Apriilip 9-iat 2025
Nunap immikkoortuini takornariaqarneq pillugu aaqqissuussat arfinillit Explore North Greenland, Destination Disko Bay, Destination Arctic Circle, Visit Nuuk , Visit South Greenland aamma Visit East Greenland sumiiffinni nukittuffiit pisariaqartitallu tunngavigalugit akisussaassuseqartumik ineriartortitsinissaq qularnaarniarlugu inuussutissarsiortunik attuumassuteqartunillu ulluinnarni qanimut suleqateqartarput.
Visit Greenlandip takornariaqarneq pillugu nunamut tamarmut siunnersuisarfittut sulinermi siunertaraa nunatta misigisassarsioriarusullutik takornarianut, adventure turistinik taaneqartartunut, orniginartunngortinniarnissaa. Nunat tamalaat akornanni pilerisaarisarnertigut iliuusissanillu tunngaveqarluni takornariaqarnermik ineriartortitsinikkut aningaasarsiornerup ineriartulersinnissaa, nutaanik suliffissaqalersitsinissaq kiisalu akisussaassuseqartumik siunissarlu ungasinnerusoq eqqarsaatigalugu ineriartorsinnaasusut takorialeriffinngornissaq anguniagaapput. Suliniummut matumunnga ilaavoq piginnaanngorsaasarneq, misilittakkanik avitseqatigiittarneq ataqatigiissaarisarnerlu pingaartillugit attaveqaateqarnermik oqinnerusunngortitsinissaq.
Workshoppeqartitsineq suleqatigiilluarnerulersitsisuusoq
Cruise Forum 2025-mut atatillugu Ilulissani workshoppeqartitsinermi peqqammersumi pilerisaarisarneq, tusaamallualersitsiniaalluni oqaluttuartarneq, nuna tamakkerlugu tunngaviit ataatsimoorussat suleqatigiinnermullu killissaliussat pillugit suliaqartoqarpoq. Tamakku Kalaallit Nunaata takornariaqarnikkut tusaamaneqarnerulernissaa ineriartortitsinissamullu ataatsimoorussamik toraarfeqarnissaq siunertaralugit toqqarneqarsimapput. Aamma workshoppeqartitsineq peqataasut misilittakkanik avitseqatigiinnermikkut imminnullu isumassarsiorfigisarnermikkut pissarsilluarfigaat.
“Takornariaqarnermik ineriartortitsinermi ornigassani assigiinngitsuni aqutsisuusut attaveqaqatigiittarnerat tunngavissaasut pingaarnerit ilagaat, workshoppeqartitsinermilu sulineq nunap immikkoortortaasa ataqatigiinnerannut takornariaqarnerullu ineriartortinneqarneranut Kalaallit Nunaat tamaat eqqarsaatigalugu pingaaruteqarluinnarpoq” Asbjørn Dissing Bargsteen Avannaata Kommuniani takornarialerinermut siunnersorti oqarpoq.
Tamatumunngalu tapersiilluni Linda Kleist Visit Greenlandimi takornariarfissanik ineriartortitsinermut umiarsuarnullu takornariartaatinut tunngasunik akisussaaffeqartoq oqaaseqarpoq
“Nuna tamakkerlugu suleqatigiinneq takornariaqarnerup nunamut tamarmut iluaqutaanissaanut pingaaruteqarluinnarpoq. Takornariat kommunit killeqarfiinik isiginninniartuunngillat, misigisassarsiortuullutilli. Taamaattumik takornariartarfittut ataasiusutut peqatigiinnissarput, peqatigiilluarnitsinnik qularnaarinninnissarput aammalu takornarialerisut takornariarfissallu akornanni tapersersoqatigiinnissarput pingaaruteqartuupput.”
Continues further down the page...
