”Kalaallit Nunaanni takornariaqarnerup siunissaanik akisussaassusilimmik ilusilersuinissaq maanna periarfissaraarput. Aningaasaqarnermik ineriartortitsineq pingaaruteqarpoq, takornariaqarnerulli ilippanassusaa tassaniiginnanngilaq. Takoriaqarneq piorsarsimassutsikkut kingornussassanik eriaginninnissamut kajumissaarisuuvoq, sumiiffinni suliffissaqartitsilluni atortulersuutinillu ineriartortitseqataalluni. Taamaattumik suliassanut pilersaarut suliniutinik tigussaasunik aallartitsisuussaaq, nuna tamakkerlugu inuiaqatigiinnut pitsaasumik ineriartortitseqataassaaq,” siulersuisuni siulittaasoq Annette Lings oqaaseqarpoq.
Mittarfissat nutaat pingasut atuutilersinneqannginnerini, nuna tamakkerlugu takornariaqarnermi siunnersuisoqatigiit kissaatigaat, takornariaqarnermi ineriartornerup akisussaassusilimmik toraagaqarnissaa. Nuna tamakkerlugu takornariaqarneq pitsaasumik ingerlanneqassappat, sumiiffinni takornarianik tigusisinnaassutsinik nukittorsaanermik-, pilersaarusiorluakkamillu nittarsaaqataanermik ukkatarinninneq ilaatigut pisariaqartinneqarput.
Mittarfiit atuutilerpata angallannerup annertusinissaanut malinnaasinnaanissaq suliniutini siullertut anguniarneqarpoq, saniatigullu takornariat sumiiffinnilu najugallit pitsaasumik atugassaqartinnissaat aamma kissaatigineqarluni.
Qulequttap uuma ataani: Grow Greenland – takornariaqarneq, nuna tamakkerlugu iluaqutaasussaq, Visit Greenlandip ilungersuutigaa takornariaqarnerup nuna tamakkerlugu iluaqutaanissaa. Angallannermi attaviit, akunnittarfiit sukisaarsaarfiillu takornarianut innuttaasunullu iluaqutaasussat pitsanngorsarnissaat tassani pingaaruteqarpoq.
”Illoqarfinnut minnernut nunaqarfinnullu takornarianut orniginarsaanermi, sumiiffinni aningaasaqanerit suliffissallu pitsanngorsarneqarsinnaapput. Takornariaqarneq sumiiffinni ineriartortitsinermi maligassiuisinnaavoq, kiisalu piujuartitsisumik ineriartortitseqataasinnaalluni aningaasaqarnermillu siaruaasinnaalluni, taamaalillutik sumiiffiit nunarsuaq tamakkerlugu nikerarnernit sunnertiannginnerussapput,” siulersuisoq oqarpoq.
Visit Greenlandip nassuerutigaa, takornariaqarneq oqimaaqatigiissaanngitsoq unammillernartunik akunnattoorfinnillu aamma pilersitsisarmat, pingaartumik avatangiisinut uumassusilinnullu tunngatillugu. Taamaattumik suliassanut pilersaarusiami piujuartitsisumik takornariaqarnerup ingerlanneqarnissaa, angalasartunut sianissunut toraagalimmik nittarsaaneq, pitsaanngitsumillu sunniisarnerup minnerpaamiitinnissaanut anguniagaqarneq immikkut ukkatarineqarput.
”Takornariaqarneq piorsarsimassutsikkut kingornussassatsinnik ataqqinnittoq, avatangiisimik illersuisoq, inuiaqatigiinni aningaasaqarnermik siaruarterisoq, nunalu tamakkerlugu iluaqutaasoq anguneqassappat, ataatsimoortumik ineriartortitsinissamut suliniuteqarneq pisariaqarpoq. Visit Greenlandip Naalakkersuisut suleqatigalugit 2024-mut nuna tamakkerlugu takornariaqarnerup ilusilersornissaanut, Kalaallillu Nunaanni akisussaassusilimmik takornariaqarnermik ineriartortitsisussamik suliaqarnissaq qilanaaraa. Suleqatigiinnikkut Kalaallit Nunaata takornariaqarnera piujuartitsisoq pisuunnguallatsitsisorlu pilersissinnaavarput, Kalaallillu Nunaat avammut saqqummiukkusutarput ilusilersorlugu. Takornariaqarneq massakkut siunissamilu inuuniutigisinnaasarput inooqatigisinnaasarpullu.” Visit Greenlandimi siulersuisoq Anette Lings naggasiivoq.
Continues further down the page...
