Deauville Green Awards filmfestivaliuvoq nunarsuaq tamakkerlugu ilisimaneqartoq, akisussaaqatigiinneq piujuartitsiniarnerlu pillugit akissarsititsiffiusartoq. Festivalimut taassumunnga filmit 500-t nunanit assigiinngitsunit 35-neersut immikkoortunut pingasunut avinneqarlutik sammisani assigiinngitsuni 15-iusuni akissarsitinneqarnissaminnik unammisinneqartussat tunniunneqarsimapput. Visit Greenlandip filmiliaa “Date a Destination” angalatitsinermik suliaqartut saqqummersitsinerannut Vestnorden-imut septembarip qaammataani 2022-mi pisumut atatillugu filmiliaasoq maanna piviusulersaarutini immikkoortumut “Eco-tourism and Responsible Travel”-imut Deauville Green Awardimik akissarsitinneqarnissaminut innersuunneqarsimavoq.
”Filmi nunatsinnut nunattalu assigiinngisitaarfiuneranut asanninnermik nalunaarutaavoq. Siullermik uatsinnut pingaartuuvoq maani nunaqartutut tarrarsorfigisinnaasatsinnik filmiliornissarput, taamaattumillu nunatsinnit nuannersumik qisuariarfigineqarnerput tuppalliutigingaarparput. Soorunalumi maanna filmip nunat tamalaat akornanni akissarsitinneqartussatut innersuunneqarsimanera aamma tulluusimaarutigeqaarput. Innersuunneqartitsigullu taassumuuna nunarput takornariarfissatut immikkorluinnaq ittutut maluginiarneqarnerulersipparput, takornariaqarnerullu piujuartitsiniarnermik tunngaveqarluni ineriartortinneqarnissaa pingaartuutillugu”, Visit Greenlandip pisortaa, Anne Nivíka Grødem, oqarpoq.
Nunarput Deauville festivalimi nunarsuaq tamakkerlugu akissarsisitsisoqartarneranut aatsaat innersuunneqanngilaq. 2017-imimi Visit Greenland piviusulersaarummut “Explorers by Nature: Life of Sheep Farmers”-imut Kujataata pinnissusianik taqqavanilu inooriaatsimik takutitsisumut kuultiusumik akissarsivoq, 2021-milu “Future of travel in Greenland: flattening the curve of the coronavirus”-imut nunagisaq qimanngikkaluarlugu sulinngiffeqartitsiniutaasumut sølviusumik akissarsilluni.
Filmfestivali ukioq manna pisussaq Deauville Green Awardsit aqqaneq-aappassarisaat sapaatip-akunnerata tulliani pissaaq, filmilu juunip ulluisa arfineq-pingajuanni takutinneqalerpat akissarsisitsinissamut aalajangiisussaatitat aalajangerumaarpat filmi akissarsitinneqarumaarnersoq.
Continues further down the page...
