Tunumi pinngortitami pitsaanerpaamik misigisassaqarpoq, Arctic Dreamimik piginnittoq, Lars Peter Anker Møller, taamatut oqarpoq. Taamaammallu soorlu Tunumut takornariat qajartorumasut amerliartuinnarput. Tunumut takornariartartut tassaanerupput kulturitsinnik misigisassarsiornermikkut, pinngortitamik kusanartumik peqqarniissinnaasumillu misigisaqarsinnaarusuttu, Lars Peter Anker Møller oqarpoq, takornarianillu pisuttuaqattaarusuttunit nunaqarfinni najugaqarusuttunit amerliartuinnartunit taanna aamma saaffigineqartarpoq.
Assiliiartorusunneq aamma soqutigineqaleriartuinnarpoq kiisalu umiarsuit angivallaanngitsut kangerlunni alianaatsuni pinngortitaq qanilleriaqqissinnaajunnaarlugu angalanissartik soqutigiartuinnarpaat, Nanu Travelimeersoq, Mette Pike Barselajsen erseqqissaavoq.
Sumiiffimmi najugallit tunniusimasut Lars Peter Anker Møllerip takornarialerinermini suleqatigai, taakkualu tatiginartut aamma ineriartussammata, soorlu ukiuni marlunni aalajaalluni nassatanik isumaginnittooreersoq, angallammik ingerlatsinissaminut pikkorissartussanngorpoq.
Maannakkut ukiukkut nioqqutigisartakkat aallartinnissaannut Tunumi apinissaa utaqqineqarpoq. Aput sikulu Tunumiut inooriaasaannut pingaaruteqarput, soorunalumi aamma takornarianik qimussiussisartunut.
Tunumi sila ukiukkut takornariaqarniarnermut unammillernartarpoq, ajornerpaagaangallu inniminneriikkat unitsiinnartariaqartarlutik, ataatsimulli isigalugu ukiukkut Tunumukarnissamut inniminniinissaq soqutigineqarluarpoq.
Blomsterdalimi tupertarfissaq Tasiilaq Tours kiisalu Arctic Dream suleqatigiillutik aallartippaat. Unnuisut perusuersartarfeqarlutillu uffarfeqarnissaat siunniunneqarpoq, gassimik nerisassiorfissamik aamma tupersuaqarpoq. Blomsterdalip, tupertarfiup Sømandshjemmillu tungaanut pisuffissap aallartinnerata atassusersornera upernaaq ikaartarfiliornikkut naammassivoq. Siunissami pisuttuariat sinngup puuanik nassaannarlutik unnuisarsinnaaniassammata, ataavartunik tupeqalernissaa pilersaarutaavoq.
Umiarsuarnit takornariaartaatinit Tunu soqutigineqariartuinnarmat, 2020miit takornarialerinissamut angallat p-mik akuersissutilik Tasiilaq Toursip pisiaraa. Eqaannerusumik sullissisinnaaneq suliffeqarfiullu ineriartortissinnaaneranik taamaalilluni periarfissiilluni.
Icecamp Greenland, Tunumi kangerluit annersaanni, Tasiilamiit angallammik akunneq ataaseq affarlu atorlugit, Sermillip Kangerluani iigartartulimmiippoq. Tammaarsimaartarfik tallimanik illuaraqarpoq perusuersartarfilinnik, kissartumik uffarfiusinnaasumik kiisalu naleqquttumik sutorniartarfeqarluni. Suut tamarmik nammineq sanaajupput, taamaalilluni Tunumi piniartunut illuaraliortarneq pitsaasumillu takornarialerinissamik ilisimanninneq atorluarneqarlutik.
Tammaarsimaarfiup zodiacii marluk atorlugit, minutsit 20t ingerlaneranni nunaqarfik Tiniteqilaaq, 70inik inulik, kalaallit ulluinnarni inooriaasaannik paasisaqarfiusinnaasoq, orninneqarsinnaavoq. Nunaqarfiliarnermi arferit iluliarsuillu qimerloorneqarsinnaapput kiisalu eqaluit, qeeqqat, saarulliit pisarineqarsinnaammata uillunillu katersuisoqarsinnaalluni, sapinngisamik nerisassat nutaggariit tammaarsimaarfiup eqqannguaneersut nerisassiarineqartarput.
Kommuneqarfik Sermersuup, Nanu Travelip kiisalu Destination East Greenlandip suleqatigiinnerisigut, inuussutissarsiutigalugu angallammik 12inik ilaasoqarsinnaasumik angallassinissamut pikkorissarneq iluatsilluarpoq. Taanna peqataaffigineqarluarpoq, ilisimasortallu arlallit maanna uppernarsaammik peqalereernikuullutik.
Novembarip naalernerani Mette Pike Barselajsen Nanu Travelimi suliunnaassaaq. Pisortamik nutaamik atorfinitsitsinissaq siulersuisut sulissutigaat.
Aserorterineq pissutigalugu Tasiilami katersugaasivik matoqqagallarpoq, qaqugulu ammaqqinnissaa suli oqaatigineqarsinnaanani. Assinilli katersugaasivik, 2019imi aasakkut nutarterneqareerluni ammaqqippoq. H.C. Andersen pillugu saqqummersitsineq maannakuugallartoq decembarip tungaanut ingerlanneqassaaq. Tamatuma kingorna sumiiffimmi najugallip qalipagai saqqummersinneqassapput. Kiinnat Eigil Knuthip 1930kkunni qiperugaasa saqqummersinneqarneri pingasunngornermi 20/11 ammaqqinneqassaaq. Tassani Tunumiut arfinillit kiinaat qiperorneqarnikuupput, ullumikkut inuusut siuliminnut oqaluttuarisaanermullu atassusiisutullusooq. 2020p aallatinnerani Tunumi ileqqutoqqat qimussernermut tunngasut tamatumalu ineriartornikuuneranut sammisuunerusut, ukiuunerani saqqummersitassatut piareersarneqalissapput.
Continues further down the page...
