sanaajuvoq. Nalunaarusiaq tamakkerlugu uani atuarneqarsinnaavoq.
Continues further down the page...
2019-mi suli COVID-19-qalinngitsoq Kalaallit Nunaanni takornariaqarnermi inuit 725 sulisorineqarsimapput takornariaqarnerlu 400 mio. koruuninik kaaviaartitsisimalluni. Takornarialerisunik aperusinerni 25%-ii akissuteqarsimapput, nunarsuarmi tuniluunnerup kingunerisaanik ilaatigut sulisuminnik soraarsitsisariaqarsimallutik. 55%-ii 2020-mi kaaviiaartittakkaminnit 50-99%-it annaasimavaat.
”Takornariaqarneq sinerissami nunaqarfinnilu suliffinnik aningaasanillu pilersitsisuuvoq. Naatsorsorparput inuiaqatigiit, takornarianit nunani allaneersunit ukioq kingulleq, COVID-19 peqqutigalugu 300 mio. koruuninik annaasaqarsimassasut. Suliffeqarfinnut kinguneri takornariaqarneq aallarteqqippat aatsaat tamakkerlugit isigisinnaalissavagut,“ Hjörtur Smarason oqarpoq.
Kalaallit Nunaanni takornarialerisut qassit COVID-19-ip kingunerani matusariaqarsimanersut paasinissaannut, Visit Greenlandi maannakkorpiaq nalunaarsuutinik amigaateqarput.
Nalunaarusiap takutippaa, takornarialerisut ikiorsiissutinik pisimanngikkaluarpata nunallu iluani sulinngiffeqarnissamut tuniniakkat piareersariikkat aallartisarneqarsimanngikkaluarpata, takornariaqarnermi aningaasartuutit amerlanerusimassagaluartut. Nunap iluani sulinngiffeqarnernik aaqqissuinerit peqqutigalugit, unnuisarfiit aasami Kalaallit Nunaanneersunit 11,8%-nik amerlanerusunik unnuisoqarsimapput.
”Suliniut Nunarput Nuan Naalakkersuisullu staycationimut akikilliliinermikkut ikiorsiissutaat annertuumik sunniuteqarsimapput. Takornariat nunani tamalaaneersut amerlasuutigut paarlannavianngilaat, kisianni imaaratarsinaavoq taakku peqqutigalugit suliffeqarfiit uumatinneqarsinnaasut,” Visit Greenlandip pisortaa taamak nassuiaavoq.
Visit Greenland takornarialerisut peqatigalugit, Kalaallit Nunaannut misigisassarsiorluni angalarusussuseq nunani tamalaani uummaarinnerulersinniarlugu suliniuteqarpoq. Anguniagaavoq 2022-mi takornariat 100.000-it Kalaallit Nunaannukartalernissaat.
Hjörtur Smarason – apeqqutinut nalinginnaasunut
Pisortaaneq – Visit Greenland
Oqarasuaatit angallattakkat: +45 22 80 14 16 / +299 27 99 98
Email: hjortur@visitgreenland.com
Mads Lumholt – Takornariaqarnermi naatsorsueqqissaarnernit nalunaarusiamik akisussaasoq
Senior Marketing Analyst – Visit Greenland
Danmarkimi oqarasuaat: +45 31 22 11 71
Email: lumholt@visitgreenland.com
