Ataatsimeersuarneq 22. februar susassaqartut assigiinngitsut soqutigisaqatigiit tamarmik unammilligassat oqallisigaat aammalu suleqatigiinnerup Kalaallit Nunaanni qanoq isiornikkut piujuartitsinermik tunngaveqartoq ineriartortissinnaanerlugu ataatsimut oqallisigaat. Nunatsinni sumiiffiit amerlanersaat peqataapput, peqataasullu 90-it sinneqarput.
Ataatsimeersuarnermi periarfissat aammalu atukkat unammillernartut qaqinneqarput oqallisigineqarlutillu. Ataatsimeersuarnermi isumaqatigiissutigineqaqaaq suli ullumikkornit annertunerusumik avatangiisitigut unammilligassat ataatsimoortumik takornariaqarnerup ingerlanneqarnerani iliuuseqarfigineqarnerusariaqartut. Kaammattuutigineqarportaaq politikkikkut siunnerfiit piujuartitsinermik ingerlatsinissamut takornariaqarnerup silarsuaa eqqarsaatigalugu ersarinnerusariaqartut.
Ataatsimeersuartunit oqariartuutigineqarpoq piujuartitsinermik ineriartorneq qitiutillugu ukkatarineqartariaqartoq tamassumalu nassataraa susassaqartut oqartussallu ataatsimoorlutik suleqatigiittariaqartut. Malittarisassat sinaakkutissallu erseqqissut oqallisigineqartuni qitiutinneqartut ilagaat. Takornariaqarnerup silarsuaani suliaqartut iluminni kaammattuutigaat takornariaqarnerup ineriatortinneqarnerani tamarmiullutik piujuartitsinermik ineriartortitsinermut tapertaassallutik. Takornariaqarnermi suliaqartut ilanngullugu erseqqissaatigaat takornariaqarneq pillugu inatsisissap akuersissutigitinnagu tusarniaanermi aammalu takornariaqarnerup ineriartortinnerani pilersaarutitigut akissuteqarnissamut akisussaaqataaniarlutik.
Peqataasunit oqariartuutigineqarpoq angallannikkut ‘tikikkuminarsarnermut’ ineriartuutaasinnaasut amingaataaneri. Tamakkuppuut uninngaartarfiit, perusuersartarfiit, aqqutit, aqquteeqqat, tulattarfiit, maannakkut atortooreersut aserfallatsaalineqarneri il.il. Ilanngulluguttaaq eqqaaneqarpoq upalungaarsimanikkut periuserineqartut amingarineqarnerat pisortallu killilimmik tunniussassaqarsinnaaneri soorlu Issittumi Sakkutooqarfimmit, Peqqinnissaqarfimmit aammalu Politiinit.
Ataatsimeersuarnermi erserpoq takornariaqarnermi suliaqarnermi ataatsimoorussamik tunniussaqarnissaq aammalu periuseqarnissaq pisariaqartinneqartoq aammalu takornariartaassuarnik kiffartuussineq pillugu siammasinnerusumik oqallisigineqartariaqartoq. Kaammattuutigineqarportaaq nuna tamakkerlugu takornariaqarnermik ingerlatsineq pillugu naleqartitat takorluukkallu oqallisigineqassasut.
Visit Greenlandic Cruise Forum 2024-mit oqariartuutigineqartut oqallisigineqartullu takornariaqarneq pillugu inatsisissamut suliarineqartumut ilassuteqarnissani tunniussassaqarnissanilu pingaartippaa. Ataatsimeersuarneq takornarialerisunut naapeqatigiinnissamut periarfissatsialaannartut isiginagu kisiannili Kalaallit Nunaani takornariartaassuarnut kiffartuussinermi piujuartitsineq tunngavigalugu inerisaavigineqarnissaanut tunniussaqatigiittoqarlunilu siunnerfeqatigiinnertut atorneqarpoq.
“Cruise Forum 2024 ataatsimeersuarneq pitsaanerpaavoq. Suliffeqarfiga illersoriartornagu kisiannili tulluusimaarutigaara maanna takornariartaassualerineq ILUMUT inuiaqatigiinnut annertuumik aningaasatigut kisitsisinngorlugu ersersinneqarmat iluaqutaalluarlutik isertitaqaatigilluarneqartut. Suli annertuumik takornarialerinermi pitsanngorsagassaqaqaagut aammalu ilisimavarput qinikkanit tamanna aamma anguniarneqartoq”. – Pitsi Høegh, Greenland Sagalands Qaqortoq.
Cruise Forum-ip ingerlanerani takornariartaassualerinermi siunissaq pillugu katersuunnermi pisimasut, eqqartorneqartut, siunissamullu pilersaarutit titartaganngorneqarlutik ersersinneqarput.
Continues further down the page...
Maajip qaammataani 2023-mi Visit Greenland takornariaqarnerup silarsuaani suliaqartut, takornarialerisut, oqartussat, siunnersuisooqatigiit allallu attuumassuteqartut misissuitsitsinermigut paasiniaaffigai. Inerniliussatigut erserpoq susassaqartut arlariinnik inassuteqaateqarnerat. Cruise Forum 2024 piviusunngorpoq ujartorneqarluni kissaatigineqarsimammat.
Cruise Forum 2024-ip anguniagaraa qulakkiissallugu takornariaqarnerup silarsuaani suliaqartut ineriartuutaasumik oqaloqatigiiffiusumik, ilisimasatigut avitseqatigiiffiusumik aammalu susassaqarfiit akimorlugit suleqatigiissinnaanerat pilersissallugu. Ataatsimeersuarnermi toqqaannartumik kiffartuussisut, oqartussaasut, sumiiffinni takornariaqartitsinermi siunnersuisooqatigiiusut inuussutissarsiortullu saaffigalugit aaqqissuussiffigineqarput. Siunertaavoq erseqqissumik susassaqartut oqartussaaffiillu suussusersillugillu unammillernartut ataatsimoorussamik kivinniarnerani ikioqatigiinnissaq.
