“Takornariarlutik tikittartut amerliartortillugit Kalaallillu Nunaata angalavissatut soqutiginarnera annertusiartortillugu, nunarput pillugu paasissutissat pissarsiariuminartuunissaat akisussaaffigaarput. Najukkami takornarialerisorpassuit pissarsiarinissaat misigisassallu utaqqiinnartut ujartornissaat nittartakkap nutaap ajornannginnerulersissavai – ilutigitillugulu nuna tamakkerlugu immikkuullarissunik misigisassaqartitsisartut, takornariaqarnikkut inuussutissarsiuteqartut nukittuut tunniusimasullu saqquminerulersissallugit,” Anne Nivíka Grødem, Visit Greenlandimi pisortaq oqarpoq.
Ukiuni kingullerni takornariaqarnikkut inuussutissarsiuteqarneq annertusipiloorsimavoq najukkami takornarialerisut amerlanerulerlutik, taamaalillunilu takornarialerinikkut suliaqarfimmut takornariallu pisariaqartitaannut ikorfartuutaasumik digitalikkut saqqummersitsisarnikkut ikorfartuinissaq pisariaqartinneqalerluni. Taamaammat nittartagaq nutaaq nittartakkap isikkuanik nutarterinerinnaanani, kisiannili atoruminassutsimigut pitsanngortinneqarpoq. Mobiilikkut qarasaasiatigullu atorneqarsinnaanera, sumiissusersiutitut atorneqarsinnaanera, ornitassanut quppersakkat, ilanngutassiatigut isumassarsiorfissat nunarpullu tamakkerlugu takornarialerisut saqqumilaartinneqarnerat pitsanngorsarneqarput.
Ukiumoortumik millionit affaanik amerlanerusunik Visit Greenlandip nittartagaa iserneqartarpoq, Kalaallit Nunaannut angalaniarnikkut pilersaarusiornermi qitiusumik atorneqartarpoq. Kalaallit Nunaannilu suliamut pikkorissuseqarluni akisussaassuseqarlunilu takornariaqarnerup ineriartortinnissaanut, siammarterivimmik nutarsaaneq alloriarneruvoq pingaarutilik, takornariamut nunatsinnilu inuiaqatigiinnut iluaqutissarsiffigineqartussaq.
Continues further down the page...
